Gũcokerithia Maathani 19

“Na rĩrĩ, rĩrĩa Yahweh Kĩhoti waku akaaniina ndũrĩrĩ iria Yahweh Kĩhoti waku arakũhe bũrũri wacio na ũkorũo wĩgwatĩire bũrũri wao na ũgaikara matũũra-inĩ mao na nyũmba-inĩ ciao,

wagĩrĩirũo gũthuura matũũra matatũ gatagatĩ-inĩ ka bũrũri ũrĩa Yahweh Kĩhoti waku arakũhe ũwĩgwatĩre

Wagĩrĩirũo kũgayania bũrũri ũcio Yahweh Kĩhoti waku akũheete maita matatũ, na ũthondeke barabara nĩguo mũndũ ũũraganĩte akahotaga kũũrĩra harĩ itũũra rĩmwe rĩa macio.

“Na rĩrĩ, ũũ nĩguo kũrĩthiaga ũhoro-inĩ wĩgiĩ mũndũ ũũraganĩte ũrĩa ũrĩũragĩra kũu nĩgetha athiĩ na mbere gũtũũra muoyo: Angĩũraga mũndũ ũngĩ atekwenda na akorũo ndaramũthũire;

ta rĩrĩa mathiĩte na mũndũ mũtitũ kuuna ngũ na oe guoko na igũrũ anyitĩte ithanwa nĩguo ateme mũtĩ, narĩo ithanwa rĩrũke kuuma mũtĩ-inĩ warĩo na rĩgũthe mũndũ ũcio ũngĩ na akue, mũndũ ũcio ũũraganĩte agĩrĩirũo kũũrĩra itũũra-inĩ rĩmwe rĩa macio nĩguo athiĩ na mbere gũtũũra muoyo

Kwaga ũguo, mũrĩhĩria wa thakame arĩ na marakara ahota gũteng’eria mũndũ ũcio ũũraganĩte, amũkinyĩre, na amũũrage, tondũ wa itũũra rĩu gũkorũo rĩrĩ haraihu mũno. O na gũtuĩka mũũragani ũcio ndagĩrĩire kũũragwo, tondũ ndarathũire mũndũ ũcio

Nĩkĩo ndĩragwatha ngakwĩra ũũ: ‘Thuura matũũra matatũ.’

“Yahweh Kĩhoti waku angĩgakwararamĩria bũrũri waku o ta ũrĩa eehĩtire kũrĩ maithe manyu ma tene na akorũo akũheete bũrũri wothe ũrĩa eerĩire maithe manyu ma tene atĩ nĩ akaamahe

—na nĩ angĩkorũo tu nĩ ũkũrũmia maathani mothe ũrĩ na wĩhokeku marĩa ndĩrakũhe ũmũthĩ, wende Yahweh Kĩhoti waku na hingo ciothe ũrũmagĩrĩre njĩra ciake—nĩ wagĩrĩirũo gũkongerera matũũra mangĩ matatũ harĩ macio matatũ.

Na njĩra ĩyo gũtirĩ thakame ĩtarĩ na mahĩtia ĩgaaitwo thĩinĩ wa bũrũri ũrĩa Yahweh Kĩhoti waku arakũhe ũtuĩke igai rĩaku, na ndũgaacokererũo nĩ ihĩtia rĩa ũiti wa thakame.

“No mũndũ angĩkorũo nĩ arathũire mũndũ ũngĩ na nĩ kũmuohia aramuohetie nĩguo amũtharĩkĩre na aramũguraria ũũru arakua, na mũndũ ũcio arorĩra itũũra-inĩ rĩmwe rĩa macio,

athuri a itũũra rĩake magĩrĩirũo kũmwĩta kuuma kũu na mamũneane guoko-inĩ kwa mũrĩhĩria wa thakame, na mũndũ ũcio no mũhaka oragwo

Ndwagĩrĩirũo kũmũiguĩra tha, no mũhaka weherie ihĩtia rĩa ũiti wa thakame ĩtarĩ na mahĩtia kuuma thĩinĩ wa Isiraeli, nĩguo maũndũ maku mathiage wega.

“Rĩrĩa ũkaamũkĩra igai rĩaku bũrũri-inĩ ũrĩa Yahweh Kĩhoti waku arakũhe wĩgwatĩre, ndũkanathaamie mũtĩ wa mũhaka wa mũndũ ũrĩa mũriganĩtie nake kuuma harĩa maithe manyu ma tene magaakorũo mekĩrĩte mĩhaka.

“Ũira wa mũndũ ũmwe tu ndwagĩrĩire gũtũma mũndũ atuĩrũo nĩ ũndũ wa ihĩtia o rĩothe kana rĩhia o rĩothe angĩkorũo ekĩte. Ũira wa andũ erĩ kana ũira wa andũ atatũ nĩguo ũrĩtũmaga ũndũ ũmenyeke wega

Mũndũ angĩruta ũira wa maheeni kwerekera mũndũ ũngĩ na oige atĩ nĩ ekĩte ihĩtia rĩna,

andũ acio erĩ mataraiguithania magĩrĩirũo kũrũgama mbere ya Yahweh, mbere ya athĩnjĩri-Yahweh na atuanĩri ciira arĩa magaakorũo magĩtungata matukũ-inĩ macio

Atuanĩri ciira magĩrĩirũo gũthuthuria na kinyi, na angĩkorũo mũndũ ũcio ũrutĩte ũira nĩ mũira wa maheeni na nĩ aigĩrĩire mũrũ wa ithe kĩgenyo,

mwagĩrĩirũo kũmwĩka o ta ũrĩa ekũbangĩte gwĩka mũrũ wa ithe, no mũhaka mweherie kĩndũ kĩũru gatagatĩ-inĩ kanyu

Nao arĩa megũtigara mekũigua ũhoro ũcio na metigĩre, na matigeeka ũndũ mũũru ta ũcio rĩngĩ gatagatĩ-inĩ kanyu

Ndwagĩrĩirũo kũigua tha: Muoyo ũrĩrĩhagwo na muoyo, riitho rĩkarĩhwo na riitho, igego rĩkarĩhwo na igego, guoko gũkarĩhwo na guoko, kũgũrũ gũkarĩhwo na kũgũrũ.