Gũcokerithia Maathani 20
“Ũngĩgathiĩ kũrũa na thũ ciaku na wone mbarathi ciao na ngaari ciao cia mbarathi na thigari ciao irĩ nyingĩ mũno gũkĩra ciaku, ndũkanaciĩtigĩre, nĩ gũkorũo Yahweh Kĩhoti waku ũrĩa wakũrutire bũrũri wa Misiri arĩ hamwe nawe
Rĩrĩa mũgaakoragwo mũrĩ hakuhĩ gũthiĩ mbaara-inĩ, mũthĩnjĩri-Yahweh agĩrĩirũo gũka na aarĩrie andũ
Agĩrĩirũo kũmeera atĩrĩ, ‘Thikĩrĩriai inyuĩ Isiraeli, rĩu mũkiriĩ kũrũa na thũ cianyu. Mũtikae kũũrũo nĩ hinya. Mũtigetigĩre o na kana mũmake kana mũinaine nĩ ũndũ wacio,
tondũ Yahweh Kĩhoti wanyu arathiĩ arĩ hamwe na inyuĩ amũrũĩrĩre harĩ thũ cianyu na amũhonokie.’
“Nao anene magĩrĩirũo kwĩra andũ atĩrĩ, ‘Nũũ wakĩte nyũmba njerũ na ndarĩ aramĩrugũria?’ Nĩ acoke gwake mũciĩ. Kwaga ũguo, ahota gũkuĩra mbaara-inĩ nake mũndũ ũngĩ amĩrugũrie
Na nũũ ũhandĩte mũgũnda wa mĩthabibũ na ndarĩ arambĩrĩria kũrĩa maciaro maguo? Nĩ acoke gwake mũciĩ. Kwaga ũguo, ahota gũkuĩra mbaara-inĩ nake mũndũ ũngĩ ambĩrĩrie kũrĩaga maciaro maguo
Na nũũ ũrĩkanĩire na mũirĩtu atĩ nĩ ekũmũhikia na ndarĩ aramũhikia? Nĩ acoke gwake mũciĩ. Kwaga ũguo, ahota gũkuĩra mbaara-inĩ nake mũndũ ũngĩ ahikie mũirĩtu ũcio.’
Ningĩ anene nĩ magĩrĩirũo kũũria andũ atĩrĩ, ‘Nũũ ũrĩ na guoya na ũũrĩtwo nĩ hinya? Agĩrĩirũo gũcoka gwake mũciĩ, nĩgetha ndagatũme ariũ a ithe makue ngoro take.’
Anene marĩkia kwarĩria andũ, magĩrĩirũo gũthuura anene a mbũtũ nĩgetha matongorie andũ.
“Rĩrĩa wakuhĩrĩria itũũra nĩguo ũrũe narĩo, wagĩrĩirũo kwanĩrĩra ũiguano wa thayũ harĩ rĩo
Andũ a itũũra rĩu mangĩtĩkĩra ũiguano wa thayũ hamwe nawe na makũhingũrĩre ihingo ciarĩo, andũ arĩa othe megũkorũo kuo marĩtuĩkaga aku a gũkũrutagĩra wĩra mũritũ, na magũtungatagĩre
No mangĩrega gũthondeka thayũ hamwe nawe na moke kũrũa nawe, wagĩrĩirũo gũthiũrũrũkĩria itũũra rĩu,
na Yahweh Kĩhoti waku nĩ akaarĩneana guoko-inĩ gwaku, na no mũhaka ũũrage mũndũrũme wothe ũrĩ thĩinĩ warĩo na rũhiũ rwa njora
No rĩrĩ, atumia, ciana, mahiũ, na kĩndũ gĩothe kĩrĩ itũũra-inĩ rĩu, indo ciarĩo ciothe iria ũtahĩte, no wĩyoere, na ũrĩe indo icio ũgũtaha kuuma kũrĩ thũ ciaku, iria Yahweh Kĩhoti waku akũheete.
“Ũguo nĩguo wagĩrĩirũo gwĩka matũũra marĩa mothe marĩ kũraihu mũno nawe marĩa matarĩ ma ndũrĩrĩ ici irĩ hakuhĩ
No matũũra-inĩ ma ikundi ici cia andũ, marĩa Yahweh Kĩhoti waku arakũhe matuĩke igai rĩaku, ndwagĩrĩirũo kũreka kĩndũ o na kĩmwe kĩrahuhia gĩtũũre muoyo
Ithenya rĩa ũguo, wagĩrĩirũo kũmaniina biũ, Ahiti, Aamori, Akanaani, Aperizi, Ahivi, na Ajebusi, o ta ũrĩa Yahweh Kĩhoti waku agwathĩte;
nĩgetha matigakũrute kũrũmĩrĩra mĩtugo yao yothe ĩrĩ magigi ĩrĩa mekĩire ihoti ciao, matũme wĩhĩrie Yahweh Kĩhoti waku.
“Ũngĩkarigicĩria itũũra na ũrĩtunyane thutha wa kũrũa narĩo matukũ maingĩ, ndwagĩrĩirũo gũthũkangia mĩtĩ yarĩo na njĩra ya kũmĩtemanga na ithanwa. No ũrĩe maciaro mayo, no ndwagĩrĩirũo kũmĩtema. Tondũ rĩrĩ, hihi no ũgĩtharĩkĩre mũtĩ wa gĩthaka ta ũrĩa ũngĩtharĩkĩra mũndũ
Mũtĩ ũrĩa tu ũngĩthũkangia no ũrĩa ũĩ atĩ ndũrutaga irio. No ũũteme ũthondeke indo cia kũrigicĩria itũũra rĩu ũrarũa narĩo, o nginya rĩgwe.