Gũcokerithia Maathani 26

“Rĩrĩa ũkaaingĩra bũrũri ũrĩa Yahweh Kĩhoti waku arakũhe ũtuĩke igai rĩaku na ũkorũo ũwĩgwatĩire na ũgaikara kuo,

wagĩrĩirũo kuoya maciaro mamwe ma mbere ma maciaro mothe ma tĩri, marĩa ũgaakorũo ũcokanĩrĩirie kuuma bũrũri ũrĩa Yahweh Kĩhoti waku arakũhe, ũmekĩre gĩkabu-inĩ na ũthiĩ handũ harĩa Yahweh Kĩhoti waku agaathuura rĩĩtwa rĩake rĩkoragwo ho

Wagĩrĩirũo gũgaathiĩ kũrĩ mũthĩnjĩri-Yahweh ũrĩa ũgaakorũo agĩtungata matukũ-inĩ macio na ũmwĩre ũũ, ‘Ũmũthĩ nĩ ndoka kwĩra Yahweh Kĩhoti waku atĩ nĩ ndĩkĩtie gũkinya bũrũri-inĩ ũrĩa Yahweh eehĩtire harĩ maithe maitũ ma tene atĩ nĩ agaatũhe.’

“Nake mũthĩnjĩri-Yahweh aamũkĩre gĩkabu kĩu kuuma moko-inĩ maku na akĩige mbere ya kĩgongona kĩa Yahweh Kĩhoti waku

Na ũrĩ hau mbere ya Yahweh Kĩhoti waku ũkoiga ũũ, ‘Baba aarĩ Mũaramu worũraga, na agĩikũrũka agĩthiĩ Misiri na agĩikara kuo arĩ mũgeni, arĩ na andũ a nyũmba yake matarĩ aingĩ. No arĩ kũu, agĩtuĩka rũrĩrĩ rũnene, rũrĩ hinya na rũrĩ na andũ aingĩ mũno

Nao Amisiri magĩtũhinyĩrĩria na magĩtũnyarira na magĩtũrutithia wĩra mũritũ wa ũkombo

Nĩ ũndũ ũcio tũkĩambĩrĩria gũkaĩra Yahweh, o we Kĩhoti wa maithe maitũ ma tene, nake Yahweh akĩigua mũgambo witũ na akĩona mĩnyamaro itũ na mathĩna maitũ na ũrĩa twanyariragwo

Mũthia-inĩ Yahweh agĩtũruta Misiri na guoko kũrĩ hinya na guoko gũtambũrũkie na ciĩko cia kũguoyohia na imenyithia na ciama

Agĩcoka agĩtũrehe gũkũ na agĩtũhe bũrũri ũyũ, bũrũri ũiyũire iria na ũũkĩ

Rĩu nĩ ndarehe maciaro ma mbere ma maciaro ma tĩri ũrĩa Yahweh Kĩhoti wakwa aheete.’

Thutha ũcio wagĩrĩirũo gũgaakena nĩ ũndũ wa wega wothe ũrĩa Yahweh Kĩhoti waku akũheete na nyũmba yaku, wee na Mũlawii na mũndũ wa kũngĩ ũrĩa ũikaraga gatagatĩ-inĩ kanyu.

“Rĩrĩa wacokanĩrĩria gĩcunjĩ gĩothe gĩa ikũmi kĩa maciaro maku mwaka-inĩ wa gatatũ, mwaka wa gĩcunjĩ gĩa ikũmi, wagĩrĩirũo gũkĩheana kũrĩ Mũlawii, mũndũ wa kũngĩ, mwana ũtarĩ ithe, na mũtumia wa ndigwa, nao marĩe maiganie marĩ kũu thĩinĩ wa matũũra manyu

Na ũcoke uuge ũũ ũrĩ mbere ya Yahweh Kĩhoti waku, ‘Nĩ ndaruta igai rĩrĩa rĩamũre kuuma nyũmba-inĩ yakwa na ndarĩheana kũrĩ Mũlawii, mũndũ wa kũngĩ, mwana ũtarĩ ithe, na mũtumia wa ndigwa, o ta ũrĩa ũnjathĩte. Ndiagararĩte kana ngaaga kũhingia maathani maku

Ndirĩte igai rĩu ngĩcakayaga kana ngaruta kĩndũ o na kĩrĩkũ kĩarĩo rĩrĩa ndĩ na thahu kana ngaheana kĩndũ o na kĩrĩkũ kĩarĩo nĩ ũndũ wa arĩa akuũ. Nĩ njathĩkĩire mũgambo wa Yahweh Kĩhoti wakwa na nĩ njĩkĩte maũndũ mothe marĩa wanjathire

Rĩu rora ũrĩ gĩikaro-inĩ gĩaku kĩamũre kũu igũrũ, na ũrathime andũ aku Isiraeli na bũrũri ũrĩa ũtũheete, o ta ũrĩa wehĩtire harĩ maithe maitũ ma tene, bũrũri ũiyũire iria na ũũkĩ.’

“Mũthenya wa ũmũthĩ Yahweh Kĩhoti waku aragwatha ũrũmagĩrĩre mawatho na matuĩro maya ma ciira. No mũhaka ũmarũmagie na ũkamarũmagĩrĩra na ngoro yaku yothe na muoyo waku wothe

Ũmũthĩ nĩ wetĩkĩra uuge wa Yahweh atĩ nĩ egũtuĩka Kĩhoti waku na atĩ no mũhaka ũthiagĩre njĩra-inĩ ciake na ũrũmagie mawatho make, maathani make, na matuĩro make ma ciira, na ũthikagĩrĩrie mũgambo wake

Na ũmũthĩ Yahweh nĩ etĩkĩra uuge waku atĩ nĩ ũgũtuĩka rũrĩrĩ rwa andũ ake, kĩndũ gĩake kĩa mwanya, o ta ũrĩa akwĩrĩire, na atĩ nĩ ũrĩrũmagia maathani make mothe

na atĩ nĩ egũkwambararia igũrũ rĩa ndũrĩrĩ iria ingĩ ciothe iria atũmĩte ikorũo kuo, atũme ũtũũgĩre na ũgĩe igweta na riri angĩkorũo nĩ ũkwĩyonania atĩ ũrĩ rũrĩrĩ rwa andũ aamũre harĩ Yahweh Kĩhoti waku, o ta ũrĩa akwĩrĩire.”