Gũcokerithia Maathani 32

“Ta tega gũtũ, wee igũrũ, heane ũhoro, O na thĩ nĩ ĩthikĩrĩrie ciugo cia kanua gakwa.

Ũtaaro wakwa ũkuura o ta mbura; Ciugo ciakwa ikũgwa o ta ime, O ta rũthuthuũ rũkiurĩra nyeki Na o ta mbura nene ĩkiurĩra mĩmera.

Nĩ gũkorũo nĩ ngũmenyithania ũhoro wĩgiĩ rĩĩtwa rĩa Yahweh. Heanai ũhoro wĩgiĩ ũnene wa Kĩhoti witũ!

We nĩwe Rwaro rwa Ihiga, na mawĩra make nĩ makinyanĩru, Nĩ gũkorũo njĩra ciake ciothe nĩ cia kĩhooto. Nĩ Kĩhoti mwĩhokeku na ndarĩ hĩndĩ agaga kĩhooto; Akoragwo arĩ mũthingu na mũrũngĩrĩru.

O nĩo mekĩte maũndũ moru. O ti ciana ciake, nĩo merehereire thĩna. Nĩ rũciaro ruogomu na rũhĩngĩcanu!

Hihi ũũ nĩguo mwagĩrĩirũo gwĩka Yahweh, Inyuĩ andũ aya akĩgu na matarĩ ũũgĩ? Na githĩ tiwe Ithe wanyu ũrĩa watũmire mũkorũo kuo, O we Ũrĩa wamũmbire na agĩtũma mwĩhande wega?

Ririkana matukũ ma tene; Mwĩcũraniei ũhoro wa mĩaka ya njiarũa iria ihĩtũkĩte. Ũria thoguo, na nĩ egũkwĩra; Ũria athuri anyu, na nĩ megũkũhe ũhoro.

Rĩrĩa Ũrĩa ũrĩ Igũrũ Mũno aaheire ndũrĩrĩ igai rĩacio, Rĩrĩa aamũranirie ariũ a Adamu, Nĩ eekĩrire mũhaka wa ikundi cia andũ Kũringana na mũigana wa ariũ a Isiraeli.

Nĩ gũkorũo andũ a Yahweh nĩo igai rĩake; Jakubu nĩwe igai rĩake.

Aamuonire kũndũ werũ-inĩ Werũ ũtarĩ kĩndũ, ũrĩ na nyamũ iria igambaga. Akĩmũgitĩra amũthiũrũrũkĩirie, na akĩmũrũmbũiya, Na akĩmũgitĩra o ta kĩũma kĩa riitho rĩake.

O ta ũrĩa nderi ĩringaringaga gĩtara kĩayo, Ĩkareera igũrũ rĩa tũcui twayo, Na ĩgatambũrũkia mathagu mayo ĩgatuoya, Ĩgatũkuua na njoya ciayo,

Yahweh we wiki nĩwe wamũtongoragia; Gũtiarĩ hoti ng’eni yarĩ hamwe nake.

Agĩtũma ahaice kũndũ kũrĩa gũtũũgĩru mũno thĩinĩ wa thĩ, Nĩgetha arĩe maciaro ma mũgũnda. Akĩmũhũnia na ũũkĩ kuuma harĩ ndũmba ya ihiga Na maguta kuuma ihiga-inĩ rĩũmũ,

Thiagĩ kuuma rũũru-inĩ rwa ng’ombe na iria kuuma rũũru-inĩ rwa mbũri, Hamwe na ng’ondu iria njega biũ, Na ndũrũme cia Bashani, na thenge, O hamwe na ngano ĩrĩa njega biũ; Na ũkĩnyua ndibei kuuma thakame-inĩ ya thabibũ.

Na rĩrĩa Jeshuruni aatunguhire, akĩambĩrĩria ũremi. Rĩu nĩ ũtunguhĩte, nĩ ũnenehete biũ, na ũkahũna biũ. Nĩ ũndũ ũcio agĩtiganĩria Eloah, o we ũrĩa wamũmbire, Akĩnyarara Rwaro rwa Ihiga o we ũhonokio wake *Yahshua*

Magĩtũma acinwo nĩ marakara nĩ ũndũ wa ihoti ciao ng’eni; Magĩikara o makĩmũrakaragia na maũndũ marĩ magigi.

Maarutagĩra ndaimono magongona, no ti Eloah, Makaruta magongona harĩ ihoti matooĩ, Iria cieyumĩrĩtie o ica ikuhĩ, Makaruta magongona harĩ ihoti iria maithe manyu ma tene matooĩ.

Ũkĩriganĩrũo nĩ Rwaro rwa Ihiga o we ũrĩa wagũciarire, Na ũkĩaga kũririkana EL ũrĩa wagũciarire.

Rĩrĩa Yahweh oonire ũndũ ũcio, akĩmarega Tondũ ariũ ake na aarĩ ake nĩ maamũrakaririe.

Nĩ ũndũ ũcio akiuga ũũ, ‘Nĩ ngũmahitha ũthiũ wakwa; Nyone moimĩrĩro mao. Nĩ gũkorũo nĩ rũciaro rũremi, Ariũ matarĩ ehokeku o na hanini.

Nĩ matũmĩte njinwo nĩ marakara nĩ ũndũ wa kĩndũ gĩtagĩrĩire gũkorũo kĩrĩ EL; Nĩ mandakarĩtie nĩ ũndũ wa mĩhianano yao ĩtarĩ kĩene. Nĩ ũndũ ũcio nĩ ngũtũma maigue ũiru nĩ ũndũ wa andũ matarĩ kĩene; Nĩ ngaamarakaria kũgerera rũrĩrĩ rũkĩgu.

Nĩ gũkorũo marakara makwa nĩ makĩtie mwaki Ũrĩa ũgaacina o nginya ituri-inĩ cia Mbĩrĩra, Na ũgaacina thĩ na maciaro mayo Na ũcine mĩthingi ya irĩma.

Nĩ ngaaingĩhia mathĩna mao; Na hũthĩre mĩguĩ yakwa kũmerekera.

Nĩ magaathirũo nĩ hinya nĩ ũndũ wa ng’aragu Na manyarirũo nĩ mũrimũ wa kũhiũha mwĩrĩ o hamwe na mwanangĩko mũũru. Nĩ ngaamatũmĩra magego ma nyamũ cia gĩthaka Na nyoka irĩ thumu iria ithiagĩra rũkũngũ-inĩ.

Rũhiũ rwa njora nĩ rũkaaniina ciana ciao nja; Nakuo thĩinĩ, nĩ kĩmako gĩgaakorũo kuo Harĩ mwanake na mũirĩtu, Kaana kanini o hamwe na mũthuri ũrĩ na mbuĩ.

Nĩ ingĩoigĩte ũũ: “Nĩ ngaamahurunja; Nĩ ngaatũma mariganĩre gatagatĩ-inĩ ka andũ,”

No nĩ ndetigĩrire ũrĩa thũ ikuuga, Tondũ thũ ciahota kũnyita ũrĩa gũtarĩ. Ciahota kuuga ũũ: “Hinya witũ nĩguo ũtooranĩtie; Yahweh tiwe wĩkĩte ũũ wothe.”

Nĩ gũkorũo o nĩ rũrĩrĩ rũtarĩ na wĩcirio, Na gũtirĩ mũndũ ũrĩ na ũtaũku gatagatĩ-inĩ kao.

Na arĩ korũo nĩ ogĩ! No mecũranie ũhoro ũcio. No mecirie ũhoro wĩgiĩ moimĩrĩro mao.

Mũndũ ũmwe angĩhota atĩa kũingatithia andũ 1,000, Na andũ erĩ matũme andũ 10,000 more? No gũkorirũo Rwaro Rwao rwa Ihiga nĩ amendetie Yahweh akorũo amaneanĩte.

Nĩ gũkorũo rwaro rwao rwa ihiga rũtitariĩ ta Rwaro Rwitũ rwa Ihiga, O na thũ citũ nĩ itaũkĩirũo nĩ ũndũ ũcio.

Nĩ gũkorũo mĩthabibũ yao nĩ ya kuuma harĩ mĩthabibũ ya Sodomu Na kuuma mĩgũnda ya iharũrũka-inĩ cia Gomora. Thabibũ ciao nĩ thabibũ irĩ thumu Na imanjĩka ciao cia thabibũ nĩ ndũrũ.

Ndibei yao nĩ thumu wa nyoka, Thumu mũũru wa nduĩra.

Na githĩ ũndũ ũcio ndiũigĩte handũ, Ngaũhingĩra thĩinĩ wa ikũmbĩ rĩakwa?

Kũrĩhanĩria nĩ gwakwa, o na kũherithania, Ihinda-inĩ rĩrĩa rĩtuĩtwo rĩrĩa kũgũrũ kwao gũgaatindirũka, Nĩ gũkorũo mũthenya wao wa mwanangĩko nĩ ũkuhĩrĩirie, Na maũndũ marĩa makaamakora magooka o na ihenya.’

Nĩ gũkorũo Yahweh nĩ agaaciirithia andũ ake, Na nĩ akaaiguĩra ndungata ciake tha Rĩrĩa akoona atĩ nĩ ithirĩtwo nĩ hinya, Na atĩ andũ arĩa matarĩ na ũteithio na matarĩ hinya no o tu matigarĩte.

Agaacoka oige atĩrĩ, ‘Irĩ ha ihoti ciao, Rwaro rwa ihiga rũrĩa mooragĩra harĩ ruo,

Iria ciatũire irĩaga maguta ma magongona mao, Na ikanyua ndibei ya magongona mao ma ndibei? Nĩ ciĩyumĩrie imũteithie. Nĩ ituĩke handũ hanyu ha kũũrĩra.

Rĩu menyai atĩ niĩ—niĩ nĩ niĩ ũrĩa We, Na gũtirĩ ihoti ingĩ tiga niĩ. Nĩ njũraganaga, o na ngariũkania. Nĩ ndiihanagia, o na ngahonania, Gũtirĩ mũndũ ũngĩhonokania kuuma guoko-inĩ gwakwa.

Nĩ gũkorũo ndambũrũkĩtie guoko gwakwa na igũrũ, Ngehĩta ũũ: “O ta ũrĩa ndũũraga tene na tene,”

Rĩrĩa ngaanoora rũhiũ rwakwa rwa njora rũrĩa rũhenagia Na haarĩrie guoko gwakwa nĩ ũndũ wa ituĩro, Nĩ ngeerĩhĩria harĩ thũ ciakwa Na herithie arĩa mathũire.

Nĩ ngaatũma mĩguĩ yakwa ĩnyue thakame ĩrĩĩo, Na rũhiũ rwakwa rwa njora rũrĩe nyama cia mwĩrĩ, Thakame ya arĩa moragĩtwo na arĩa matahĩtwo, Na mĩtwe ya atongoria a thũ.’

Inyuĩ ndũrĩrĩ, kenai hamwe na andũ ake, Nĩ gũkorũo nĩ akaarĩhĩria thakame ya ndungata ciake, Na erĩhĩrie harĩ thũ ciake Na akũũre bũrũri wa andũ ake.”

Nĩ ũndũ ũcio Musa agĩthiĩ na agĩcokera ciugo ciothe cia rwĩmbo rũu andũ mathikĩrĩirie, we o hamwe na Hoshea mũrũ wa Nuni

Na rĩrĩa Musa aarĩkirie kũhe Isiraeli othe ũhoro ũcio wothe,

akĩmeera atĩrĩ: “Ciugo ciothe iria ndĩramũhe ũmũthĩ irĩ mũkaana ciigei ngoro-inĩ cianyu, nĩgetha mwathage ariũ anyu magatigĩrĩra atĩ nĩ marũmĩrĩra ciugo ciothe cia Watho ũyũ

Nĩ gũkorũo ciugo icio ti cia tũhũ harĩ inyuĩ, no nĩ cia gũtũma mũtũũre muoyo, na ciugo icio no itũme mũgaatũũra ihinda iraya bũrũri-inĩ ũrĩa mũraringa Jorodani mũkawĩgwatĩre.”

Yahweh akĩarĩria Musa mũthenya o ro ũcio, akĩmwĩra atĩrĩ:

“Ambata kĩrĩma-inĩ kĩa Abarimu, Kĩrĩma kĩa Nebo, kĩrĩa kĩrĩ bũrũri-inĩ wa Moabi, kĩrĩa kĩng’etheire Jeriko, na wĩrorere bũrũri wa Kanaani ũrĩa ndĩrahe ciana cia Isiraeli ciwĩgwatĩre

Na thutha ũcio nĩ ũgũkuĩra o kũu kĩrĩma-inĩ kĩu ũkiriĩ kwambata, na ũturanĩrũo na andũ anyu, o ta ũrĩa Haruni mũrũ wa nyũkwa aakuĩrĩire Kĩrĩma-inĩ kĩa Horu na agĩturanĩrũo na andũ ao,

tondũ inyuerĩ nĩ mwaagire kwĩhokeka harĩ niĩ gatagatĩ-inĩ ga ciana cia Isiraeli maĩ-inĩ ma Meriba thĩinĩ wa Kadeshi werũ-inĩ wa Zini, tondũ nĩ mwaagire gũtũma ciana cia Isiraeli mone atĩ niĩ ndĩ mwamũre

Ũkwĩrorera bũrũri ũcio ũrĩ o haraya, no ndũkaingĩra bũrũri-inĩ ũcio ndĩrahe ciana cia Isiraeli. (**rora rĩtwa rĩrĩa rĩandĩkĩtwo ibuku-inĩ rĩa Kĩhibirania**)”