Gũcokerithia Maathani 31
Musa agĩcoka agĩthiĩ akĩaria ciugo ici kũrĩ andũ othe a Isiraeli,
akĩmeera ũũ: “Ũmũthĩ ũyũ ndĩ na mĩaka 120. Ndigũthiĩ na mbere kũmũtongoria, nĩ gũkorũo Yahweh anjĩrĩte atĩrĩ, ‘Ndũkũringa rũũĩ rũrũ rwa Jorodani.’
Yahweh Kĩhoti waku nĩwe ũraringa arĩ mbere yaku, na we mwene nĩ ekũniina ndũrĩrĩ ici irĩ mbere yaku, nawe nĩ ũgũcingata. Joshua nĩwe ũkũmũtongoria mũkĩringa, o ta ũrĩa Yahweh oigĩte
Yahweh akaameka o ta ũrĩa eekire Sihoni na Ogu, athamaki a Aamori, na mabũrũri mao rĩrĩa aamaniinire
Yahweh nĩ akaamatooria amũhootanĩre, na mwagĩrĩirũo gũkaameka kũringana na maathani mothe marĩa ndĩmũheete
Gĩai na ũmĩrĩru na mũgĩe na hinya. Ndũgetigĩre kana ũmake ũrĩ mbere yao, nĩ gũkorũo Yahweh Kĩhoti waku nĩwe ũrathiĩ arĩ hamwe nawe. Ndagagũtirika o na kana agũtiganĩrie.”
Musa agĩcoka agĩta Joshua akĩmwĩra ũũ andũ othe a Isiraeli meroreire: “Gĩa na ũmĩrĩru na ũgĩe na hinya, nĩ gũkorũo nĩwe ũgaakinyia andũ aya bũrũri-inĩ ũrĩa Yahweh eehĩtire harĩ maithe mao ma tene atĩ nĩ akaamahe, na nĩ ũkaaũheana kũrĩ o ũtuĩke igai rĩao
Yahweh nĩwe ũrathiĩ agũtongoretie, na nĩ egũthiĩ na mbere gũkorũo hamwe nawe. Ndagagũtirika o na kana agũtiganĩrie. Ndũgetigĩre kana ũmake.”
Musa agĩcoka akĩandĩka Watho ũcio na akĩũneana kũrĩ athĩnjĩri-Yahweh Alawii, arĩa maakuaga ithandũkũ rĩa kĩrĩkanĩro kĩa Yahweh, na kũrĩ athuri othe a Isiraeli
Musa akĩmaatha akĩmeera ũũ: “O thutha wa mĩaka mũgwanja, ihinda-inĩ rĩrĩa rĩtuĩtwo mwaka-inĩ wa kũrekanĩra, hĩndĩ ya Gĩathĩ gĩa Ithũnũ,
rĩrĩa andũ othe a Isiraeli mathiĩte mbere ya Yahweh Kĩhoti waku marĩ handũ harĩa agaathuura, nĩ mwagĩrĩirũo gũthoma Watho ũyũ nĩguo Isiraeli othe maũigue
Cokanagĩrĩriai andũ, arũme, andũ-a-nja, ciana, o hamwe na mũndũ wa kũngĩ ũrĩa ũikaraga thĩinĩ wa matũũra manyu, nĩguo magathikĩrĩria na makeruta ũhoro wĩgiĩ Yahweh Kĩhoti wanyu na makamwĩtigĩra na magatigĩrĩra atĩ nĩ mahingia ciugo ciothe cia Watho ũyũ
Nao ariũ ao arĩa matoĩ Watho ũyũ nĩ magaathikagĩrĩria na makeruta gwĩtigĩra Yahweh Kĩhoti wanyu matukũ-inĩ mothe marĩa mũgaatũũra bũrũri-inĩ ũrĩa mũraringa Jorodani mũkawĩgwatĩre.”
Yahweh agĩcoka akĩra Musa ũũ: “Atĩrĩrĩ, ihinda rĩaku rĩa gũkua nĩ rĩkuhĩrĩirie. Ĩta Joshua, na mũthiĩ mũrũgame hema-inĩ ya gũtũnganwo, nĩgetha nyamũre Joshua.” Nĩ ũndũ ũcio Musa na Joshua magĩthiĩ makĩrũgama hema-inĩ ya gũtũnganwo
Nake Yahweh akiumĩra hema-inĩ ĩyo arĩ gĩtugĩ-inĩ kĩa itu, na gĩtugĩ kĩu kĩa itu gĩkĩrũgama mũromo-inĩ wa hema ĩyo.
Na rĩrĩ, Yahweh akĩra Musa ũũ: “Atĩrĩrĩ, ũrĩ hakuhĩ gũkua, na andũ aya nĩ mekwambĩrĩria kũhũũra ũmaraya wa kĩĩroho na ihoti ng’eni iria igaakorũo imathiũrũrũkĩirie bũrũri-inĩ ũrĩa marathiĩ. Nĩ makaandiganĩria na mage kũhingia kĩrĩkanĩro gĩakwa kĩrĩa ndĩkanĩire nao
Hĩndĩ ĩyo marakara makwa nĩ makaamarĩrĩmbũkĩra, na nĩ ngaamatiganĩria na ndĩmahithe ũthiũ wakwa o nginya maniinwo. Na thutha wa mathĩna na mĩtangĩko mĩingĩ kũmakora, nĩ makoiga atĩrĩ, ‘Na githĩ mathĩna maya matitũkorete tondũ Kĩhoti witũ ndarĩ gatagatĩ-inĩ gaitũ?’
No mũthenya ũcio ngaaikara hithĩte ũthiũ wakwa nĩ ũndũ wa ũũru ũrĩa wothe mekĩte na njĩra ya kũrũmĩrĩra ihoti ingĩ.
“Na rĩrĩ, mwĩyandĩkĩrei rwĩmbo rũrũ na mũrũrute ciana cia Isiraeli. Marutei rwĩmbo rũrũ nĩguo rũtuĩke mũira wakwa harĩ ciana cia Isiraeli
Rĩrĩa ngaamakinyia bũrũri ũrĩa ndehĩtire ũhoro waguo harĩ maithe mao ma tene—bũrũri ũiyũire iria na ũũkĩ—nao marĩe maiganie na magaacĩre, nĩ makaarũmĩrĩra ihoti ingĩ na macitungatĩre na manjagĩre gĩtĩo na mage kũhingia kĩrĩkanĩro gĩakwa
Rĩrĩa magaakorũo nĩ mathĩna na mĩtangĩko mĩingĩ, rwĩmbo rũrũ rũgaatuĩka ũira kũrĩ o (tondũ njiarũa ciao itiagĩrĩirũo kũriganĩrũo nĩruo), nĩ gũkorũo nĩ ndĩkĩtie kũmenya methugunda marĩa mathugundĩte o na mbere ya kũmakinyia bũrũri-inĩ ũcio ndĩhĩtĩte ũhoro waguo.”
Nĩ ũndũ ũcio Musa akĩandĩka rwĩmbo rũu mũthenya ũcio na akĩrũruta ciana cia Isiraeli.
Agĩcoka akĩamũra Joshua mũrũ wa Nuni akĩmwĩra ũũ: “Gĩa na ũmĩrĩru na ũgĩe na hinya, nĩ gũkorũo nĩwe ũgaakinyia ciana cia Isiraeli bũrũri-inĩ ũrĩa ndehĩtire kũrĩ o atĩ nĩ ngaamahe, nĩ ngũthiĩ na mbere gũkorũo ndĩ hamwe nawe.”
Na rĩrĩa Musa arĩkirie kwandĩka ciugo ciothe cia Watho ũcio ibuku-inĩ,
Musa agĩatha Alawii arĩa maakuaga ithandũkũ rĩa kĩrĩkanĩro kĩa Yahweh, akĩmeera atĩrĩ:
“Oyai ibuku rĩrĩ rĩa Watho mũrĩige mwena-inĩ wa ithandũkũ rĩa kĩrĩkanĩro kĩa Yahweh Kĩhoti wanyu, na rĩrĩkoragwo hau rĩrĩ mũira harĩ inyuĩ
Nĩ gũkorũo niĩ mwene nĩ njũĩ ũrĩa mũrĩ aremi na ang’athia. Angĩkorũo mũkoretwo mũrĩ aremi ũguo kwerekera Yahweh ndĩ o muoyo-rĩ, na githĩ mũtigũgĩkĩrĩrĩria o kũrema wona ndakua
Cokanĩrĩriai athuri othe a mĩhĩrĩga yanyu na anene anyu, nĩguo njarie ciugo ici mathikĩrĩirie, na nĩ ngwĩta igũrũ na thĩ ituĩke aira harĩ o
Nĩ gũkorũo nĩ njũĩ wega atĩ thutha wakwa gũkua nĩ mũkaarema na mwehere njĩra-inĩ ĩrĩa ndĩmwathĩte. Na hatarĩ nganja nĩ mũgaakorũo nĩ mathĩna marigĩrĩrio-inĩ ma matukũ, tondũ nĩ mũgeeka maũndũ marĩa matagĩrĩire maitho-inĩ ma Yahweh na nĩ mũkaamũrakaria kũgerera mawĩra ma moko manyu.”
Thutha ũcio Musa agĩcokera ciugo ici cia rwĩmbo rũu, kuuma kĩambĩrĩria nginya mũico kĩũngano gĩothe kĩa Isiraeli gĩthikĩrĩirie: