Gũcokerithia Maathani 5
Ningĩ Musa agĩta Isiraeli othe akĩmeera ũũ: “Inyuĩ Isiraeli, thikĩrĩriai mawatho na matuĩro ma ciira marĩa ndĩramũmenyithia ũmũthĩ, na no mũhaka mũmeerute na mũmarũmagĩrĩre na kinyi
Yahweh Kĩhoti witũ nĩ aathondekire kĩrĩkanĩro hamwe na ithuĩ tũrĩ Horebu
Yahweh ndaathondekire kĩrĩkanĩro kĩu hamwe na maithe maitũ ma tene, ĩndĩ aagĩthondekire hamwe na ithuĩ, ithuothe aya tũrĩ muoyo ũmũthĩ
Yahweh aaririe na inyuĩ ũthiũ kwa ũthiũ kĩrĩma-inĩ, kuuma mwaki-inĩ
Hĩndĩ ĩyo niĩ ndaarũgamĩte gatagatĩ kanyu na Yahweh nĩgetha ndĩmũkinyĩrie uuge wa Yahweh, tondũ nĩ mwetigagĩra nĩ ũndũ wa mwaki mũkĩaga kwambata kĩrĩma-inĩ. Agĩkiuga ũũ:
“‘Niĩ nĩ niĩ Yahweh Kĩhoti waku, ũrĩa wakũrutire bũrũri wa Misiri, kuuma nyũmba-inĩ ya ũkombo
Ndũkanagĩe na ihoti ingĩ tiga niĩ.
“‘Ndũkanethondekere mũhianano wa gwacũhio kana mũhianĩre wa kĩndũ o gĩothe kĩrĩ kũrĩa igũrũ kana gũkũ thĩ kana thĩinĩ wa maĩ marĩa marĩ rungu rwa thĩ
Ndũkanacinamĩrĩre kana ũheenererio gũcitungatĩra, nĩ gũkorũo niĩ Yahweh Kĩhoti waku, ndĩ Kĩhoti wĩ ũiru, na ngaherithia ciana nĩ ũndũ wa mahĩtia ma maithe, nginya rũciaro rwa gatatũ na rwa kana rwa arĩa mathũire,
ĩndĩ ngonania wendo mwĩhokeku nginya harĩ rũciaro rwa ngiri rwa arĩa manyendete na marũmagĩrĩra maathani makwa.
“‘Ndũkanahũthĩre rĩĩtwa rĩa Yahweh Kĩhoti waku tũhũ, nĩ gũkorũo Yahweh ndakaaga kũherithia ũrĩa ũhũthagĩra rĩĩtwa rĩake tũhũ.
“‘Rũmagia mũthenya wa Thabatũ na ũwamũrage, o ta ũrĩa Yahweh Kĩhoti waku agwathĩte
Ũrĩrutaga wĩra waku wothe thikũ ithathatũ,
no mũthenya wa mũgwanja nĩ Thabatũ ya Yahweh Kĩhoti waku. Ndwagĩrĩirũo kũruta wĩra o na ũrĩkũ, wee kana mũrũguo kana mwarĩguo kana ngombo yaku ya mũndũrũme kana ngombo yaku ya mũirĩtu kana ndegwa yaku kana ndigiri yaku kana nyamũ o yothe yaku ya mũciĩ o na kana mũndũ wa kũngĩ ũrĩa ũrĩ thĩinĩ wa matũũra manyu, nĩgetha ngombo yaku ya mũndũrũme na ngombo yaku ya mũirĩtu ikahurũkaga o tawe
Ririkana atĩ warĩ ngombo bũrũri-inĩ wa Misiri na atĩ Yahweh Kĩhoti waku aakũrutire kuo na guoko kũrĩ hinya na guoko gũtambũrũkie. Nĩkĩo Yahweh Kĩhoti waku aagwathire ũrũmagie mũthenya wa Thabatũ.
“‘Tĩaga thoguo na nyũkwa, o ta ũrĩa Yahweh Kĩhoti waku agwathĩte, nĩgetha ũtũũre ihinda iraya na ũgaacĩre bũrũri-inĩ ũrĩa Yahweh Kĩhoti waku arakũhe.
“‘Ndũkanoragane.
“‘Na ndũkanatharie.
“‘Na ndũkanaiye.
“‘Na ndũkanarute ũira wa maheeni wĩgiĩ mũndũ ũngĩ.
“‘Na ndũkanerirĩrie mũtumia wa mũndũ ũngĩ. Na ndũkanerirĩrie nyũmba ya mũndũ ũngĩ kana mũgũnda wake kana ngombo yake ya mũndũrũme kana ngombo yake ya mũirĩtu kana ndegwa yake kana ndigiri yake kana kĩndũ kĩngĩ o gĩothe gĩake.’
“Yahweh aaheire kĩũngano kĩanyu gĩothe maathani macio kĩrĩma-inĩ, kuuma thĩinĩ wa mwaki, itu, na nduma ndumanu, na mũgambo mũnene, na ndarĩ ũndũ ũngĩ oongereire; agĩcoka akĩmaandĩka ihengere-inĩ igĩrĩ cia mahiga na akĩĩnengera.
“No rĩrĩa mwaiguire mũgambo kuuma nduma-inĩ ĩyo rĩrĩa kĩrĩma kĩu gĩaakanaga mwaki, o rĩo atongoria othe a mĩhĩrĩga yanyu na athuri magĩũka kũrĩ niĩ
Mũkĩnjĩra ũũ, ‘Atĩrĩrĩ, Yahweh Kĩhoti witũ nĩ atuonia riri wake na ũnene wake, na nĩ twaigua mũgambo wake kuuma mwaki-inĩ. Ũmũthĩ nĩ tuona atĩ Kĩhoti no arie na mũndũ, na mũndũ ũcio athiĩ na mbere gũtũũra muoyo
Rĩu-rĩ, tũgũgĩkua nĩkĩ? Nĩ gũkorũo mwaki ũyũ mũnene ũũ no ũtũcine. Tũngĩthiĩ na mbere kũigua mũgambo wa Yahweh Kĩhoti witũ, hatarĩ nganja no tũgũkua
Tondũ rĩrĩ, nũũ harĩ arĩa othe marĩ mwĩrĩ wa nyama wanaigua mũgambo wa Kĩhoti ũrĩa ũtũũraga muoyo ũkĩaria kuuma mwaki-inĩ ta ũrĩa twaigua na agathiĩ na mbere gũtũũra muoyo
Wee nĩwe wagĩrĩirũo gũkuhĩrĩria ũthiĩ ũigue ũrĩa wothe Yahweh Kĩhoti witũ ekuuga, na nĩwe ũgũtwĩra ũrĩa wothe Yahweh Kĩhoti witũ egũkwĩra, na ithuĩ nĩ tũgũthikĩrĩria na twĩke guo.’
“Nĩ ũndũ ũcio Yahweh akĩigua ciugo icio mwanjĩrire, na Yahweh akĩnjĩra ũũ, ‘Nĩ ndaigua ciugo iria andũ aya makwĩra. Ũrĩa wothe moiga nĩ wega
Na arĩ korũo hingo ciothe no makoragwo na ngoro ya kũnjĩtigĩra na kũrũmagia maathani makwa mothe; maũndũ mao na ma ariũ ao no mathiĩ wega tene na tene
Thiĩ ũmeere ũũ: “Cokai hema-inĩ cianyu.”
Ĩndĩ wee wagĩrĩirũo gũikara haha na niĩ, nĩguo ngũmenyithie maathani mothe, mawatho, na matuĩro ma ciira marĩa wagĩrĩirũo kũmaruta na marĩa magĩrĩirũo kũrũmĩrĩra bũrũri-inĩ ũrĩa ndĩramahe mawĩgwatĩre.’
Rĩu inyuĩ mwagĩrĩirũo kwĩmenyerera mwĩkage o ta ũrĩa Yahweh Kĩhoti wanyu amwathĩte. Mũtiagĩrĩirũo kũrora mwena wa ũrĩo kana wa ũmotho
Mwagĩrĩirũo gũthiaga na njĩra iria ciothe Yahweh Kĩhoti wanyu amwathĩte, nĩgetha mũtũũre muoyo na mũgaacĩre na mũikare matukũ maingĩ bũrũri-inĩ ũcio mũkwĩgwatĩra.