Gũcokerithia Maathani 6

“Na rĩrĩ, maya nĩmo maathani, mawatho, na matuĩro ma ciira marĩa Yahweh Kĩhoti wanyu aheanĩte mũrutwo, nĩgetha mũmarũmagĩrĩre mwaringa mũrĩmo ũrĩa ũngĩ bũrũri-inĩ ũcio mũkwĩgwatĩra,

nĩguo wĩtigagĩre Yahweh Kĩhoti waku na ũrũmagie mawatho make mothe na maathani make marĩa ndĩragwatha—wee na mũrũguo o na mũcũkũrũ waku—matukũ mothe ma muoyo waku, nĩguo ũtũũre ihinda iraya

Inyuĩ Isiraeli, no mũhaka mũthikĩrĩrie na mũmarũmagĩrĩre na kinyi nĩguo mũkaagaacĩra na mũingĩhe biũ bũrũri-inĩ ũcio ũiyũire iria na ũũkĩ, o ta ũrĩa Yahweh Kĩhoti wa maithe manyu ma tene amwĩrĩire.

“Thikĩrĩria wee Isiraeli: Yahweh Kĩhoti witũ nowe wiki Yahweh

No mũhaka wende Yahweh Kĩhoti waku na ngoro yaku yothe na muoyo waku wothe na hinya waku wothe

Ciugo ici ndĩragwatha ũmũthĩ no mũhaka cikoragwo ngoro-inĩ yaku,

na no mũhaka ũcirutage ciana ciaku na ũkaragia ũhoro wacio rĩrĩa ũikarĩte thĩ gwaku nyũmba na rĩrĩa ũrathiĩ na njĩra na rĩrĩa ũkomete na rĩrĩa ũũkĩrĩte

Wagĩrĩirũo gũcioherera guoko-inĩ gwaku irĩ kĩririkania, na ũmekagĩre thiithi waku

Wagĩrĩirũo gũciandĩka itugĩ-inĩ cia mũrango wa nyũmba yaku na ihingo-inĩ ciaku.

“Rĩrĩa Yahweh Kĩhoti waku agaagũkinyia bũrũri-inĩ ũrĩa eehĩtire harĩ maithe manyu ma tene Iburahimu, Isaaka, na Jakubu atĩ nĩ agaakũhe—matũũra manene na mega marĩa wee mwene ũtaakire-rĩ,

nyũmba ciyũire indo njega cia mĩthemba yothe iria wee ũtaarutĩire wĩra, ithima cia kwenjwo iria wee ũteenjire, mĩgũnda ya mĩthabibũ na mĩtĩ ya mĩtamaiyũ ĩrĩa wee ũtaahandire—na ũrĩe ũiganie,

ũkeemenyerera ndũkanariganĩrũo nĩ Yahweh, ũrĩa wakũrutire bũrũri wa Misiri, kuuma nyũmba-inĩ ya ũkombo

Wagĩrĩirũo gwĩtigĩra Yahweh Kĩhoti waku, na nĩwe wagĩrĩirũo gũtungatĩra, na wagĩrĩirũo kwĩhĩta na rĩĩtwa rĩake

Mũtikanarũmĩrĩre ihoti ingĩ, hoti o yothe ya ikundi cia andũ arĩa mamũthiũrũrũkĩirie,

nĩ gũkorũo Yahweh Kĩhoti waku, o we ũcio ũrĩ gatagatĩ-inĩ gaku nĩ Kĩhoti wĩ ũiru. Kwaga ũguo, marakara ma Yahweh Kĩhoti waku nĩ magaakũrĩrĩmbũkĩra na akũniine wehere thĩinĩ wa thĩ.

“Mũtikanagerie Yahweh Kĩhoti wanyu ta ũrĩa mwamũgeririe mũrĩ Masa

Mwagĩrĩirũo kũrũmagĩrĩra na kĩyo maathani ma Yahweh Kĩhoti wanyu na iririkania ciake na mawatho make marĩa amwathĩte mũrũmagĩrĩre

No mũhaka wĩkage ũndũ ũrĩa wagĩrĩire na mwega maitho-inĩ ma Yahweh, nĩgetha ũgaacĩre na nĩguo ũtonye na wĩgwatĩre bũrũri ũcio mwega ũrĩa Yahweh eerĩire maithe manyu ma tene kũgerera mwĩhĩtwa,

na njĩra ya kũingata thũ ciaku ciothe ciehere mbere yaku, o ta ũrĩa Yahweh eranĩire.

“Na matukũ-inĩ ma thutha mũrũguo angĩgakũũria ũũ, ‘Iririkania ici na mawatho maya na matuĩro maya ma ciira Yahweh Kĩhoti witũ amwathĩte mũrũmagĩrĩre nĩ cia kĩĩ?’

wagĩrĩirũo kwĩra mũrũguo atĩrĩ, ‘Twatuĩkire ngombo cia Firauni bũrũri-inĩ wa Misiri, no Yahweh agĩtũruta kũu Misiri kũgerera guoko kũrĩ hinya

Nĩ ũndũ ũcio Yahweh agĩtũma imenyithia na ciama nene na cia kũniinana kũu Misiri, kũrĩ Firauni na kũrĩ andũ othe a nyũmba yake tũkĩĩyonagĩra na maitho

Na agĩtũruta kuo nĩgetha atũrehe gũkũ atũhe bũrũri ũyũ ũrĩa eerĩire maithe maitũ ma tene kũgerera mwĩhĩtwa

Yahweh agĩcoka agĩtwatha tũrũmagĩrĩre mawatho maya mothe na twĩtigagĩre Yahweh Kĩhoti witũ nĩgetha maũndũ maitũ mathiage wega hingo ciothe, nĩguo tũthiĩ na mbere gũtũũra muoyo, o ta ũrĩa tũtariĩ ũmũthĩ

Na tũngĩrũmĩrĩra maathani maya mothe na kinyi nĩgetha twathĩkĩre Yahweh Kĩhoti witũ o ta ũrĩa atwathĩte twĩke, nĩ tũrĩkoragwo tũrĩ athingu.’