Habakuku 1

Ĩno nĩ ndũmĩrĩri nditũ ĩrĩa Habakuku ũrĩa mũnabii aamũkĩrire thĩinĩ wa kĩoneki:

Wũũii Yahweh, ngũgũkaĩra nginya rĩ ngĩkũhoya ũteithio no ũkaga kũnjigua? Ngũgũkaĩra nginya rĩ ũndeithie kuumana na ũhinya, no ũkaga kuoya ikinya?

Nĩ kĩĩ gĩtũmaga ũreke ndĩyonere maũndũ moru? Na nĩ kĩĩ gĩtũmaga ũkirĩrĩrie ũhinyanĩrĩria? Nĩ kĩĩ gĩtũmaga mwanangĩko na ũhinya ikorũo mbere yakwa? Na nĩ kĩĩ gĩtũmaga ngucanio na ngũĩ cingĩhe?

Nĩ ũndũ ũcio, watho nĩ wagĩte hinya, Na matua ma cira marũngĩrĩru gũtirĩ hĩndĩ mahingagio. Nĩ gũkorũo andũ athingu mathiũrũrũkĩirio nĩ andũ aganu; Nĩkĩo matua ma cira mogomagio.

“Ta cũthĩrĩriai gatagatĩ-inĩ ka ndũrĩrĩ na mwĩrorere! Rorai mũgegete na mũmake; Nĩ gũkorũo harĩ ũndũ ũgeekĩka matukũ-inĩ manyu Ũrĩa mũtagetĩkia ũhoro waguo o na mwerũo.

Nĩ gũkorũo nĩ ngwarahũra Akalidei, Rũrĩrĩ rũtarĩ tha na rwĩkaga maũndũ rũtambĩte gwĩciria. Matuĩkanagĩria icigo nene thĩinĩ wa thĩ Nĩguo megwatĩre mĩciĩ ĩtarĩ yao.

Nĩ andũ a gwĩtigĩrũo na a kũmakania. Mahandaga matuĩro mao ene ma cira o na wathani.

Mbarathi ciao irĩ ihenya gũkĩra ngarĩ, Nĩ arũrũ gũkĩra njũi ũtukũ. Mbarathi ciao cia mbaara itengʼeraga irorete mbere; Mbarathi ciao ciũkaga ciumĩte kũndũ kũraya. Maharũrũkaga o ta nderi ikĩhanyũka ithiĩ ikarĩe.

Othe mokaga mehotorete gwĩka maũndũ ma ũhinya. Mothiũ mao marĩ hamwe matariĩ ta rũhuho rwa mwena wa irathĩro, Matahaga andũ mĩgwate o ta mũthanga.

Manyũrũragia athamaki Na magathekerera anene. Mathekagĩrĩra handũ o hothe harĩ na ũgitĩri; Mathondekaga hĩba ya tĩri na magataha handũ hau.

Magacoka magathiĩ na mbere ta rũhuho na magatuĩkanĩria kuo, No nĩ magaakorũo na mahĩtia, Tondũ moigaga atĩ hinya wao uumanaga na eloah wao.

Wũũii Yahweh, na githĩ wee ndũtũire kuuma tene na tene? Wee Kĩhoti wakwa, Ũrĩa Wakwa Mwamũre, ndũkuaga. Wũũii Yahweh, nĩ wamaamũrire nĩguo mahingie ituĩro; Wee Rwaro Rwakwa rwa Ihiga, nĩ wamaigire nĩ ũndũ wa kũherithania.

Maitho maku nĩ makembu mũno matingĩĩrorera ũndũ mũũru, Na ndũngĩkirĩrĩria waganu. Nĩ kĩĩ gĩgĩtũmaga ũkirĩrĩrie andũ arĩa aregenyũki akunyanĩri? Na ũgakira rĩrĩa mũndũ mwaganu ameria mũndũ mũthingu kũmũkĩra?

Nĩ kĩĩ gĩtũmaga ũtue mũndũ o ta thamaki cia iria-inĩ, O ta ciũmbe iria itambaga thĩ, iria itakoragwo na mũndũ wa gũciatha?

Icio ciothe acigucagia na ndwano. Acinyitaga na neti yake ya gũtega, Na agacicokanĩrĩria neti-inĩ yake ya gũtega thamaki. Nĩkĩo akenaga mũno.

Nĩkĩo arutagĩra neti yake ya gũtega magongona Na akarutĩra neti yake ya gũtega thamaki magongona; Nĩ gũkorũo nĩcio itũmaga rwĩga rwake rũkorũo rũrĩ rũnoru Na irio ciake ikorũo irĩ njega.

Hihi egũgĩikara akĩonoragia neti yake ya gũtega? Hihi egũthiĩ na mbere kũũraga ndũrĩrĩ ategũcicaĩra?