Habakuku 2

Niĩ-rĩ, ngũthiĩ na mbere kũrũgama handũ hakwa ha kũrangĩra, Na ndũgame igũrũ rĩa rũirigo. Ngũikara ndĩiguĩte nĩgetha nyone ũrĩa ekuuga kũgerera harĩ niĩ Na ũrĩa ngũcokia ndarũngwo.

Nake Yahweh akĩnjokeria akĩnjĩra atĩrĩ: “Andĩka kĩoneki gĩkĩ, ũkĩandĩke wega ihengere-inĩ, Nĩgetha mũndũ ũrĩa ũragĩthoma na kayũ eke ũguo na njĩra hũthũ.

Tondũ kĩoneki kĩu nĩ kĩa ihinda rĩrĩa rĩtuĩtwo, Na nĩ kĩrahiũha kĩerekeire mũthia wakĩo, na gĩtigaatuĩka kĩa maheeni. O na kĩngĩikara, ikara ũkĩĩrĩgĩrĩire! Tondũ hatarĩ nganja nĩ gĩkaahinga. Gĩtigaacererũo!

Rora mũndũ ũrĩa mwĩtĩi; Ti mũrũngĩrĩru thĩinĩ wake. Ĩndĩ mũndũ ũrĩa mũthingu agaatũũra nĩ ũndũ wa gwĩtĩkia gwake.

Ti itherũ, tondũ ndibei nĩ ĩtũmaga mũndũ aheeneke, Mũndũ ũrĩa mwĩtĩi ndagaakinyĩra muoroto wake. Anenehagia mĩĩto yake o ta Mbĩrĩra; Atariĩ ta gĩkuũ na ndangĩigania. Aikaraga agĩcokanagĩrĩria ndũrĩrĩ ciothe Na akeyũnganĩria ikundi ciothe cia andũ.

Githĩ acio othe matikaaria na thimo, ciugo irĩ na kĩriga, na ndaĩ kũmwerekera? Makooiga atĩrĩ: ‘Kaĩ mũndũ ũrĩa wĩyũnganagĩria indo itarĩ ciake Na agatũma thiirĩ wake ũnenehe makĩria arĩ na haaro-ĩ! Egũtũũra ekaga ũguo nginya rĩ?

Githĩ arĩa magũkombithĩtie matikaarahũka o rĩmwe? Magookĩra na magũthukie na hinya mũno, Na nĩ ũgaatuĩka kĩndũ gĩa gũtahwo nĩo.

Tondũ nĩ watahire ndũrĩrĩ nyingĩ, Ikundi icio ingĩ ciothe cia andũ nĩ igaagũtaha, Nĩ ũndũ wa gũita thakame ya andũ Na ũhinya waku kwerekera thĩ, Matũũra na arĩa maikaraga thĩinĩ wamo.

Kaĩ mũndũ ũrĩa ũgĩaga na uumithio wa ũũru nĩ ũndũ wa nyũmba yake, Nĩgetha aige gĩtara gĩake handũ igũrũ, Nĩguo etheme kũnyitwo nĩ thĩna, arĩ na haaro-ĩ!

Nĩ ũthugundĩte ũndũ wa gũconorithia kwerekera nyũmba yaku. Wee mwene nĩwe wĩĩhĩirie nĩ ũndũ wa kũniina ikundi nyingĩ cia andũ.

Nĩ gũkorũo ihiga nĩ rĩgaakaya rĩrĩ rũthingo-inĩ, Naguo mũratho nĩ ũkaarĩcokeria ũrĩ nyũmba igũrũ.

Kaĩ mũndũ ũrĩa wakaga itũũra kũgerera ũiti wa thakame arĩ na haaro-ĩ, O ũcio ũthondekaga taũni kũgerera wagi wa ũthingu.

Atĩrĩrĩ, githĩ ti Yahweh mũnene wa ita ũgaatũma ikundi cia andũ irute wĩra na kĩyo nĩguo ciakĩrĩrie mwaki, Na atũme ndũrĩrĩ ciĩnogie o tũhũ?

Nĩ gũkorũo thĩ nĩ ĩkaaiyũrũo nĩ ũmenyo wĩgiĩ riri wa Yahweh O ta ũrĩa maĩ mahumbagĩra iria.

Kaĩ mũndũ ũrĩa ũheaga arata ake kĩndũ gĩa kũnyua, Akongerera mangʼũrĩ na marakara, agatũma marĩĩo, Nĩguo one njaga yao, arĩ na haaro-ĩ!

Ũkaaiyũrũo nĩ gĩconoko handũ ha riri. O nawe nyua na ũguũrie ũhoro waku wa gũkorũo ũtarĩ mũruu. Gĩkombe kĩrĩa kĩrĩ guoko-inĩ kwa ũrĩo kwa Yahweh nĩ gĩgaagũkinyĩrĩra, Na riri waku nĩ ũkaahumbĩrũo nĩ gĩconoko;

Nĩ gũkorũo ũhinya ũrĩa wĩkĩtwo Lebanoni nĩ ũgaakũhumbĩra, Na mwanangĩko ũrĩa watũmire nyamũ imake nĩ ũgaagũkora, Nĩ ũndũ wa gũita thakame ya andũ Na ũhinya waku kwerekera thĩ, Matũũra na arĩa maikaraga thĩinĩ wamo.

Mũhianano wa gwacũhio-rĩ, ũkoragwo na ũguni ũrĩkũ Mũthondeki waguo arĩkia kũwacũhia? Mũhianano wa cuma, o na mũrutani wa maheeni, O na angĩkorũo mũthondeki waguo nĩ awĩhokaga, Agathondeka mĩhianano itarĩ kĩene iria itangĩhota kwaria?

Mũndũ ũrĩa wĩraga gĩcunjĩ kĩa mũtĩ “Arahũka!” Kana akera ihiga rĩtangĩhota kwaria, “Ũkĩra! Tũrute!” Kaĩ arĩ na haaro-ĩ! Oneei, mũhianano ũcio ũhumbĩrĩtwo na thahabu na betha, Na ndũkoragwo na mĩhũmũ o na hanini thĩinĩ waguo.

No Yahweh arĩ thĩinĩ wa hekarũ yake nyamũre. Thĩ yothe nĩ ĩkire ĩrĩ mbere yake!’”