Habakuku 3
Ihoya rĩa mũnabii Habakuku, arĩ kũu Shigionothu:
Wũũii Yahweh, nĩ njiguĩte ũhoro waku, ngagĩtigĩra. Rurumũkia wĩra waku gatagatĩ-inĩ ka mĩaka ĩyo! Menyithania ũhoro waguo gatagatĩ-inĩ ka mĩaka ĩyo. Ũroririkana kũiguanĩra tha hĩndĩ ya mĩtangĩko.
Eloah ookire oimĩte Temani, Ũrĩa Mwamũre agĩũka oimĩte Kĩrĩma gĩa Parani. (Sela) Riri wake ũkĩhumbĩra kũrĩa igũrũ; Thĩ ĩkĩiyũra rũgooco rwake.
Ũkengu wake watariĩ ta ũtheri. Hĩa ciacomokaga kuuma guoko-inĩ gwake, Harĩa hinya wake wahithĩtwo.
Mũrimũ mũũru wathiaga ũrĩ mbere yake, Na mũrimũ wa kũhiũha mwĩrĩ ũkamuuma thutha magũrũ-inĩ make.
Aarũgamire na agĩthingithia thĩ. Aarorire, agĩtũma ndũrĩrĩ cinaine. Irĩma iria itũũraga kuuma tene nĩ ciahehenjirũo, Natuo tũthũngũri tũrĩa twa tene tũkĩinamĩrĩra. Tũcĩra twa tene nĩ twake.
Nĩ ndonire thĩna hema-inĩ cia Kushani. Itambaya cia hema cia bũrũri wa Midiani ikĩinaina.
Hihi marakara maku wee Yahweh marakana kwerekera njũũĩ? Hihi marakana kwerekera njũũĩ? Kana hihi mangʼũrĩ maku merekeirio kũrĩ iria? Nĩ gũkorũo nĩ wahaicire igũrũ rĩa mbarathi ciaku; Ngaari ciaku cia mbarathi nĩ ciahootanire.
Ũta waku nĩ mũguũrie na ũkahaarĩrio. Thanju nĩ ciĩhaarĩirie kũruta wĩra wacio kũringana na mwĩhĩtwa. (Sela) Nĩ wagayũkanirie thĩ ũkĩhũthĩra njũũĩ.
Irĩma ciakuonire ikĩĩnyogonda nĩ ruo. Mbura nene ĩgĩtuĩkanĩria bũrũri-inĩ. Kũndũ kũrĩa kũriku gũkĩrarama na mũgambo wakuo. Gũkĩambararia moko makuo na igũrũ.
Riũa na mweri ciarũgamire gĩikaro-inĩ gĩacio gĩtũũgĩru. Mĩguĩ yaku ĩgĩthiĩ o ta ũtheri. Rũheni rwa itimũ rĩaku rwarĩ rũkengu.
Watuĩkanĩirie thĩ ũrĩ na mangʼũrĩ. Ũkĩrangĩrĩria ndũrĩrĩ ũrĩ na marakara.
Woimagarire ũgĩthiĩ kũhonokia andũ aku, kũhonokia ũrĩa waku mũitĩrĩrie maguta. Ũkĩhehenja mũtongoria wa nyũmba ya ũrĩa mwaganu. Yaguũririo kuuma mũthingi-inĩ o nginya igũrũ. (Sela)
Nĩ wathecire mũtwe wa njamba ciake cia ita na matharaita make we mwene Rĩrĩa ciahithũkĩire nĩguo ciihurunje. Nĩ ciakenire mũno gũtambura na hitho ũrĩa mũhinyĩrĩrĩku.
Wagereire iria-inĩ na mbarathi ciaku, Ũkĩgerera maĩ-inĩ maingĩ marĩa maahũyũkaga.
Ndaiguire ũhoro ũcio ngĩinaina thĩinĩ wakwa; Ndaigua mũgambo ũcio iromo ciakwa ikĩinaina. Kũbutha gũkĩingĩra mahĩndĩ-inĩ makwa; Magũrũ makwa nĩ kũinaina maainainaga. Ĩndĩ niĩ njetagĩrĩra mũthenya ũrĩa wa mĩtangĩko ngirĩte, Tondũ nĩ ũroka kũrĩ andũ arĩa matũtharĩkagĩra.
O na gũtuĩka mũtĩ wa mũkũyũ no wage kũruta kĩro, Na mĩthabibũ yage kũruta maciaro; O na gũtuĩka mũtamaiyũ no wage gũciara, Nayo mĩgũnda yage kũruta irio; O na gũtuĩka kiugũ no kĩage rũũru, Na kwage ngʼombe ciugũ-inĩ;
Niĩ-rĩ, nĩ ndĩrĩkenaga nĩ ũndũ wa Yahweh; Ndĩrĩkenaga nĩ ũndũ wa Kĩhoti wa ũhonokio wakwa.
Mũthamaki Yahweh nĩwe hinya wakwa; Agaatũma magũrũ makwa mahaane ta ma thwariga Na atũme ngerere kũndũ gũtũũgĩru. _Kũrĩ mũrũgamĩrĩri; rũinwo hamwe na inanda ciakwa cia ndigi._