Hadassah 4

Rĩrĩa Moridekai aamenyire ũrĩa wothe gwekĩtwo, agĩtembũra nguo ciake na akĩĩhumba nguo ya ikũnia na akĩĩhurĩria mũhu. Agĩcoka agĩthiĩ gatagatĩ ga itũũra akĩrĩraga anĩrĩire arĩ na ruo rũingĩ

Aathiire agĩkinya o kĩhingo-inĩ kĩa mũthamaki, tondũ gũtirĩ mũndũ waagĩrĩirũo kũingĩra kĩhingo kĩa mũthamaki ehumbĩte nguo ya ikũnia

Na thĩinĩ wa gĩcigo kĩrĩa gĩothe uuge wa mũthamaki na watho wake wakinyire, kwarĩ na kĩeha kĩnene mũno, hamwe na kwĩhinga kũrĩa, kĩrĩro na gũcakaya gatagatĩ-inĩ ka Ayahudi. Aingĩ ao maakomaga thĩ mehumbĩte nguo cia makũnia na mehurĩirie mũhu

Rĩrĩa ndungata cia airĩtu cia Hadassah hamwe na arũme arĩa maamũtungataga mookire makĩmwĩra ũhoro ũcio, mũtumia ũcio wa mũthamaki nĩ aathĩnĩkire mũno ngoro. Agĩcoka akĩneanĩra Moridekai nguo nĩguo ehumbe handũ ha nguo yake ya ikũnia, no Moridekai agĩcirega

Nake Hadassah agĩta Hathaka, ũmwe wa ndungata cia mũthamaki, ũrĩa aamũrĩte atungatage Hadassah, na akĩmwatha athiĩ orie Moridekai kĩrĩa gĩatũmaga eke ũguo na nĩ kĩĩ gĩathiaga na mbere.

Kwoguo Hathaka agĩthiĩ kũrĩ Moridekai kĩhaaro-inĩ kĩa mũingĩ kĩa itũũra kĩrĩa kĩarĩ mbere ya kĩhingo kĩa mũthamaki

Moridekai akĩmwĩra maũndũ mothe marĩa maamũkorete na mũigana wa mbeca iria Hamani eeranĩire nĩ ekũrĩha ciigwo kĩgĩna-inĩ kĩa mũthamaki nĩgetha Ayahudi maniinwo

Ningĩ akĩmũnengera kobĩ ya watho mwandĩke ũrĩa waheanĩtwo Shushani nĩguo maniinwo. Aagĩrĩirũo kuonia Hadassah kobĩ ĩyo na amũtaarĩrie ũhoro wa watho ũcio na amwĩre athiĩ harĩ mũthamaki agathaithane nĩguo etĩkĩrĩke, na we mwene athaithanĩrĩre andũ ao harĩ mũthamaki.

Nake Hathaka agĩcoka na akĩĩra Hadassah ũrĩa Moridekai ooigĩte

Hadassah akĩĩra Hathaka ere Moridekai ũũ:

“Ndungata ciothe cia mũthamaki o hamwe na andũ a icigo cia mũthamaki nĩ moĩ atĩ mũndũrũme kana mũndũ-wa-nja o wothe angĩtonya nja ĩrĩa nini ya mũthamaki atetĩtwo, no watho ũyũ ũmwe tu ũheanĩtwo: Agĩrĩire kũũragwo; kĩrĩa tu kĩngĩgiria oragwo nĩ angĩkorũo mũthamaki nĩ ekũmũtambũrũkĩria mũthĩgi wa thahabu. Na rĩu matukũ 30 nĩ mathiru kuuma rĩrĩa njĩrĩga gwĩtwo nĩ mũthamaki.”

Rĩrĩa Moridekai eerirũo ũrĩa Hadassah ooigĩte,

akĩĩra Hadassah ũũ: “Ndũgecirie atĩ tondũ ũrĩ thĩinĩ wa nyũmba ya mũthamaki ũrĩ na mweke wa kũhonoka gũkĩra Ayahudi arĩa angĩ othe

Nĩ gũkorũo ũngĩaga kwaria ihinda-inĩ rĩrĩ, ũteithio na ũhonokio wa Ayahudi nĩ ũkuuma kũndũ kũngĩ, no wee na nyũmba ya thoguo nĩ mũkũniinwo. Ningĩ nũũ ũĩ kana ũtuĩkĩte mũtumia wa mũthamaki nĩ ũndũ wa ihinda ta rĩrĩ?”

Nake Hadassah akĩĩra Moridekai atĩrĩ:

“Thiĩ ũcokanĩrĩrie Ayahudi othe arĩa maikaraga Shushani na mwĩhinge nĩ ũndũ wakwa. Mũtikarĩe kana mũnyue ihinda rĩa thikũ ithatũ, ũtukũ na mũthenya. O na niĩ hamwe na airĩtu arĩa mandungatagĩra nĩ tũkwĩhinga. Nĩ ngũingĩra harĩ mũthamaki, o na akorũo nĩ mũgarũ na watho, na angĩkorũo nĩ ngũkua-rĩ, nĩ ngue.”

Nĩ ũndũ ũcio Moridekai agĩthiĩ na agĩka ũrĩa wothe Hadassah aamwĩrĩte eke.