Hadassah 5

Mũthenya wa gatatũ Hadassah akĩĩhumba nguo ciake cia ũthamaki na akĩrũgama nja ĩrĩa nini ya nyũmba ya mũthamaki, ang’etheire nyũmba ya mũthamaki, nake mũthamaki aaikarĩte gĩtĩ-inĩ gĩake kĩa ũnene nyũmba-inĩ ya mũthamaki ang’etheire mũromo wayo

Rĩrĩa mũthamaki oonire Hadassah mũtumia wa mũthamaki arũgamĩte hau nja, Hadassah agĩĩtĩkĩrĩka nĩwe, na mũthamaki akĩmũtambũrũkĩria mũthĩgi wa thahabu ũrĩa aanyitĩte. Nake Hadassah agĩkuhĩrĩria na akĩhutia mũthia wa mũthĩgi ũcio.

Mũthamaki akĩmũũria ũũ: “Nĩ kĩĩ kĩũru Hadassah mũtumia wa mũthamaki? Ihoya rĩaku nĩ rĩrĩkũ? O na angĩkorũo nĩ nuthu ya ũthamaki wakwa, nĩ ũkũheo!”

Hadassah agĩcokia atĩrĩ: “Angĩkorũo mũthamaki nĩ ekuona kwagĩrĩire, mũthamaki nĩ oke marĩ hamwe na Hamani ũmũthĩ iruga-inĩ rĩrĩa haarĩrĩirie nĩ ũndũ wake.”

Nĩ ũndũ ũcio mũthamaki akĩĩra andũ ake atĩrĩ: “Ĩrai Hamani oke na ihenya, o ta ũguo Hadassah ahoya.” Kwoguo mũthamaki na Hamani magĩthiĩ iruga-inĩ rĩrĩa Hadassah aahaarĩirie.

Na rĩrĩa maanyuaga ndibei, mũthamaki akĩũria Hadassah atĩrĩ: “Nĩ ũndũ ũrĩkũ ũkwenda? Nĩ ũkũheo! Ihoya rĩaku nĩ rĩrĩkũ? O na angĩkorũo nĩ nuthu ya ũthamaki wakwa, nĩ ũkũheo!”

Hadassah akiuga: “Ũrĩa ngwenda na ihoya rĩakwa nĩ atĩ,

Angĩkorũo nĩ njĩtĩkĩrĩkĩte harĩ mũthamaki na angĩkorũo mũthamaki nĩ ekuona kwagĩrĩire kũhingia ihoya rĩakwa na gwĩka ũndũ ũrĩa ndĩrenda-rĩ, mũthamaki na Hamani nĩ moke rũciũ iruga-inĩ rĩrĩa ngaakorũo ndĩmahaarĩrĩirie; na rũciũ nĩ ngeeka ũguo mũthamaki oiga.”

Mũthenya ũcio Hamani aathiire akenete na ngoro yake ĩcanjamũkĩte mũno. No rĩrĩa Hamani oonire Moridekai kĩhingo-inĩ kĩa mũthamaki na akĩona atĩ ndanarũgama na ndanainaina nĩ ũndũ wake, Hamani akĩrakara mũno nĩ ũndũ wa Moridekai

O na kũrĩ ũguo, Hamani akĩĩgirĩrĩria na akĩinũka gwake mũciĩ. Agĩcoka agĩtũmanĩra arata ake na Zereshu mũtumia wake

Hamani akĩĩraha nĩ ũndũ wa ũtonga wake mũingĩ, ariũ ake aingĩ, na nĩ ũndũ wa ũrĩa mũthamaki aamũtũũgĩrĩtie na akamwambararia igũrũ rĩa anene na ndungata cia mũthamaki.

Hamani akĩongerera ũũ: “Makĩria ma ũguo-rĩ, tiga niĩ, gũtirĩ mũndũ ũngĩ Hadassah mũtumia wa mũthamaki etire athiĩ na mũthamaki iruga-inĩ rĩrĩa ekũhaarĩirie. O na rũciũ no njĩtĩtwo ngaakorũo hamwe nake na mũthamaki

No maũndũ macio mothe matingĩtũma njiganĩre angĩkorũo no ndĩonaga Moridekai ũrĩa Mũyahudi aikarĩte kĩhingo-inĩ kĩa mũthamaki.”

Kwoguo Zereshu mũtumia wake na arata ake othe makĩmwĩra atĩrĩ: “Thondekithia mũtĩ wa ũraihu wa mĩkono 50. Na rũcinĩ ũkeera mũthamaki atĩ Moridekai agĩrĩirũo gũcuurio mũtĩ-inĩ ũcio. Ũgaacoka ũthiĩ hamwe na mũthamaki ũkenere iruga.” Ũndũ ũcio ũgĩkenia Hamani, na agĩthondekithia mũtĩ ũcio.