Hadassah 7

Nĩ ũndũ ũcio mũthamaki na Hamani magĩthiĩ iruga-inĩ rĩa Hadassah mũtumia wa mũthamaki

Na rĩrĩa maanyuaga ndibei mũthenya ũcio wa kerĩ, o rĩngĩ mũthamaki akĩũria Hadassah atĩrĩ: “Nĩ ũndũ ũrĩkũ ũkwenda Hadassah mũtumia wa mũthamaki? Nĩ ũkũheo. Ihoya rĩaku nĩ rĩrĩkũ? O na angĩkorũo nĩ nuthu ya ũthamaki wakwa, nĩ ũkũhingĩrio!”

Nake Hadassah mũtumia wa mũthamaki akĩmũcokeria ũũ: “Angĩkorũo nĩ njĩtĩkĩrĩkĩte nĩwe, wee mũthamaki, na angĩkorũo mũthamaki nĩ ekuona kwagĩrĩire, ihoya rĩakwa nĩ atĩ ũhonokie muoyo wakwa, na ũreke andũ aitũ matũũre muoyo

Nĩ gũkorũo niĩ na andũ aitũ nĩ twendetio nĩguo twanangwo, tũũragwo, na tũniinwo. Korũo no kwendio twendetio tũtuĩke ngombo cia arũme na andũ-a-nja, nĩ ingĩrakirire. No mĩtangĩko ĩno ti mĩega, nĩ gũkorũo ũndũ ũcio nĩ ũkũhutia mũthamaki.”

Mũthamaki Ahasuerusu akĩũria Hadassah mũtumia wa mũthamaki atĩrĩ: “Nũũ ũcio hihi, mũndũ ũcio ũbangĩte gwĩka ũndũ ta ũcio arĩ ha?”

Nake Hadassah akiuga ũũ: “Thũ itũ nĩ Hamani ũyũ mũũru.”

Mũthamaki agĩũkĩra arakarĩte mũno akiuma hau maanyuagĩra ndibei na agĩthiĩ mũgũnda-inĩ wa nyũmba ya mũthamaki, no Hamani akĩrũgama nĩguo ethaithanĩrĩre harĩ Hadassah mũtumia wa mũthamaki nĩgetha ndakoragwo, nĩ gũkorũo nĩ oonire atĩ mũthamaki nĩ aatuĩte nĩ ekũmũherithia

Mũthamaki akiuma mũgũnda-inĩ ũcio wa nyũmba ya mũthamaki, agĩcoka nyũmba ĩyo maanyuagĩra ndibei na akĩona Hamani egũithĩtie gĩtĩ-inĩ kĩrĩa Hadassah aarĩ. Mũthamaki akĩgũthũka akiuga atĩrĩ: “Kaĩ ningĩ arenda kũnyita mũtumia wa mũthamaki kĩa hinya thĩinĩ wa nyũmba yakwa mwene?” O hĩndĩ ĩyo mũthamaki aarĩkia kuuga ũguo, anene a mũthamaki makĩhumbĩra Hamani ũthiũ

Nake Haribona, ũmwe wa anene a kwa mũthamaki, akiuga atĩrĩ: “Hamani o na nĩ arathondekithĩtie mũtĩ nĩ ũndũ wa Moridekai ũrĩa waheanire ũhoro ũrĩa wahonokirie mũthamaki. Mũtĩ ũcio ũrũgamĩtio nyũmba-inĩ ya Hamani, na ũrĩ na ũraihu wa mĩkono 50.” Mũthamaki aigua ũguo akiuga ũũ: “Mũcuuriei mũtĩ-inĩ ũcio.”

Kwoguo magĩcuuria Hamani mũtĩ-inĩ ũcio aathondekithĩtie nĩ ũndũ wa Moridekai, namo marakara ma mũthamaki magĩthira.