Hadassah 8

Mũthenya o ro ũcio, Mũthamaki Ahasuerusu akĩhe Hadassah mũtumia wa mũthamaki nyũmba ya Hamani, thũ ya Ayahudi; nake Moridekai agĩtonya mbere ya mũthamaki, nĩ gũkorũo Hadassah nĩ aamenyithanĩtie ũrĩa meetainwo nake

Mũthamaki agĩcoka akĩruta gĩcũhĩ gĩake kĩrĩ na mũhũũri kĩrĩa aatunyĩte Hamani na agĩkĩnengera Moridekai. Nake Hadassah agĩtua Moridekai mũrũgamĩrĩri wa nyũmba ya Hamani.

Ningĩ, Hadassah akĩaria na mũthamaki o rĩngĩ. Akĩĩgũithia magũrũ-inĩ make akĩrĩraga na akĩmũthaitha atharũrie ũũru ũrĩa wekĩtwo nĩ Hamani Mũagagi na njama ĩrĩa aabangĩte ya gũũkĩrĩra Ayahudi

Mũthamaki agĩtambũrũkĩria Hadassah mũthĩgi wa thahabu, nake Hadassah agĩũkĩra na akĩrũgama mbere ya mũthamaki

Hadassah akiuga atĩrĩ: “Angĩkorũo mũthamaki nĩ ekuona arĩ wega na angĩkorũo nĩ njĩtĩkĩrĩkĩte nĩwe, na angĩkorũo mũthamaki nĩ ekuona kwagĩrĩire na ngorũo njagĩrĩire maitho-inĩ make, nĩ kwandĩkwo watho wa kũniina hinya marũa ma Hamani mũrũ wa Hamedatha Mũagagi, marĩa aandĩkire megiĩ njama ya kũniina Ayahudi icigo-inĩ ciothe cia mũthamaki

Nĩ ũndũ-rĩ, ingĩhota atĩa gũkirĩrĩria kwĩrorera thĩna ũrĩa ũgũkora andũ aitũ, o na ningĩ ingĩhota atĩa gũkirĩrĩria kuona andũ a nyũmba itũ makĩniinwo?”

Nĩ ũndũ ũcio Mũthamaki Ahasuerusu akĩĩra Hadassah mũtumia wa mũthamaki na Moridekai ũcio Mũyahudi ũũ: “Atĩrĩrĩ, nĩ heete Hadassah nyũmba ya Hamani na ngacuurithia Hamani mũtĩ-inĩ, tondũ wa kũbanga njama ya gũtharĩkĩra Ayahudi

Rĩu no mwandĩke na rĩĩtwa rĩa mũthamaki watho ũrĩa mũkuona wagĩrĩire nĩ ũndũ wa Ayahudi na mũũhũũre mũhũũri na gĩcũhĩ kĩrĩ na mũhũũri kĩa mũthamaki, nĩ gũkorũo watho ũrĩa wandĩkĩtwo na rĩĩtwa rĩa mũthamaki na ũkahũũrũo mũhũũri na gĩcũhĩ kĩu kĩa mũthamaki ndũngĩgarũrũo.”

Nĩ ũndũ ũcio andũ arĩa maarĩ andĩki a mũthamaki magĩtwo hĩndĩ ĩyo mweri-inĩ wa gatatũ, na noguo mweri wa Sivani, mũthenya wa 23, nao makĩandĩka maũndũ mothe marĩa Moridekai aathanire kũrĩ Ayahudi, o hamwe na atongoria, mangavana, na anene a icigo, kuuma India nginya Ethiopia, icigo 127, makĩandĩkĩra o gĩcigo kũringana na mwandĩkĩre wakĩo na o andũ na rũthiomi rwao na kũrĩ Ayahudi na mwandĩkĩre wao na rũthiomi rwao.

Aandĩkithirie watho ũcio na rĩĩtwa rĩa Mũthamaki Ahasuerusu na akĩũhũũra mũhũũri na gĩcũhĩ kĩrĩ na mũhũũri kĩa mũthamaki na agĩtũma watho ũcio ũrĩ marũa kũgerera guoko kwa andũ a gũtwara marũa na mbarathi; maakuuirũo nĩ mbarathi cia gũtwara marũa iria ciathiaga ihenya, iria ciarĩithĩtio nĩ ũndũ wa wĩra wa mũthamaki

Marũa-inĩ macio mũthamaki nĩ aaheanĩte rũtha kũrĩ Ayahudi arĩa maarĩ matũũra-inĩ mothe macokanĩrĩre hamwe na marũĩrĩre mĩoyo yao na maanange, morage, na maniine gĩkundi o gĩothe kĩa andũ kana gĩcigo o gĩothe kĩrĩa kĩngĩokire kũmatharĩkĩra, o nginya andũ-a-nja na ciana, na matahe indo ciao

Ũndũ ũcio warĩ wĩkwo mũthenya-inĩ ũmwe icigo-inĩ ciothe cia Mũthamaki Ahasuerusu, mũthenya wa ikũmi na ĩtatũ wa mweri wa ikũmi na ĩĩrĩ, na noguo mweri wa Adari

Kobĩ ya marũa macio yarĩ ĩneanwo ĩrĩ watho icigo-inĩ ciothe. Warĩ ũmenyithanio kũrĩ ikundi ciothe cia andũ, nĩguo mũthenya ũcio Ayahudi makorũo mehaarĩirie kwĩrĩhĩria kũrĩ thũ ciao

Andũ acio a gũtwara marũa maathiire na ihenya mateng’erete makuuĩtwo nĩ mbarathi cia gũtwara marũa iria ciahũthagĩrũo wĩra-inĩ wa mũthamaki o ta ũrĩa mũthamaki ooigĩte. Watho ũcio waheanirũo nginya Shushani nyũmba-inĩ ya mũthamaki.

Nake Moridekai akiuma mbere ya mũthamaki ehumbĩte nguo ya ũnene ya rangi wa mburuu na rangi mwerũ, ekĩrĩte thũmbĩ nene ya thahabu na kabuuti ka ngora ĩrĩa njega ya ndigi cia rangi wa papũ. Nao andũ a itũũra rĩa Shushani makiugĩrĩria makenete

Ayahudi maarĩ na mwĩhoko na gĩkeno na magacanjamũka na magatĩĩka

Na icigo-inĩ ciothe na matũũra mothe, kũrĩa guothe uuge wa mũthamaki na watho wake wakinyire, Ayahudi maarĩ na gĩkeno na magacanjamũka, makahaarĩria maruga na ikũngũĩro. Nao andũ aingĩ a bũrũri ũcio nĩ meeĩtaga Ayahudi, tondũ nĩ maanyitĩtwo nĩ guoya nĩ ũndũ wa Ayahudi.