Isaiya 1

Gĩkĩ nĩ kĩoneki kĩrĩa Isaiya mũrũ wa Amozu oonire gĩkoniĩ Yahuda na Yahrushalayim matukũ-inĩ ma Uzia, Jothamu, Ahazu, na Hezekia, athamaki a Yahuda:

Wee igũrũ ta thikĩrĩria, o nawe thĩ ta tega gũtũ, Nĩ gũkorũo Yahweh oigĩte ũũ: “Nĩ nderete ariũ na makaneneha, No o nĩ manemeire.

Ndegwa nĩ ĩmenyaga ũrĩa wamĩgũrire, O na ndigiri nĩ ĩmenyaga mũharatĩ wa mwene yo; No Isiraeli ndanjũĩ, Andũ akwa matikoragwo na ũtaũku.”

Kaĩ rũrĩrĩ rũrũ rwĩhia rwĩ na haaro-ĩ, Andũ matitikĩte mahĩtia, Rũciaro rwa andũ oru, ciana ciĩthahĩtie! Nĩ matigĩte Yahweh; Makaagĩra Ũrĩa Mwamũre wa Isiraeli gĩtĩo; O na makamũhutatĩra.

Nĩ ha hangĩ mũgũkĩgũthwo mwathiĩ na mbere kũrema? Mũtwe wothe nĩ mũrũaru, Na ngoro yothe nĩ ndwaru.

Kuuma ikinya rĩa kũgũrũ nginya mũtwe, gũtirĩ handũ hatarĩ harwaru. Mũrĩ na nguraro na irema na ironda itarĩ njohe —Nacio itirigitĩtwo kana ikohwo kana ikororoyio na maguta.

Bũrũri wanyu nĩ ũtuĩkĩte kũndũ gũtiganĩrie. Matũũra manyu magacinwo na mwaki. Andũ a kũngĩ matharĩkagĩra bũrũri wanyu mwĩroreire. Ũtariĩ ta bũrũri mwanangĩku ũng’aũranĩtio nĩ andũ a kũngĩ.

Mwarĩ wa Zayuni atigĩtwo ta gĩthũnũ kĩrĩ mũgũnda-inĩ wa mĩthabibũ, O ta kanyũmba karĩ mũgũnda-inĩ wa rũkiri, O ta itũũra rĩthiũrũrũkĩirio nĩ thũ.

Tiga nĩ ũrĩa Yahweh mũnene wa ita aatũtigĩirie matigari manini ma andũ, Tũngĩatuĩkire o ta Sodomu, Na tũhaane o ta Gomora.

Iguai kiugo kĩa Yahweh, inyuĩ athani arĩa ahinyanĩrĩria a Sodomu. Tegai matũ mũigue watho wa Kĩhoti witũ, inyuĩ andũ a Gomora.

“Magongona marĩa mũndutagĩra maingĩ-rĩ, marĩ na ũguni ũrĩkũ harĩ niĩ?” ũguo nĩguo Yahweh ekũũria. “Nĩ njiganĩtie magongona manyu ma njino ma ndũrũme na maguta ma nyamũ iria irĩithĩtio wega, Na ndikenagĩra thakame ya tũtegwa na ya tũgondu o na ya mbũri.

Rĩrĩa muoka mbere yakwa-rĩ, Nũũ ũkoragwo amwĩrĩte mũũke, Mũgoka kũranga nja ciakwa?

Tigai gũcoka kũrehe magongona mangĩ ma tũhũ ma mũtu. Ũbumba wanyu nĩ kĩndũ kĩrĩ magigi harĩ niĩ. Tũrũgamo twa mweri, thabatũ, gwĩtana igomano —Ndingĩhota gũkirĩrĩria ũhũthĩri wanyu wa mahinya ma ũgo hamwe na igomano cianyu njũru.

Nĩ thũũrĩte tũrũgamo twanyu twa mweri o hamwe na ciathĩ cianyu. Maũndũ macio nĩ matuĩkĩte mũrigo harĩ niĩ; Nĩ nogetio nĩ kũmakirĩrĩria.

Na hĩndĩ ĩrĩa mwatambũrũkia moko manyu na igũrũ, Nĩ hithaga maitho makwa kuuma harĩ inyuĩ. O na mwahoya mahoya maingĩ, Ndithikagĩrĩria; Moko manyu maiyũire thakame.

Mwĩthambei, mwĩtheriei; Eheriai ciĩko cianyu njũru ndige gũciona; Tigai gwĩka maũndũ moru.

Mwĩrutei gwĩka maũndũ mega, caragiai kĩhooto, Rũngagai ũrĩa ũhinyanagĩrĩria, Tetagĩrai ihooto cia mwana wa ngoriai, Na mũtetagĩre mũtumia wa ndigwa.”

“Rĩu ũkai, rekei tũciire,” ũguo nĩguo Yahweh ekuuga. “O na angĩkorũo mehia manyu matunĩhĩte o ta gakarakũ, Nĩ megũtherio mahaane o ta mbarabu; O na angĩkorũo matunĩhĩte o ta thakame, Nĩ mekwerũha o ta guoya wa ng’ondu.

Angĩkorũo nĩ mũrĩkoragwo mwĩhaarĩirie gũthikĩrĩria, Nĩ mũrĩrĩaga indo iria njega cia bũrũri.

No mwarega na mũreme, Mũkaaniinwo na rũhiũ rwa njora, Nĩ gũkorũo kanua ka Yahweh nĩko koigĩte ũguo.”

Kaĩ itũũra rĩĩhokeku rĩtuĩkĩte o ta mũmaraya-ĩ! Kĩhooto kĩaiyũire thĩinĩ warĩo; Ũthingu watũũraga thĩinĩ warĩo, No rĩu nĩ oragani marĩ kuo.

Betha yaku ĩtuĩkĩte gĩko, Nayo ndibei yaku ĩgatukanio na maĩ.

Anene aku nĩ maremete na makagĩa thiritũ na aici. Othe nĩ mendete ihaki na mahanyũkanagia na iheo. Matituagĩra ciana itarĩ maithe na kĩhooto, Na ciira wa mũtumia wa ndigwa ndũkinyaga harĩ o.

Nĩ ũndũ ũcio Mwathi, Yahweh mũnene wa ita, Ũrĩa ũrĩ Hinya wa Isiraeli, ekuuga ũũ: “Hĩ! Nĩ ngeyeherania na thũ ciakwa, Na ndĩĩrĩhĩrie harĩ thũ ciakwa.

Nĩ ngeerekeria guoko gwakwa harĩ wee, Nĩ ngaatheria gĩko gĩaku ta arĩ na thabuni, Na njeherie gĩko gĩaku gĩothe.

Nĩ ngaacokia atuanĩri ciira aku o ta ũrĩa kwarĩ kĩambĩrĩria-inĩ. Na ataarani aku o ta ũrĩa kwarĩ kĩambĩrĩria-inĩ. Thutha ũcio nĩ ũgeetagwo Itũũra rĩa Ũthingu, Taũni Njĩhokeku.

Zayuni ĩgaakũũrũo na kĩhooto, Nao andũ a kuo arĩa magaacoka, makũũrũo na ũthingu.

Andũ arĩa aremi na arĩa ehia makaaniinwo hamwe, Na arĩa matigĩte Yahweh nĩ magaathira biũ.

Nĩ gũkorũo nĩ magaaconoka nĩ ũndũ wa mĩgandi ĩrĩa werirĩirie, Nawe nĩ ũgaaconoka nĩ ũndũ wa mĩgũnda ĩrĩa wathuurire.

Nĩ tondũ ũgaatuĩka o ta mũgandi ũrĩ na mathangũ marahooha, Na ũtuĩke o ta mũgũnda ũtarĩ maĩ.

Mũndũ ũrĩa ũrĩ hinya agaatuĩka o ta ndigi mbuthũkangu cia ũguta, Naguo wĩra wake ũtuĩke thandĩ; We na wĩra wake makaahĩa hamwe, Gũtigaakorũo mũndũ wa kũhoria mwaki ũcio.”