Isaiya 2

Ũndũ ũyũ nĩguo Isaiya mũrũ wa Amozu oonire wĩgiĩ Yahuda na Yahrushalayim:

Ihinda-inĩ rĩa mũthia rĩa matukũ, Kĩrĩma kĩa nyũmba ya Yahweh Nĩ gĩkaahandwo kĩrũmĩte wega igũrũ rĩa tũcũmbĩrĩ twa irĩma, Na nĩ gĩgaatũũgĩrio igũrũ rĩa tũrĩma, Na kũu nĩkuo ndũrĩrĩ ciothe igaathiaga.

Na ikundi nyingĩ cia andũ nĩ igaathiĩ na ciuge atĩrĩ: “Ũkai, nĩ twambatei kĩrĩma-inĩ kĩa Yahweh, Tũthiĩ nyũmba-inĩ ya Kĩhoti wa Jakubu. Nake nĩ arĩtũrutaga ũhoro wĩgiĩ njĩra ciake, Na ithuĩ tũgeragĩre tũcĩra-inĩ twake.” Nĩ gũkorũo watho nĩ ũkooima Zayuni, Na kiugo kĩa Yahweh kiume Yahrushalayim.

Nake nĩ agaatuithania ciira gatagatĩ-inĩ ka ndũrĩrĩ Na arũnge maũndũ harĩ ikundi nyingĩ cia andũ. Nao nĩ magatura hiũ ciao cia njora ituĩke hiũ cia mĩraũ Na matimũ mao matuĩke hiũ cia gũceha. Rũrĩrĩ rũtikoera rũrĩrĩ rũrĩa rũngĩ rũhiũ rwa njora, O na matikeruta mbaara rĩngĩ.

Inyuĩ nyũmba ya Jakubu, ũkai, Nĩ tũthiĩrei ũtheri-inĩ wa Yahweh.

Nĩ gũkorũo nĩ ũtiganĩte na andũ aku nyũmba ya Jakubu, Tondũ nĩ marũmĩtie mĩtugo ya mwena wa Irathĩro; Mekaga maũndũ ma ũgo o ta Afilisti, Na matumaga ndũgũ na ciana cia andũ a kũngĩ.

Bũrũri wao ũiyũire betha na thahabu, Na mĩthithũ yao ndĩngĩtarĩka. Bũrũri wao ũiyũire mbarathi, Na ngaari ciao cia mbarathi itingĩtarĩka.

Bũrũri wao ũiyũire mĩhianano itarĩ kĩene ya kũhoywo. Mainamagĩrĩra wĩra wa moko mao ene, Indo iria mathondekete na ciara ciao.

Kwoguo mũndũ ainamagĩrĩra, ageconorithia, Nawe ndũngĩmarekera.

Ingĩrai thĩinĩ wa rwaro rwa ihiga na mwĩhithe rũkũngũ-inĩ Nĩ ũndũ wa marakara ma kũguoyohia ma Yahweh Na riri wake mũnene.

Maitho ma mũndũ ũrĩa mwĩtĩi nĩ magaaconorithio, Na mwĩtũũgĩrio wa andũ nĩ ũkaainamanio. Yahweh nowe wiki ũgaatũũgĩrio mũthenya ũcio.

Nĩ gũkorũo mũthenya ũcio nĩ wa Yahweh mũnene wa ita. Ũgooka igũrũ rĩa ũrĩa wothe mwĩtĩi na ũrĩa wĩtũũgagĩria, Igũrũ rĩa mũndũ wothe, ũrĩa mũtũũgĩru o na kana ũrĩa mwĩnyihia,

Igũrũ rĩa mĩtarakwa yothe ya Lebanoni ĩrĩa ĩtũũgĩrĩte na ĩkaneneha mũno Na igũrũ rĩa mĩgandi yothe ya Bashani,

Igũrũ rĩa irĩma ciothe iria itũũgĩrĩte Na igũrũ rĩa tũrĩma tuothe tũrĩa tũraya na igũrũ,

Igũrũ rĩa nyũmba yothe ndaya na igũrũ na rũthingo o ruothe rũrĩ na ũgitĩri,

Igũrũ rĩa meri ciothe cia Tarishishi Na igũrũ rĩa tũtarũ tũrĩa tuothe twĩriragĩrio.

Mwĩtĩo wa mũndũ nĩ ũgaaconorithio, Na mwĩtũũgĩrio wa andũ ũinamanio. Yahweh nowe wiki ũgaatũũgĩrio mũthenya ũcio.

Mĩhianano ya kũhoywo itarĩ kĩene nĩ ĩkahukio ĩthire biũ.

Na andũ nĩ makaaingĩra ngurunga-inĩ cia ndwaro cia mahiga Na maingĩre marima-inĩ marĩa marĩ na thĩ, Nĩ ũndũ wa marakara ma kũguoyohia ma Yahweh Na riri wake mũnene, Rĩrĩa akaarahũka nĩgetha atũme thĩ ĩthingithe nĩ kĩmako.

Mũthenya ũcio mũndũ nĩ akoya mĩhianano yake ĩtarĩ kĩene ya betha na ya thahabu Ĩyo ethondekeire nĩgetha amĩinamagĩrĩre Na amĩikie kũrĩ huko na huhu

Nĩguo aingĩre marima marĩa marĩ ndwaro-inĩ cia mahiga Na mĩatũka-inĩ ya ndũmba cia mahiga, Nĩ ũndũ wa marakara ma kũguoyohia ma Yahweh Na riri wake mũnene, Rĩrĩa akaarahũka nĩgetha atũme thĩ ĩthingithe nĩ kĩmako.

Nĩguo mũteithĩke, tigai kwĩhoka mũndũ, O ũcio mĩhũmũ yake ĩrĩ o hau maniũrũ-inĩ make. Nĩ kĩĩ kĩngĩtũma mwĩcirie ũhoro wake?