Isaiya 3
Na rĩrĩ, Mwathi, Yahweh mũnene wa ita, Nĩ ekweherereria Yahrushalayim na Yahuda ũteithio wao wothe o hamwe na kĩrĩa gĩothe kĩmatiiragĩrĩra, Ũteithio wothe wa mũgate na maĩ,
Mũndũ ũrĩ hinya na njamba ya ita, Mũtuanĩri ciira na mũnabii, mũragũri na mũthuri wa Kĩama,
Mũnene wa andũ 50, mũndũ mũtĩĩku, na mũtaarani, Mũndũ mũgo ũrĩa mũũgĩ na mũndũ mũgo njorua.
Nĩ ngaatua imwana anene ao, Nao magaathagwo nĩ andũ matarĩ na mũrũgamo.
Andũ nĩ makaahinyanĩrĩria, O mũndũ na ũrĩa ũngĩ. Kahĩĩ gakaaruma mũthuri mũkũrũ, Nake ũrĩa ũtarĩ igweta aremere ũrĩa ũheetwo gĩtĩo.
O mũndũ nĩ akaanyita mũrũ wa nyina thĩinĩ wa nyũmba ya ithe na amwĩre: “Wee ũrĩ na kabuuti—tuĩka mwathi witũ. Rũgamĩrĩra hĩba ĩno ya matigari maya manangĩtwo.”
No we mũthenya ũcio nĩ akaarega oige: “Niĩ ndigũtuĩka wa kũmuoha ironda; Ndirĩ na irio o na kana nguo thĩinĩ wa nyũmba yakwa. Mũtikandue mwathi wa andũ aya.”
Nĩ gũkorũo Yahrushalayim nĩ ĩhĩngĩkĩte, Na Yahuda ĩkagũa, Tondũ kũgerera ciugo na ciĩko ciao nĩ mareganĩte na Yahweh; Magakorũo marĩ aremi maitho-inĩ make marĩ riri.
Mothiũ mao nĩ monanagia ũrĩa matariĩ, Na makonania mehia mao ta Sodomu; Matigeragia kũmahitha. Kaĩ marĩ na haaro-ĩ, nĩ gũkorũo o ene nĩ mereheire mwanangĩko!
Ĩra arĩa athingu atĩ maũndũ mao nĩ makaagĩra; Nĩ magaatugwo nĩ ũndũ wa ciĩko iria mekaga.
Kaĩ mũndũ ũrĩa mũũru arĩ na haaro-ĩ! Nĩ agaakorwo nĩ gĩcanjama, Tondũ maũndũ marĩa ekĩte na moko make no mo ageekwo!
Ha ũhoro wa andũ akwa-rĩ, arũgamĩrĩri ao a wĩra nĩ mamahinyagĩrĩria, Nao mathagwo nĩ andũ-a-nja. Andũ akwa, atongoria anyu nĩ matũmaga mwangange, Na magatũma muume njĩra-inĩ cianyu.
Yahweh nĩ arahũkĩte nĩguo atuanĩre; Nĩ arũgamĩte nĩguo atuĩre ikundi cia andũ ituĩro.
Yahweh nĩ agaatuĩra athuri na anene a andũ ake. “Nĩ mũcinĩte mũgũnda wa mĩthabibũ, Na kĩrĩa mũiyĩte kuuma kũrĩ athĩni kĩrĩ thĩinĩ wa nyũmba cianyu.
Nĩ kĩĩ gĩtũmaga mũhehenje andũ akwa Na mũgathĩa mothiũ ma andũ arĩa athĩni tĩri-inĩ?” Ũguo nĩguo Mwathi, Yahweh mũnene wa ita ekũũria.
Yahweh oigĩte atĩrĩ: “Tondũ aarĩ a Zayuni nĩ etĩi, Mathiaga mambararĩtie ngingo ciao na igũrũ, o na makagĩa na uuhi wa maitho, na magathiĩ magĩkinyaga na raarĩ, Makĩgambagia njingiri iria irĩ thũng’wa-inĩ ciao,
Yahweh nĩ akaarehera aarĩ acio a Zayuni ironda ruototia-inĩ rwa mĩtwe yao, Na Yahweh amaguũrie nguo moneke njaga ciao.
Mũthenya ũcio Yahweh nĩ akeeheria ũthaka wa bangiri ciao, Tũtama twa kuoha njuĩrĩ na mathaga marĩa meyunĩte ta mweri,
Mindira, bangiri, na tũtama twa kũhumbĩra ũthiũ,
Itambaya cia mũtwe, bangiri cia magũrũ, na mĩcibi, Cuba cia maguta manungi wega na ithitũ cia kwĩgemia,
Mbete cia ciara o na icũhĩ cia maniũrũ,
Kanjũ iria ciĩkĩragwo hĩndĩ ya gĩathĩ, nguo ndaya cia igũrũ, tũbuuti, na ibeti,
Icicio cia kwĩrora o na nguo cia gatani, Iremba na tũtama twa kũhumbĩra ũthiũ.
Handũ ha maguta ma balisamu, gũgaakorũo na mũnungo wa kĩndũ kĩbuthu; Handũ ha mũcibi, gũkorũo na mũkwa; Handũ ha njuĩrĩ thondeke wega, gũkorũo na kĩhara; Handũ ha nguo ya goro, gũkorũo na nguo ya ikũnia; Na handũ ha ũthaka gũkorũo na kĩrema gĩa gũcinwo na ruoro.
Arũme anyu makaaniinwo na rũhiũ rwa njora, Na arũme anyu arĩa marĩ hinya maniinĩrũo mbaara-inĩ.
Ihingo ciakuo nĩ igaacakaya na inyitwo nĩ kĩeha, Nake mũka ũcio mũtĩganĩrie, agaaikara thĩ tĩri-inĩ nĩ ũndũ wa kĩeha.”