Isaiya 4

Na mũthenya ũcio atumia mũgwanja nĩ makaanyita mũndũrũme ũmwe mamwĩre atĩrĩ: “Tũrĩrĩaga mũgate witũ ithuĩ ene Na twĩhumbage nguo citũ ithuĩ ene; Ĩndĩ twĩtĩkĩrie twĩtanagio na rĩĩtwa rĩaku Nĩguo gĩconoko gitũ gĩtweherere.”

Kĩrĩa Yahweh agaatũma gĩthundũke mũthenya ũcio nĩ gĩgaakorũo kĩrĩ gĩthaka na kĩrĩ na riri, na maciaro ma bũrũri ũcio magaakorũo marĩ mwĩraho na ũthaka wa andũ arĩa magaakorũo matigarĩte thĩinĩ wa Isiraeli

Ũrĩa wothe ũgaakorũo atigarĩte thĩinĩ wa Zayuni, agatigara thĩinĩ wa Yahrushalayim nĩ ageetwo mwamũre, arĩa othe magaakorũo Yahrushalayim mandĩkĩtwo atĩ nĩ a gũtũũra muoyo.

Rĩrĩa Yahweh agaathambia gĩko kĩa aarĩ a Zayuni na atherie ũiti wa thakame thĩinĩ wa Yahrushalayim akĩhũthĩra roho wa ituĩro na roho wa gũcina,

ningĩ Yahweh nĩ agaatũma igũrũ rĩa Kĩrĩma gĩa Zayuni gĩothe na igũrũ rĩa kũrĩa igomano ciakĩo ciĩkagĩrũo kũgĩe na itu na ndogo mũthenya, na rũrĩrĩmbĩ rũnene rwa mwaki rũmũrĩke ũtukũ; tondũ igũrũ rĩa riri ũcio wothe nĩ gũgaakorũo na handũ ha kwĩgitia

Na nĩ gũgaakorũo na gĩthũnũ gĩa kũrehe kĩĩruru nĩ ũndũ wa ũrugarĩ mũthenya, na handũ ha kũũrĩra na kwĩgitia ihuhũkanio na mbura.