Isaiya 17

Ĩno nĩ ndũmĩrĩri nditũ ĩkoniĩ Dameski: “Atĩrĩrĩ, Dameski nĩ rĩgaatiga gũtuĩka itũũra, Na nĩ rĩgaatuĩka hĩba ya mwanangĩko.

Matũũra ma Aroeru nĩ magaatiganĩrio; Magaatuĩka kũndũ gwa gũkomagwo nĩ ndũũru Gũtarĩ mũndũ ũngĩtũma ciigue guoya.

Matũũra marĩa marĩ na ũgitĩri nĩ magaathira kuuma Efiraimu, Na ũthamaki wehere Dameski; Namo matigari ma Siria Magaakorũo matariĩ ta riri wa andũ a Isiraeli,” ũguo nĩguo Yahweh mũnene wa ita ekuuga.

“Mũthenya ũcio riri wa Jakubu nĩ ũgaathira, Naguo mwĩrĩ wake ũrĩa mũnoru nĩ ũkaahĩnja.

Gũkaahaana ta rĩrĩa mũgethi acokanagĩrĩria ngano ĩrĩ mũgũnda Nakuo guoko gwake gũkagetha igira cia ngano, O ta rĩrĩa mũndũ ahaaraga ngano Mũkuru-inĩ wa Refaimu.

Gũgaatigara o ngano nini ya kũhaarũo, O ta ũrĩa ndamaiyũ itigaraga nini thutha wa mũtamaiyũ kũinainio: Ndamaiyũ igĩrĩ kana ithatũ tu njĩru nocio igaatigara rũhonge-inĩ rũrĩa rũrĩ igũrũ biũ, Inya kana ithano tu honge-inĩ ciaguo iria irutaga maciaro,” ũguo nĩguo Yahweh Kĩhoti wa Isiraeli ekuuga.

Mũthenya ũcio mũndũ nĩ akaarora Mũũmbi wake, namo maitho make macũthĩrĩrie Ũrĩa Mwamũre wa Isiraeli

Ndakaarora igongona iria athondekete na moko make; na ndakerorera indo iria ciara ciake ithondekete, o na kana mĩtĩ ya kũhoywo kana indo cia gũcinĩra ũbumba.

Mũthenya ũcio matũũra make marĩa mairigĩre magaatuĩka ta kũndũ gũtiganĩrie mũtitũ-inĩ, O ta rũhonge rũrĩa rwatiganĩirio mbere ya andũ a Isiraeli; Gũgaatuĩka bũrũri mwanangĩku.

Nĩ gũkorũo nĩ ũriganĩirũo nĩ Kĩhoti wa ũhonokio waku; Nĩ ũtigĩte kũririkana Rwaro rwa Ihiga rwa mwĩgitio waku. Nĩkĩo ũhandaga mĩgũnda mĩthaka Na kũu thĩinĩ ũkeheria thuuna ng'eni.

Ũirigaga mũgũnda waku ũbacĩrĩire mũthenya, Naguo rũcinĩ ũgatũma mbeũ ciaku ithundũke, No gũtigaakorũo na magetha mũthenya wa mũrimũ na ruo rũtangĩhonwo.

Ta thikĩrĩria! Kũrĩ na inegene rĩa ikundi nyingĩ cia andũ, Irahũyũka ta maĩ ma iria! Kũrĩ na mbugĩrĩrio ya ndũrĩrĩ, Mũgambo wacio ũtariĩ ta mũrurumo wa maĩ maingĩ!

Ndũrĩrĩ ikaaruta mũgambo ũtariĩ ta mũrurumo wa maĩ maingĩ. Agaacikũũma, nacio ciũrĩre kũndũ kũraya, Iteng’eretio o ta mahuti ma kĩrĩma makĩhurutwo nĩ rũhuho, O ta mahuti ma mĩigua maragaragara makĩhurutwo nĩ rũhuho rũnene.

Hwaĩ-inĩ kũrĩ na kĩmako. Rũcinĩ gũtanakĩa matirĩ ho rĩngĩ. Rĩu nĩrĩo igai rĩa arĩa matũtahaga Na igai rĩa arĩa maiyaga indo citũ.