Isaiya 24

Na rĩrĩ, Yahweh nĩ ekweheria andũ bũrũri-inĩ na atũme ũtuĩke kũndũ gũtiganĩrie. Nĩ ekũũinamania na ahurunje aikari a guo.

Gũgaakorũo kũrĩ ũndũ ũmwe harĩ mũndũ wothe: Andũ o hamwe na mũthĩnjĩri-Yahweh, Ndungata na mwathi wayo, Ndungata ya mũirĩtu na mũtumia ũrĩa ũmĩathaga, Mũgũri na mwendia, Mũkombanĩri na mũkombi, Mũkombanĩri na ũrĩa ũrĩ na thiirĩ.

Bũrũri nĩ ũkeeherio andũ biũ; Ũgaathũkangio biũ, Nĩ gũkorũo Yahweh nĩ arĩtie kiugo kĩu.

Bũrũri nĩ ũracakaya; nĩ kwanangĩka ũraanangĩka. Bũrũri ũrĩa ũrĩ maciaro nĩ ũrahooha; nĩ gũthira ũrathira. Andũ arĩa marĩ igweta a bũrũri nĩ marahooha.

Bũrũri nĩ ũthahĩtio nĩ aikari aguo, Nĩ gũkorũo nĩ magararĩte mawatho, Magacenjia mĩtugo ĩrĩa ĩtuĩtwo ya kũrũmĩrĩrũo, Na makaga kũhingia kĩrĩkanĩro gĩa gũtũũra.

Nĩkĩo bũrũri ũraniinwo nĩ kĩrumi, Nao arĩa maikaraga kuo magakorũo marĩ na mahĩtia. Nĩkĩo aikari a bũrũri manyihĩte, Na no arũme anini mũno matigarĩte.

Ndibei ya mũhihano nĩ ĩracakaya, mũthabibũ nĩ ũrahooha, Nao arĩa othe marĩ na gĩkeno ngoro-inĩ nĩ gũcaya maracaya.

Gĩkeno kĩrĩa kiumanaga na kũinio kwa manyanga nĩ gĩthirĩte; Inegene rĩa arĩĩu nĩ rĩthirĩte; Gĩkeno kĩrĩa kiumanaga na mũgambo wa kĩnanda kĩa mũgeeto nĩ gĩthirĩte.

Manyuaga ndibei matekũina rwĩmbo, Nayo njohi ĩgakorũo ĩrĩ ndũrũ harĩ arĩa maramĩnyua.

Taũni ĩrĩa ndiganĩrie nĩ thũkangie; Nyũmba ciothe nĩ hinge nĩguo gũtikagĩe mũndũ ũkũingĩra.

Mararĩrĩra barabara-inĩ nĩ kwaga ndibei. Ikeno ciothe nĩ ithirĩte; Gĩkeno kĩa bũrũri nĩ gĩthiru.

Itũũra rĩu rĩtigĩtwo rĩrĩ ithũkangie; Kĩhingo nĩ kĩmemende gĩgatuĩka hĩba ya mwanangĩko.

Nĩ gũkorũo ũũ nĩguo gũgeekĩka harĩ ikundi cia andũ bũrũri-inĩ: O ta hĩndĩ ĩrĩa mũtamaiyũ wainainio, O ta thabibũ iria itigaraga hĩndĩ ĩrĩa magetha mathira.

Nĩ makaanĩrĩra, Nĩ makooigĩrĩria makenete. Kuuma iria-inĩ nĩ makaahunjia ũhoro wa ũnene wa Yahweh.

Nĩ ũndũ ũcio nĩ makaagooca Yahweh marĩ mĩaki-inĩ; Thĩinĩ wa icigĩrĩra cia iria nĩ makaagooca rĩĩtwa rĩa Yahweh Kĩhoti wa Isiraeli.

Kuuma ituri-inĩ cia thĩ nĩ tũraigua nyĩmbo: “Riri kũrĩ Ũrĩa Mũthingu!” No nguuga atĩrĩ: “Nĩ hinyĩrĩrĩkĩte, nĩ hinyĩrĩrĩkĩte! Kaĩ ndĩ na haaro-ĩ! Akunyanĩri nĩ makunyanĩire; Marĩ na ũkunyanĩri, akunyanĩri nĩ makunyanĩire.”

Guoya na marima o na mĩtego nĩ igwetereire, wee mũikari wa bũrũri.

Mũndũ wothe ũkoora nĩ ũndũ wa mũrurumo wa kũguoyohia akaagũa irima-inĩ, Na mũndũ wothe ũkooima irima-inĩ akaanyitwo nĩ mũtego. Nĩ gũkorũo mũiyũro wa maĩ nĩ ũkaahingũka kuuma igũrũ, Na mĩthingi ya bũrũri nĩ ĩgaathingitha.

Bũrũri nĩ watũkĩte icunjĩ; Bũrũri nĩ ũinainĩtio; Bũrũri nĩ ũretugutania na hinya mũno.

Bũrũri ũratũgũga o ta mũrĩĩu, Na ũgacũga mbere na thutha o ta gathũnũ hĩndĩ ya rũhuho. Nĩ ũritũhĩirũo mũno nĩ mehia maguo, Na nĩ ũkaagũa, ũndũ ũtagookĩra rĩngĩ.

Mũthenya ũcio Yahweh nĩ akeerekeria meciria make harĩ mbũtũ ĩrĩa ĩrĩ igũrũ Na athamaki a thĩ arĩa marĩ thĩinĩ wa thĩ.

Na nĩ magaacokanĩrĩrio hamwe O ta ohwo macokanĩrĩirio irima-inĩ, Na nĩ makaahingĩrũo njera; Thutha wa matukũ maingĩ nĩ makaaherithio.

Mweri nĩ ũgaaconorithio, O na riũa nĩ rĩkaaigua thoni, Nĩ gũkorũo Yahweh mũnene wa ita nĩ atuĩkĩte Mũthamaki Kĩrĩma-inĩ gĩa Zayuni na Yahrushalayim, Agakorũo na riri mbere ya athuri a andũ ake.