Isaiya 25

Wee Yahweh-rĩ, ũrĩ Kĩhoti wakwa. Nĩ ngũkwambararia, na ngooce rĩĩtwa rĩaku, Nĩ gũkorũo nĩ wĩkĩte maũndũ ma magegania, Ataarani aku kuma hĩndĩ ya tene nĩo wĩhokeku na ũhoro wa ma.

Nĩ gũkorũo nĩ ũtuĩte itũũra hĩba ya mahiga, Taũni ĩrĩ na ũgitĩri ũkamĩtua mwanangĩko. Nyũmba ndaya na igũrũ ya mũndũ wa kũngĩ ndĩrĩ ho rĩngĩ; Itũũra rĩu rĩtirĩ hĩndĩ rĩgaakwo rĩngĩ.

Nĩkĩo andũ arĩa marĩ hinya magaakũgooca; Itũũra rĩa ndũrĩrĩ iria ihinyanagĩrĩria nĩ rĩgaagwĩtigĩra.

Tondũ ũtuĩkĩte mwĩgitio wa mũndũ ũrĩa ũtarĩ hinya, Mwĩgitio wa mũndũ ũrĩa mũthĩni hĩndĩ ya mĩtangĩko, Rĩũrĩro rĩa kwĩgitia mbura ya kĩhuhũkanio, Na kĩĩruru gĩa kwĩgitia ũrugarĩ. Hĩndĩ ĩrĩa mũrurumo wa ahinyanĩrĩria ũtariĩ ta mbura ya kĩhuhũkanio ĩkĩhũũra rũthingo,

O ta ũrugarĩ wa bũrũri mũng’aru, Wee nĩ ũniinaga ngũĩ cia ageni. O ta ũrĩa ũrugarĩ ũniinagwo nĩ kĩĩruru gĩa itu, No taguo rwĩmbo rwa ahinyanĩrĩria rũkirĩtio.

Kĩrĩma-inĩ gĩkĩ-rĩ, Yahweh mũnene wa ita nĩ agaathondekera ikundi ciothe cia andũ Ndĩa ya irio ciĩna maguta njega, Ndĩa ya ndibei ĩrĩa njega mũno, Ya irio njega ciyũrĩte maguta, Ya ndibei njega, ĩcungĩtwo.

Kĩrĩma-inĩ gĩkĩ-rĩ, nĩ akaaniina taama ũrĩa ũhumbĩrĩte ikundi ciothe cia andũ O hamwe na gĩtambaya kĩrĩa gĩtumĩtwo gĩkahumbĩra ndũrĩrĩ ciothe.

Nĩ akaameria gĩkuũ tene na tene, Na Yahweh Mwathi akaagiria maithori mothiũ mothe. Rũmena rũrĩa andũ ake mamenetwo naruo arweherie kuuma thĩinĩ wa thĩ yothe, Nĩ gũkorũo Yahweh we mwene nĩ oigĩte ũguo.

Mũthenya ũcio nĩ makoiga ũũ: “Oneei! Ũyũ nĩwe Kĩhoti witũ! Nĩwe twĩrĩgagĩrĩra, Na nĩ agaatũhonokia. Ũyũ nĩ Yahweh! Nĩwe twĩrĩgagĩrĩra. Nĩ tũkenei na tũcanjamũke nĩ ũndũ wa ũhonokio wake.”

Tondũ guoko kwa Yahweh nĩ gũgaaikara kĩrĩma-inĩ gĩkĩ, Na Moabi nĩ ĩkaarangĩrĩrio harĩa ĩrĩ O ta nyeki ĩrangarangĩtwo ĩgatuĩka hĩba ya thumu.

Nĩ agaatambũrũkia moko make harĩ yo O ta ũrĩa mũtubĩri atambũrũkagia moko make nĩguo atubĩre, Na nĩ akaaniina mwĩtĩo wayo Agĩikia moko make na njĩra ya ũũgĩ.

Na itũũra rĩrĩa rĩrĩ na ũgitĩri, o na thingo ciaku ndaihu na igũrũ cia ũgitĩri, Nĩ agaacimomora; Akaarĩgũithia thĩ, o rũkũngũ-inĩ.