Isaiya 26

Na rĩrĩ, mũthenya ũcio rwĩmbo rũrũ nĩ rũkaainwo bũrũri-inĩ wa Yahuda: “Tũrĩ na itũũra rĩrĩ na hinya. Atũmaga ũhonokio ũtuĩke thingo ciarĩo o na njirigo ciarĩo.

Hingũrai ihingo nĩgetha rũrĩrĩ rũrĩa rũthingu rũingĩre, Rũrĩrĩ rũrĩa rũrũmagia mĩthiĩre ya Ũhoro wa ma.

Wee nĩ ũkaagitĩra arĩa metiiragĩrĩra biũ harĩ wee; Nĩ ũkaamahe thayũ wa gũtũũra, Tondũ wee nĩwe mehokete.

Mwĩhokei Yahweh tene na tene, Nĩ gũkorũo Yahu, o we Yahweh nĩwe Rwaro rwa Ihiga rwa tene na tene.

Tondũ nĩ aharũrũkĩtie arĩa maikaraga handũ igũrũ, itũũra rĩrĩa rĩtũũgĩru. Akarĩgũithia thĩ, Akarĩgũithia thĩ tĩri-inĩ; Akarĩikia thĩ rũkũngũ-inĩ.

Nĩ rĩkaarangĩrĩrio na kũgũrũ, Magũrũ ma arĩa ahinyĩrĩrĩku, makinya ma arĩa matarĩ hinya.”

Njĩra ya mũndũ ũrĩa mũthingu nĩ nũngĩrĩru. Tondũ wee wĩ mũrũngĩrĩru, Nĩ ũkaanyorokia njĩra ya mũndũ ũrĩa mũthingu.

O tũkĩrũmagĩrĩra njĩra ya matuĩro maku, wee Yahweh, Kĩĩrĩgĩrĩro gitũ kĩrĩ harĩ wee. Nĩ twĩriragĩria rĩĩtwa rĩaku na kĩririkano gĩaku.

Ũtukũ nĩwe ndĩĩriragĩria na ngoro yakwa yothe, Roho wakwa ũgaikara ũgĩgũcaragia; Tondũ rĩrĩa kwagĩa na matuĩro kuuma kũrĩ wee nĩ ũndũ wa thĩ, Aikari a bũrũri nĩ merutaga ũhoro wĩgiĩ ũthingu.

O na mũndũ mwaganu angĩkwo maũndũ mega, Ndangĩĩruta ũhoro wa ũthingu. O na arĩ bũrũri wa ũrũngĩrĩru no arĩĩka maũndũ moru, Na ndonaga ũnene wa Yahweh.

Wee Yahweh, guoko gwaku nĩ kwambararie na igũrũ, no matirakuona. Nĩ makoona kĩyo kĩrĩa ũgaakorũo nakĩo harĩ andũ aku na maconoke. Mwaki wa kũniina thũ ciaku nĩ ũkaamaniina.

Wee Yahweh, nĩ ũgaatũhe thayũ, Tondũ maũndũ marĩa mothe twĩkĩte Nĩwe ũtũhingĩirie.

Wee Yahweh Kĩhoti witũ, nĩ twathĩtwo nĩ athani angĩ tiga wee, Ĩndĩ rĩĩtwa rĩaku riki tu norĩo tũgwetaga.

Nĩ makuĩte; matigaatũũra. Maagithĩtio hinya nĩ gĩkuũ, matikaarahũka. Nĩ gũkorũo nĩ werekeirie meciria maku harĩ o Nĩgetha ũmaniine na ũmaanange othe matikanacoke kũgwetwo.

Nĩ ũtũmĩte rũrĩrĩ ruongerereke, wee Yahweh, Nĩ ũtũmĩte rũrĩrĩ ruongerereke; Nĩ wĩtũũgĩrĩtie. Nĩ waramĩtie na njĩra nene mĩhaka yothe ya bũrũri.

Wee Yahweh, hĩndĩ ya mĩtangĩko moorĩire kũrĩ wee; Magĩgũitũrũrĩra mahoya mao na mĩheehũ rĩrĩa wamaherithirie.

O ta ũrĩa mũtumia ũrĩ na nda akiriĩ kũgĩa mwana Akoragwo na ruo na akarĩra nĩ ruo, No taguo tũkoretwo tũkĩigua nĩ ũndũ waku, wee Yahweh.

Twagĩire nda, tũkĩigua ruo ta rwa mũtumia akĩgĩa mwana, Ĩndĩ nĩ ta tũciarĩte rũhuho. Tũtirehete ũhonokio thĩinĩ wa bũrũri, Na gũtirĩ mũndũ ũciarĩtwo ũngĩikara thĩinĩ wa thĩ.

“Akuũ aku nĩ magaatũũra muoyo. Ciimba ciakwa nĩ ikaarahũka. Arahũkai na mwanĩrĩre nĩ gũkena, Inyuĩ mũikaraga rũkũngũ-inĩ! Tondũ ime rĩaku no ta ireera rĩa rũcinĩ, Na thĩ nĩ ĩkaareka arĩa magithĩtio hinya nĩ gĩkuũ macoke muoyo.

Thiĩi, inyuĩ andũ akwa mũingĩre rumu cianyu cia thĩinĩ, Na mũhinge mĩrango mwaingĩra. Mwĩhithe ihinda inini Nginya rĩrĩa marakara marĩkorũo mahĩtũkĩte.

Tondũ rĩrĩ, Yahweh nĩ gũka aroka kuuma handũ hake Gũciirithia aikari a bũrũri nĩ ũndũ wa ihĩtia rĩao, Naguo bũrũri nĩ ũkaaguũria ũiti waguo wa thakame Na ndũkahitha rĩngĩ andũ aguo arĩa moragĩtwo.”