Isaiya 27
Na rĩrĩ, mũthenya ũcio Yahweh, arĩ na rũhiũ rwake rwa njora rũũgĩ na rũnene na rũrĩ hinya, Nĩ akeerekeria meciria make harĩ Leviathani, nyoka ĩrĩa ĩthiaga ihenya, Amerekerie harĩ Leviathani, nyoka ĩrĩa ĩĩthioraga, Na orage nyamũ nene ĩrĩa ĩrĩ iria-inĩ.
Mũthenya ũcio mũkaainĩra mũndũ-wa-nja ũcio ũũ: “Mũgũnda wa mĩthabibũ ũrĩ na ndibei ĩrutĩte mũhũyũ!
Niĩ Yahweh, nĩ ngitagĩra mũndũ-wa-nja ũcio. Ngaũitĩrĩria maĩ hingo ciothe. Ndĩũgitagĩra ũtukũ na mũthenya, Nĩgetha hatikagĩe mũndũ o na ũrĩkũ ũkũwĩka ũũru.
Niĩ ndirĩ na marakara. Nũũ ũkũnjũkĩrĩra na ria na ihinga cia mĩigua mbaara-inĩ? Ngaacirangĩrĩria thĩ na ndĩcicine na mwaki irĩ hamwe ciothe.
No aga gwĩka ũguo, nĩ egitie biũ harĩ niĩ. Nĩ athondeke thayũ hamwe na niĩ; Thayũ nĩ athondeke hamwe na niĩ.”
Matukũ marĩa maroka Jakubu nĩ akaagĩa mĩri, Isiraeli nĩ akaaruta kĩro na athundũre, Na nĩ makaaiyũria bũrũri na maciaro.
Hihi no mũhaka agũthwo nĩ ũrĩa ũramũgũtha? Kana rĩrĩ, hihi no mũhaka oragwo o ta ũrĩa andũ ake makooragwo?
Nĩ ũkaahiũrania nake ũrĩ na mũgambo wa kũguoyohia rĩrĩa ũgaakorũo ũkĩmũingata. Nĩ akaamũingata na mũrurumo mũnene mũthenya wa rũhuho rwa mwena wa irathĩro.
Kwoguo na njĩra ĩyo mehia ma Jakubu nĩ makaahumbĩrũo, Na maya mothe nĩmo magaakorũo marĩ moimĩrĩro rĩrĩa mehia make makeeherio: Nĩ agaathondeka mahiga mothe ma kĩgongona O ta mahiga ma coka mathũkangĩtio, Na gũtirĩ mĩtĩ ya kũhoywo kana indo cia gũcinĩra ũbumba igaatigara.
Nĩ gũkorũo itũũra rĩrĩa rĩrĩ na ũgitĩri nĩ rĩgaatiganĩrio; Kũndũ gwa kũrĩithia nĩ gũgaatiganĩrio na kũrekererio o ta werũ. Kũu nĩkuo njaũ ĩkaarĩaga na ĩgakoma Na nĩ ĩkaarĩa honge ciakuo.
Rĩrĩa honge ciakuo igaakorũo ciũmĩte, Andũ-a-nja nĩ magooka na makahũre honge icio, Maakie mĩaki nacio. Nĩ gũkorũo andũ aya matirĩ na ũtaũku. Nĩkĩo Mũũmbi wao atakamaiguĩra tha, Na matigetĩkĩrĩka harĩ Ũrĩa wamombire.
Mũthenya ũcio Yahweh nĩ akaagũtha maciaro kuuma karũũĩ-inĩ karatherera ka Rũũĩ nginya Mũkuru-inĩ wa Misiri, na nĩ mũgaacokanĩrĩrio o mũndũ thutha wa ũrĩa ũngĩ, inyuĩ andũ a Isiraeli
Mũthenya ũcio coro mũnene nĩ ũkaahuuhwo, nao arĩa makiriĩ gũthira thĩinĩ wa bũrũri wa Ashuri na arĩa mahurunjũkĩte bũrũri-inĩ wa Misiri nĩ magooka na mainamĩrĩre Yahweh kĩrĩma-inĩ kĩrĩa kĩamũre thĩinĩ wa Yahrushalayim.