Isaiya 28

Kaĩ thũmbĩ ya mwĩyonanio ya arĩĩu a Efiraimu ĩrĩ na haaro-ĩ! O hamwe na ihũa rĩrĩa rĩrahooha rĩa ũthaka wayo mũnene, Rĩrĩa rĩrĩ mũtwe-inĩ wa mũkuru mũnoru wa arĩa matooretio nĩ ndibei!

Atĩrĩrĩ, Yahweh arĩ na mũndũ ũrĩ hinya na ũhoti. O ta mbura ya mbembe na marurumĩ, kĩhuhũkanio gĩa kũniinana, O ta mũrurumo wa mũiyũro mũnene wa maĩ, Nĩ akaamĩikia gũkũ thĩ na hinya mũingĩ.

Thũmbĩ cia mwĩyonanio cia arĩĩu a Efiraimu Nĩ ikaarangĩrĩrio thĩ na kũgũrũ.

Narĩo ihũa rĩu rĩrahooha rĩa ũthaka wayo mũnene, Rĩrĩa rĩrĩ mũtwe-inĩ wa mũkuru mũnoru, Rĩgaatuĩka o ta ngũyũ ĩrĩa yambaga kwĩruha, mbere ya hĩndĩ ya ũrugarĩ. Rĩrĩa mũndũ amĩona, amĩmeragia o na ihenya arĩkia kũmĩnyita na guoko gwake.

Mũthenya ũcio Yahweh mũnene wa ita nĩ agaatuĩka thũmbĩ ĩrĩ na riri na mahũa matumĩtwo ta thũmbĩ harĩ andũ ake arĩa magaatigara

Na nĩ agaatuĩka roho wa kĩhooto harĩ ũrĩa ũikaragĩra gĩtĩ gĩa gũtua ciira nao andũ arĩa magiragĩrĩria tharĩkĩro ya mbaara kĩhingo-inĩ nĩ akaamahe hinya.

O nao aya moraga njĩra nĩ ũndũ wa ndibei; Njohi ciao nĩ itũmaga matũgũge. Mũthĩnjĩri-Yahweh na mũnabii nĩ moraga njĩra nĩ ũndũ wa njohi; Ndibei ĩtũmaga matukanĩrũo, Na magatũgũga nĩ ũndũ wa njohi yao; Cioneki ciao nĩ imahĩngĩcaga, Na magatua matua moru.

Nĩ gũkorũo metha ciao ciyũire matahĩko moru mũno —Gũtirĩ handũ hatarĩ namo.

Nao maroria atĩrĩ, nĩ a ekũhe ũmenyo, Nĩ a egũtaarĩria ndũmĩrĩri ĩyo? Hihi nĩ arĩa maratigire kuonga, Arĩa mareheririo nyondo-inĩ?

Tondũ nĩ “Rĩathani rĩthingataine na Rĩathani! Ĩĩĩni, Rĩathani rĩthingataine na Rĩathani! Nĩ kamũhari gaka! Na kamũhari karĩa kangĩ! Kohoro kanini haha! Kohoro kanini harĩa!”

Nĩ ũndũ ũcio ekwarĩria andũ aya kũgerera kũrĩ arĩa matondoiraga na kũgerera rũthiomi rũgeni

Hĩndĩ ĩmwe aameerire ũũ: “Haha nĩ handũ ha kũhurũkĩra. Ũrĩa mũnogu nĩ ahurũke; haha nĩ handũ ha kũnogokera,” no nĩ maaregire kũigua.

Nĩ ũndũ ũcio kiugo kĩa Yahweh harĩ o gĩgaakorũo kĩrĩ: “Rĩathani rĩthingataine na Rĩathani! Rĩathani rĩthingataine na Rĩathani! Nĩ kamũhari gaka na kamũhari karĩa kangĩ! Na kohoro kanini haha na kohoro kanini harĩa!” Nĩguo hĩndĩ ĩrĩa megũthiĩ, Mahĩngwo na magũe na ngara Na moinĩke, magũe mũtego-inĩ na manyitwo.

Kwoguo iguai kiugo kĩa Yahweh inyuĩ andũ etĩi, Inyuĩ atongoria a andũ aya thĩinĩ wa Yahrushalayim,

Nĩ gũkorũo inyuĩ andũ aya mũroiga ũũ: “Nĩ tũgĩĩte kĩrĩkanĩro hamwe na Gĩkuũ, O na Mbĩrĩra nĩ tũiguithanĩirie nayo. Rĩrĩa mũiyũro mũnene ũgaatuĩkania, Ndũgatũkinyĩra, Tondũ nĩ tũtuĩte maheeni rĩũrĩro ritũ Na nĩ twĩhithĩte maheeni-inĩ.”

Nĩ ũndũ ũcio ũũ nĩguo Yahweh Mwathi ekuuga: “Nĩ ngũiga ihiga igerie rĩtuĩke mũthingi thĩinĩ wa Zayuni, Ihiga rĩa goro rĩa kona rĩtuĩke mũthingi wa kwĩhokeka. Gũtirĩ mũndũ wonanagia wĩtĩkio ũkaaigua guoya.

Na nĩ ngaatua kĩhooto rũrigi rwa gũthima Naguo ũthingu ndĩũtue kabirũ ga kũiganania. Mbura ya mbembe nĩ ĩkeeheria rĩũrĩro rĩa maheeni, Namo maĩ maarahe kũndũ gwa kwĩhitha.

Kĩrĩkanĩro kĩanyu na Gĩkuũ nĩ gĩkaaniinwo, O na kũiguithanĩria kwanyu na Mbĩrĩra gũtikeehanda. Rĩrĩa mũiyũro mũnene ũgaatuĩkania, Nĩ mũkaaniinwo nĩ guo.

Rĩrĩa rĩothe mũiyũro watuĩkania, Nĩ mũkaaniinwo nĩ guo; Tondũ ũgaatuĩkanagia o rũcinĩ o rũcinĩ, Mũthenya na ũtukũ. Na no kĩmako tu gĩgaatũma mataũkĩrũo nĩ maũndũ marĩa maiguĩtwo.”

Nĩ gũkorũo ũrĩrĩ nĩ mũkuhĩ mũno ũndũ mũndũ atangĩhota gwĩtambũrũkĩria ho, Na cuka wa gũtumwo nĩ mũceke mũno ũndũ mũndũ atangĩhota kwĩhumbĩra naguo biũ.

Tondũ Yahweh nĩ akaarahũka o ta ũrĩa eekire Kĩrĩma-inĩ gĩa Perazimu; Nĩ akaarahũka o ta ũrĩa eekire mũkuru-inĩ hakuhĩ na Gibeoni, Nĩguo eke mawĩko make—mawĩko make ma magegania— Na nĩguo arute wĩra wake—wĩra wake wa magegania.

Rĩu-rĩ, mũtikagĩe na kĩnyũrũri, Nĩguo mĩnyororo yanyu ndĩkanyitanyitio, Nĩ gũkorũo nĩ njiguĩte kuuma kũrĩ Mwathi, Yahweh mũnene wa ita, Atĩ bũrũri wothe nĩ ũciirĩirũo kũniinwo.

Tegai gũtũ mũigue mũgambo wakwa; Thikĩrĩriai mũigue ũrĩa nguuga.

Hihi mũrĩmi arĩmaga mũthenya wothe atekũhanda mbeũ? Hihi aikaraga o akĩhũũraga mũgũnda wake hianyũ akĩũhinyagia?

Arĩkia kwaragania mũgũnda-rĩ, Githĩ ndacokaga akahurunja kumini njirũ na akahanda kumini, Na githĩ ndahandaga ngano, mwere, na cairi harĩa ciagĩrĩire kũhandwo Na akahanda guthemethu ĩthiũrũrũkĩirie mĩhaka-inĩ?

Nĩ gũkorũo Kĩhoti nĩ amũrutaga na njĩra ĩrĩa yagĩrĩire; Kĩhoti wake nĩ amũtaaraga.

Tondũ kumini njirũ ndĩhũũragwo na rũbaũ rwa kũhũũra ngano, Na kũgũrũ gwa gakaari ga gũkururio gũtitwaragĩrũo igũrũ rĩa kumini. Handũ ha ũguo, kumini njirũ ĩhũũragwo na rũthanju, Nayo kumini ĩkahũũrũo na mũtĩ.

Hihi mũndũ nĩ athĩaga ngano nĩguo one mũgate? Aca, ndatindaga o akĩmĩhũũra; Na rĩrĩa aratwarithia kĩgaragari gĩa gakaari gake ga gũkururio igũrũ rĩayo hamwe na mbarathi ciake, Ndamĩthĩaga.

Ũndũ ũcio o naguo uumĩte kũrĩ Yahweh mũnene wa ita, O we ũtaaro wake ũkoragwo ũrĩ wa magegania Na o we ũhingagia maũndũ manene.