Isaiya 30

“Kaĩ ariũ arĩa aremi marĩ na haaro-ĩ,” ũguo nĩguo Yahweh ekuuga, “Arĩa mahingagia mĩbango ĩtarĩ yakwa, Arĩa mathondekaga ngwatanĩro, no ti na roho wakwa, Nĩgetha mongerere mehia harĩ mehia.

Maikũrũkaga magathiĩ Misiri matahoete ũtaaro kuuma kũrĩ niĩ, Nĩguo megitie harĩ ũgitĩri wa Firauni Na morĩre kĩĩruru-inĩ kĩa Misiri!

Ĩndĩ ũgitĩri wa Firauni ũgaatuĩka gĩconoko harĩ inyuĩ, Na nĩ mũgaaconorithio nĩ ũndũ wa kũũrĩra kĩĩruru-inĩ kĩa Misiri.

Nĩ gũkorũo anene ake marĩ Zoani, Nao atũmwo ake nĩ makinyĩte Hanesi.

Othe nĩ magaaconorithio Nĩ andũ matangĩmaguna, Andũ matangĩmahe ũteithio kana ũguni, O tiga gĩconoko na rũmena.”

Ĩno nĩ ndũmĩrĩri nditũ ĩgiĩ nyamũ cia mwena wa mũhuro: Kũgerera bũrũri wa mĩtangĩko na moritũ, Bũrũri ũrĩ mũrũthi, mũrũthi ũrararama, Bũrũri ũrĩ nyoka ĩrĩ thumu na nyoka ĩrombũka ĩrĩ na mwaki, Makuuaga ũtonga wao maũigĩrĩire ndigiri Nacio indo ciao magacikuua macigĩrĩire igũrũ rĩa maguku ma ngamĩra. No indo icio itikaaguna andũ.

Tondũ ũteithio wa bũrũri wa Misiri nĩ wa tũhũ mũtheri. Nĩkĩo ndĩwĩtĩte: “Rahabu, ũrĩa ũikaraga atekwĩnyagunyia.”

“Rĩu thiĩ, wandĩke ũhoro ũcio kĩhengere-inĩ makĩĩyonagĩra, Na ũwandĩke ibuku-inĩ, Nĩgetha ũkaahũthĩrũo ihinda rĩũkĩte Ũrĩ ũira wa gũtũũra.

Nĩ gũkorũo nĩ andũ aremi, ariũ a maheeni, Ariũ matendaga kũigua watho wa Yahweh.

Meraga arĩa monaga maũndũ atĩrĩ, ‘Tigai kuona,’ Na makeera arĩa monaga cioneki atĩrĩ, ‘Mũtigatwĩre cioneki cia ma. Twĩrei maũndũ ma gũtũkenia; Onai cioneki cia maheeni.

Eherai njĩra-inĩ; umai njĩra-inĩ ĩyo. Tigai gũtwĩra ũhoro wĩgiĩ Ũrĩa Mwamũre wa Isiraeli!’”

Nĩ ũndũ ũcio, ũũ nĩguo Ũrĩa Mwamũre wa Isiraeli ekuuga: “Tondũ nĩ mũregete kiugo gĩkĩ Na mũkehoka ũtunyani na maheeni Na mũgetiirania na maũndũ macio-rĩ,

Rĩhia rĩrĩ rĩgaatuĩka harĩ inyuĩ ta rũthingo rwatũku, O ta rũthingo rũraihu rũinamĩte rũrĩ hakuhĩ kũgũa. Rũkaagũa hinahi, o narua.

Rũgaatũkanga o ta ndigithũ nene ya rĩũmba, Rũkuange biũ ũũ atĩ gũtirĩ gĩcere o na kĩmwe kĩaruo gĩgaatigara Gĩa kweheria mwaki kuuma harĩa wakagĩrio O na kana gũtahia maĩ maria-inĩ.”

Nĩ gũkorũo ũũ nĩguo Yahweh Mwathi, o we Ũrĩa Mwamũre wa Isiraeli ekuuga: “Mwacoka kũrĩ niĩ na mũhurũke, nĩ mũkaahonoka; Hinya wanyu ũkoimana na inyuĩ gũikara mũhooreire na kuonania mwĩhoko.” No mũtiigana gwĩtĩkĩra.

Ithenya rĩa ũguo muoigire: “Aca, tũkoora tũhaicĩte mbarathi!” Kwoguo kũũra nĩ mũkoora. “Na tũkaahaica mbarathi irĩ na ihenya!” No arĩa makaamũteng’eria magaakorũo na ihenya.

Andũ ngiri makaainaina nĩ ũndũ wa kũmakio nĩ mũndũ ũmwe; Mũkoora nĩ ũndũ wa kũmakio nĩ andũ atano O nginya arĩa magaatigara gatagatĩ-inĩ kanyu makorũo matariĩ ta gĩtugĩ kĩrĩ handũ igũrũ rĩa kĩrĩma, O ta mũtĩ wa kũmenyithania ũrĩ karĩma igũrũ.

No Yahweh nĩ etereire akirĩrĩirie nĩguo amuonie ũtugi, Na nĩ ekwarahũka nĩguo amuonie tha. Nĩ gũkorũo Yahweh nĩ Kĩhoti ũtuanagĩra cira. Kũrathimwo nĩ arĩa othe maikaraga mamwetereire.

Rĩrĩa andũ magaatũũra Zayuni, thĩinĩ wa Yahrushalayim, ndũrĩ hĩndĩ ũkaarĩra. Nĩ agaakuonia ũtugi wamũrĩrĩra agũteithie; nĩ agaagũcokeria o hĩndĩ ĩyo akũigua

O na gũtuĩka Yahweh nĩ akaamũhe mĩtangĩko ĩrĩ ta mũgate na kũhinyĩrĩrio kũrĩ ta maĩ, Arutani aku matirĩ hĩndĩ makeehitha rĩngĩ, na nĩ ũkeeyonera Arutani aku na maitho maku

Namo matũ maku mwene nĩ makaaigua kiugo thutha waku gĩkiuga, “Ĩno nĩyo njĩra. Gerai thĩinĩ wayo,” mũngĩgakerũra mũgere mwena wa ũrĩo kana mũgere mwena wa ũmotho.

Na nĩ mũgaathahia betha ĩrĩa ĩhumbĩrĩte mĩhianano yanyu ya gwacũhio na thahabu ĩrĩa ĩhumbĩrĩte mĩhianano yanyu ya cuma. Mũkaamĩte o ta gĩtambaya kĩa mũndũ-wa-nja kĩa hĩndĩ ya mweri na mũmĩĩre ũũ, “Thiĩi na kũu!”

Na nĩ akaaheana mbura nĩ ũndũ wa mbegũ iria mũkaahanda, na irio iria thĩ ĩrutaga igaakorũo irĩ nyingĩ na njega. Mũthenya ũcio mahiũ maku makaarĩaga kũndũ kũrĩ ũrĩithio mwariĩ

Nacio ng’ombe o hamwe na ndigiri iria irĩmaga ikaarĩaga nyeki njega, ĩrĩa ĩhuuhĩtwo na gĩcakũri na hũma

Na kĩrĩma-inĩ o gĩothe kĩraya na karĩma gothe karaihu nĩ gũgaakorũo na tũrũũĩ na tũmĩtaro twa maĩ, mũthenya ũcio wa njũragano nene rĩrĩa nyũmba ndaya na igũrũ ikaagũa

Na ũtheri wa mweri ũgaatuĩka ta ũtheri wa riũa; naguo ũtheri wa riũa wongerereke maita mũgwanja, o ta ũtheri wa thikũ mũgwanja, mũthenya ũrĩa Yahweh akooha nguraro cia andũ ake na ahonie ironda njũru iria aamatihirie akĩmahũũra.

Na rĩrĩ, rĩĩtwa rĩa Yahweh rĩroka kuuma kũndũ kũraya, Rĩrahĩahĩa nĩ marakara make na rĩrĩ na matu maritũ. Mĩromo yake ĩiyũire mang’ũrĩ, Naruo rũrĩmĩ rwake rũtariĩ ta mwaki wa kũniinana.

Roho wake ũtariĩ ta karũũĩ kaiyũrĩte o nginya ngingo-inĩ, Nĩguo ainainie ndũrĩrĩ gĩcungi-inĩ kĩa mwanangĩko; Nacio ikundi cia andũ igaakorũo na mĩkwa thĩa-inĩ ciacio ya gũcihĩtithia njĩra.

Ĩndĩ rwĩmbo rwanyu rũgaakorũo rũtariĩ o ta rũrĩa rũinagwo ũtukũ rĩrĩa kũgomanĩtwo nĩ ũndũ wa Gĩathĩ kĩamũre, Nacio ngoro cianyu nĩ igaakena o ta mũndũ Ũrĩa ũthiaga na mũtũrirũ Arĩ njĩra-inĩ agĩthiĩ kĩrĩma-inĩ kĩa Yahweh, kũrĩ Rwaro rwa Ihiga rwa Isiraeli.

Yahweh nĩ agaatũma mũgambo wake mũnene ũiguĩke Na aguũrie guoko gwake gũgĩikũrũka na marakara manene, Na rũrĩrĩmbĩ rwa mwaki wa kũniinana, Na mbura nene na marurumĩ na mbura ya mbembe.

Nĩ gũkorũo nĩ ũndũ wa mũgambo wa Yahweh, Ashuri nĩ ĩkaanyitwo nĩ guoya; Akaamĩhũũra na rũthanju.

Na rĩrĩa rĩothe akaahiũria rũthanju rwake rwa kũherithania Rũrĩa Yahweh akaarehera Ashuri Rũgaatwaranaga hamwe na manyanga na inanda cia mũgeeto Akĩhiũria guoko gwake amokĩrĩre mbaara-inĩ.

Tondũ Tofethi yake nĩ haarĩrie; Ningĩ nĩ ĩhaarĩrĩirio nĩ ũndũ wa mũthamaki. Harĩa athondekete ha kũiga ngũ nĩ hariku na nĩ hariĩ, Na arĩ na mwaki mũnene na ngũ nyingĩ. Mĩhũmũ ya Yahweh, o ta karũũĩ ka ũbiriti, Nĩ ĩkũgwatia mwaki ũcio.