Isaiya 32

Na rĩrĩ, mũthamaki nĩ agaathamaka kũringana na ũthingu, Na anene maathane kũringana na matua ma cira marĩa marũngĩrĩru.

Na o ũmwe wao agaakoragwo atariĩ ta handũ ha kwĩhitha rũhuho, Handũ ha kwĩgitia mbura ya kĩhuhũkanio, O ta tũrũũĩ twa maĩ bũrũri-inĩ ũtarĩ maĩ, O ta kĩĩruru kĩa ndũmba nene ya ihiga bũrũri-inĩ mũng’aru.

Namo maitho ma andũ arĩa monaga matigaacoka kũhingwo rĩngĩ, Na matũ ma andũ arĩa maiguaga nĩ magaathikĩrĩria.

Ngoro cia andũ arĩa mekaga maũndũ matambĩte gwĩciria nĩ igecũrania ũhoro wa ũmenyo, Na rũrĩmĩ rũrĩa rũtondoiraga nĩ rũkaaria wega na njĩra ĩraiguĩka.

Mũndũ ũrĩa ũtarĩ wĩcirio ndagaacoka gwĩtwo mũndũ ũrĩ igweta, Kana mũitũ wa mũndũ wĩtagwo mũndũ mũtĩĩku;

Tondũ mũndũ ũrĩa ũtarĩ wĩcirio akaaria maũndũ matarĩ na kũrĩa marĩ, Na ngoro yake ĩthugunde maũndũ moru, Nĩgetha agaathĩrĩrie ũregenyũki na arie maũndũ moru megiĩ Yahweh, Atũme ũrĩa mũhũtu age kũheo irio Na aime ũrĩa mũnyotu kĩndũ gĩa kũnyua.

Njĩra cia gwĩka maũndũ cia Mũitũ wa mũndũ nĩ njũru; Agaathagĩrĩria mĩtugo ya thoni Nĩguo anange ũrĩa mũhinyĩrĩrĩku na ũhoro wa maheeni, O na rĩrĩa mũndũ ũrĩa mũthĩni aria maũndũ ma ma.

Ĩndĩ ũrĩa mũtaana akoragwo na mĩoroto ya ũtaana, Na akiragĩrĩria maũndũ-inĩ ma ũtaana.

“Atĩrĩrĩ inyuĩ andũ-a-nja aya mũtatindanagĩra na maũndũ, ũkĩrai na mũthikĩrĩrie mũgambo wakwa! Inyuĩ aarĩ aya mũtarĩ ũndũ mwĩtigagĩra, thikĩrĩriai ũrĩa ndĩroiga!

Ihinda-inĩ rĩa mwaka na thikũ itarĩ nyingĩ, inyuĩ mũtarĩ ũndũ mwĩtigagĩra nĩ mũkaainaina, Tondũ gũtirĩ maciaro magaakorũo macokanĩrĩirio rĩrĩa magetha ma thabibũ magaathira.

Inainai, inyuĩ andũ-a-nja aya mũtatindanagĩra na maũndũ! Thingithai, inyuĩ mũtarĩ ũndũ mwĩtigagĩra! Mwĩyaũrei nguo, Na mwĩhumbe nguo cia makũnia njohero-inĩ cianyu.

Hũũrai ithũri cianyu mũgĩcakayaga Nĩ ũndũ wa mĩgũnda ĩrĩa ya kwĩrirĩrio o na mũthabibũ ũrĩa ũrutaga maciaro maingĩ.

Nĩ gũkorũo bũrũri wa andũ akwa ũgaakorũo ũhumbĩrĩtwo nĩ mĩigua; Ĩkaahumbĩra nyũmba ciothe cia ikeno, O rĩo itũũra rĩa mwĩraho.

Tondũ nyũmba ĩrĩa ndaya na igũrũ ĩrĩ na ũgitĩri nĩ ĩtiganĩirio; Itũũra rĩrĩa rĩkinyanĩte andu gũkinyana nĩ itiganĩrie. Ofeli o na nyũmba ĩrĩa ndaya na igũrũ ya mũrangĩri ituĩkĩte kũndũ kwanangĩku na igũtũũra ũguo, Kũndũ kwendetwo nĩ ndigiri cia gĩthaka, Gwa kũrĩithio ndũũru,

Nginya rĩrĩa tũgaaitĩrĩrio roho kuuma igũrũ, Na werũ ũtuĩke mũgũnda wa matunda, Naguo mũgũnda wa matunda ũhaanane na mũtitũ.

Hĩndĩ ĩyo matua ma cira marũngĩrĩru magaatũũraga werũ-inĩ, Na ũthingu ũtũũre mũgũnda-inĩ wa matunda.

Moimĩrĩro ma ũthingu magaakorũo marĩ thayũ, Namo maciaro ma ũthingu magaakorũo marĩ ũhooreri na ũgitĩri tene na tene.

Andũ akwa magaatũũra handũ harĩ na thayũ, Kũndũ kũrĩ na ũgitĩri na kũndũ kũhooreru gwa kũhurũka.

Ĩndĩ mbura ya mbembe nĩ ĩkaaragania mũtitũ, Narĩo itũũra rĩigananio biũ.

Kũrathimwo nĩ inyuĩ mũkahandaga mbegũ ngiki-inĩ cia maĩ kũndũ guothe , na mũgeragĩrie ndegwa na ndigiri kuo.”