Isaiya 33

Kaĩ ũrĩ na haaro-ĩ, wee mũniinani ũtarĩ ũraniinwo; Wee mũkunyanĩri ũtarĩ ũrakunyanĩrũo! Rĩrĩa ũkaarĩkia kũniinana, nĩ ũkaaniinwo. Rĩrĩa ũkaarĩkia gũkunyanĩra, nĩ ũgaakunyanĩrũo.

Yahweh twagũthaitha ũtũiguĩre tha. Kĩĩrĩgĩrĩro gitũ kĩrĩ harĩ wee. Tuĩka guoko gwitũ o rũcinĩ, Ũtuĩke ũhonokio witũ hĩndĩ ya mĩtangĩko.

Rĩrĩa ikundi cia andũ ciaigua mũgambo wa ngũĩ nĩ kũũra ciũraga. Rĩrĩa warahũka, ndũrĩrĩ nĩ ihurunjũkaga.

O ta ũrĩa ngigĩ iria irĩ mũkoroko icokanagĩrĩra, noguo indo iria mũgaakorũo mũtahĩte igaacokanĩrĩrio; Andũ magaaciũmbĩrĩra o ta ikundi cia ngigĩ.

Yahweh nĩ atũũgĩrĩtio, Tondũ aikaraga igũrũ mũno. Nĩ aiyũrĩtie ũtui cira mũrũngĩrĩru na ũthingu thĩinĩ wa Zayuni.

Nĩwe ũtũmaga mahinda maku makorũo marũmĩte wega; Na ũingĩ wa ũhonokio, ũũgĩ, ũmenyo, na gwĩtigĩra Yahweh —Ũcio nĩguo mũthithũ wake.

Na rĩrĩ, njamba ciao irarĩrĩra barabara-inĩ; arekio ao a thayũ mararĩra na ruo rũingĩ.

Barabara iria nene nĩ itiganĩirio; Gũtirĩ mũndũ ũragerera njĩra-inĩ. Nĩ agĩte kũhingia kĩrĩkanĩro; Nĩ aregete matũũra; Ndarĩ mũndũ arũmbũyagia ũhoro wake.

Bũrũri nĩ ũracakaya na ũkahooha. Lebanoni nĩ ĩconokete; nĩ ĩbuthĩte. Sharoni ĩtuĩkĩte o ta werũ, Nacio Bashani na Karimeli igaita mathangũ ma cio.

“Rĩu nĩ ngwarahũka,” ũguo nĩguo Yahweh ekuuga, “Rĩu nĩ ngwĩtũũgĩria; Rĩu nĩ ngwĩyambararia.

Muohaga nda ya nyeki nyũmũ na mũgaciara mahuti. Roho wanyu ene ũkaamũniina o ta mwaki.

Na ikundi cia andũ igaatuĩka o ta coka ũcinĩtwo. Ikaagwatio mwaki o ta mĩigua ĩtemetwo.

Inyuĩ arĩa mũrĩ kũraya, tathikĩrĩriai ũrĩa ngwĩka! Na inyuĩ mũrĩ gũkuhĩ, ĩtĩkĩrai hinya wakwa!

Ehia arĩa marĩ Zayuni nĩ amaku; Aregenyũki nĩ manyitĩtwo nĩ kĩmako: ‘Nũũ gatagatĩ-inĩ gaitũ ũngĩikara handũ harĩ na mwaki wa kũniinana? Nũũ gatagatĩ-inĩ gaitũ ũngĩikarania na nĩnĩmbĩ cia mwaki ũtarahora?’

Nĩ ũrĩa ũthiaga na mĩthiĩre ya ũthingu hĩndĩ ciothe, Ũrĩa waragia maũndũ marũngĩrĩru, Ũrĩa ũreganaga na uumithio ũtarĩ wa kĩhooto, wa ũtunyani, Ũrĩa moko make maregaga kwamũkĩra ihaki handũ ha kũrĩgutha, Ũrĩa ũhingaga gũtũ gwake ndakaigue mĩario ya ũiti wa thakame, Na ũrĩa ũhingaga maitho make nĩguo etheme kuona maũndũ moru.

—Ũcio agaatũũra kũndũ kũrĩa gũtũũgĩru mũno; Rĩũrĩro rĩake irũmu rĩgaakorũo rĩrĩ mĩĩgitio ĩrĩ ndwaro-inĩ cia mahiga, Nĩ akaaheo mũgate, Na ndarĩ hĩndĩ akaaga maĩ.”

Maitho maku nĩ makoona mũthamaki arĩ riri-inĩ wake; Nĩ makoona bũrũri wa kũraya.

Ngoro-inĩ yaku nĩ ũkaaririkana ũndũ wa kũmakania: “Mwandĩki arĩ kũ? Arĩ kũ ũrĩa ũthimaga mbeca cia marĩhi? Arĩ kũ ũrĩa ũtaraga nyũmba iria ndaya na igũrũ?”

Andũ arĩa matarĩ gĩtĩo ndũkaamona rĩngĩ, Arĩa rũthiomi rwao rũrĩ hinya mũno gũtaũkĩka, O acio rũrĩmĩ rwao rũtondoiraga ũndũ ũtangĩtaũkĩrũo nĩ ũrĩa maroiga.

Ta rora Zayuni, itũũra rĩrĩa rĩa ciathĩ citũ! Maitho maku nĩ makoona Yahrushalayim ĩrĩ kũndũ kũhooreru gwa gũtũũra, Hema ĩtakeherio. O na mĩcumarĩ yayo ya hema ndĩrĩ hĩndĩ ĩgaacomorũo, Na gũtirĩ mĩkwa yayo ĩgaatuangwo.

No kũu, nĩkuo Yahweh atuĩkĩte mũnene harĩ ithuĩ; Kũndũ kwĩ njũũĩ njariĩ, gũkagĩa na tũrũũĩ tũratherera, Na gũtirĩ gatarũ gathiagĩra kuo, Kana meri nene ikahĩtũkĩra kuo.

Nĩ gũkorũo Yahweh nĩwe Mũtuanĩri Ciira witũ, Yahweh nĩwe Mũheani Watho harĩ ithuĩ, Yahweh nĩwe Mũthamaki witũ; Nĩwe ũgaatũhonokia.

Mĩkwa yaku ĩgaacunjura ĩregerete; Ndĩngĩhota kũnyitĩrĩra gĩtugĩ kana gũtambũrũkia gĩtambaya kĩa meri. Hĩndĩ ĩyo indo nyingĩ iria igaakorũo itahĩtwo nĩ ikaagayanwo; O na arĩa mathuaga nĩ magaakuua indo nyingĩ cia gũtahwo.

Na gũtirĩ mũikari wakuo ũkoiga: “Ndĩ mũrũaru.” Andũ arĩa magaatũũra bũrũri ũcio nĩ makoherũo mehia mao!