Isaiya 35

Na rĩrĩ, werũ na bũrũri ũrĩa mũng’aru nĩ igaakena mũno, Werũ ũrĩa mwaraganu nĩ ũgaakena na ũcanũke ta mahũa ma nyeki-inĩ.

Hatarĩ nganja werũ nĩ ũgaacanũka; Nĩ ũgaakena na ũine nyĩmbo cia mũkũngũiyo. Nĩ ũkaaheo riri wa Lebanoni, Ũgemu wa Karimeli na wa Sharoni. Nao nĩ makoona riri wa Yahweh, ũgemu wa Kĩhoti witũ.

Ĩkĩrai hinya moko marĩa matarĩ hinya, Namo maru marĩa marainaina mũtũme mehande wega.

Ĩrai arĩa marĩ na mĩtangĩko ngoro atĩrĩ: “Gĩai na hinya. Mũtigetigĩre. Atĩrĩrĩ, Kĩhoti wanyu nĩ agooka amũrĩhĩrie harĩ thũ cianyu, Kĩhoti nĩ agooka nĩguo aherithanie. Nĩ agooka na amũhonokie.”

Hĩndĩ ĩyo maitho ma atumumu nĩ makaahingũrũo, Na matũ ma arĩa mataiguaga nĩ makaaigua.

Hĩndĩ ĩyo mũndũ ũrĩa ũthuaga akaarũgarũga o ta thwariga, Na rũrĩmĩ rwa ũrĩa ũtahotaga kwaria rwanĩrĩre nĩ gũkena. Tondũ maĩ nĩ magaakunũka werũ-inĩ, Na tũrũũĩ tũkunũke werũ-inĩ mwaraganu.

Kũndũ kũrĩa kũrĩ ũrugarĩ na kũng’aru gũgaatuĩka karia karĩ na mathanjĩ, Na kũndũ kũrĩa kũng’aru gũtuĩke matherũkĩro ma maĩ. Imamo-inĩ iria ngui cia gĩthaka ciahurũkaga, Gũgaakorũo na nyeki nduru na mathanjĩ na marura.

Na nĩ gũgaakorũo na barabara nene, Barabara ĩtagwo Njĩra ĩrĩa Nyamũre . Mũndũ ũrĩa ũtarĩ mwamũre ndakamĩgera. Barabara ĩyo nĩ ya mũndũ ũrĩa ũgeragĩra thĩinĩ wayo; Gũtirĩ mũndũ o na ũmwe mũkĩgu ũkaahĩtania agere thĩinĩ wayo.

Gũtirĩ mũrũthi ũgaakorũo kuo, Na gũtirĩ nyamũ njũru ya gĩthaka ĩgooka thĩinĩ wayo. Itikooneka kuo; Andũ arĩa makũũrĩtwo no o tu makaamĩgerera.

Arĩa makũũrĩtwo nĩ Yahweh nĩ magaacoka na moke Zayuni magĩkũngũyagia . Gĩkeno gĩtarathira gĩgaatuĩka thũmbĩ mĩtwe-inĩ yao. Magaakorũo na gĩkeno na ndũhiũ, Na kĩeha na gũcaya nĩ igaathira biũ.