Isaiya 46

Na rĩrĩ, Beli nĩ ĩhocereire, nayo Nebo ĩgekũnja. Mĩhianano yacio ĩigĩrĩirũo igũrũ rĩa nyamũ, nyamũ cia gũkuua mĩrigo, O ta mĩrigo ĩrĩa ĩritũhagĩra nyamũ iria inogete.

Irekũnja na ikahocerera irĩ hamwe; Itingĩhota kũhonokia mĩrigo ĩyo, Nacio nyene nĩ gũtwarũo iratwarũo ithamĩrio-inĩ.

“Ta thikĩrĩriai, inyuĩ nyũmba ya Jakubu, na inyuĩ arĩa othe matigarĩte a nyũmba ya Isiraeli, O inyuĩ arĩa ndũire ndiirĩrĩire kuuma rĩrĩa mwaciarirũo na ngamũkuua kuuma rĩrĩa mwarĩ nda thĩinĩ.

O nginya rĩrĩa mũgaakũra ngũtũũra ndĩ o ũrĩa ũmwe; O nginya rĩrĩa mũkaagĩa mbuĩ ngũtũũra ndĩmũnyitĩrĩire. O ta ũrĩa ngoretwo ngĩka, nĩ ngaamũkuua na ndĩmũnyitĩrĩre na ndĩmũhonokie.

Niĩ-rĩ, mũngĩĩhaanania na ũ kana mũngĩnjiganania na ũ kana mũningithanie na ũ, Atĩ nĩguo tũhaanane nake?

Nĩ kũrĩ andũ maitũrũraga thahabu kuuma mondo-inĩ ciao; Magathima betha ratiri igũrũ. Makarĩha mũturi wa cuma, nake agacithondeka igatuĩka El. Nao magacoka magaturumithia mĩtwe yao thĩ, makamĩthathaiya.

Mamĩoyaga makamĩigĩrĩra ciande-inĩ ciao; Makamĩkuua na makamĩiga harĩa ĩrĩikaraga, nayo ĩgaikara ĩrũgamĩte o hau. Ndĩhotaga kuuma handũ hau ĩigĩtwo. Mamĩkayagĩra, no ndĩcokagia; Ndĩngĩhota kũhonokia mũndũ o na ũmwe kuuma mĩtangĩko-inĩ.

Ririkanai ũndũ ũyũ, na mũgĩe na ũmĩrĩru. Igaai ũndũ ũyũ ngoro-inĩ, inyuĩ andũ aya ehia.

Ririkanai maũndũ marĩa mahĩtũkĩte ma tene, Atĩ niĩ nĩ niĩ El, na gũtirĩ ũngĩ. Niĩ nĩ niĩ Kĩhoti, na gũtirĩ ũngĩ ũhaana ta niĩ.

Kuuma kĩambĩrĩria nĩ menyithanagia maũndũ marĩa mageekĩka, Na ngamenyithania kuuma o tene maũndũ marĩa matarĩ marekĩka. Ngoiga atĩrĩ, ‘Itua rĩakwa nĩ rĩgaatũũra, Na nĩ ngeeka ũrĩa wothe ndĩrenda.’

Nĩ ngwĩta nyoni ndĩa nyama kuuma mwena wa irathĩro, Njĩte mũndũ kuuma bũrũri wa kũraya nĩguo ahingie itua rĩakwa. Nĩ niĩ njugĩte ũndũ ũcio, na nĩ ngaatũma wĩkĩke. Nĩ niĩ nduĩte gwĩka ũndũ ũcio, na nĩ ngaaũhingia.

Ta thikĩrĩriai, inyuĩ andũ a ngoro nyũmũ, Inyuĩ mũraihanĩrĩirie na ũthingu.

Ũthingu wakwa nĩ ndĩũrehete hakuhĩ; Ndũrĩ kũraihu, Naguo ũhonokio wakwa ndũgaacererũo. Nĩ ngaahonokia Zayuni, na ũgemu wakwa ndĩũhe Isiraeli.”