Isaiya 49
Ta thikĩrĩriai, inyuĩ hũgũrũrũ ici cia iria, Tegai matũ, inyuĩ ndũrĩrĩ kuma bũrũri wa kũraya. Yahweh nĩ aanjĩtĩte o na itarĩ mũciare. Kuuma rĩrĩa ndarĩ nda ya maitũ nĩ aagwetaga rĩĩtwa rĩakwa.
Nĩ aatũmire kanua gakwa kahaane o ta rũhiũ rũũgĩ rwa njora; Nĩ aahithĩte kĩĩruru-inĩ gĩa guoko gwake. Nĩ aathondekire ngĩtuĩka o ta mũguĩ mũnyorokie; Nĩ aahithire thiaka-inĩ wake.
Aanjĩrire ũũ: “Wee nĩwe ndungata yakwa, o wee Isiraeli, Ndungata ĩrĩa ngaahũthĩra kuonania ũgemu wakwa.”
No ngiuga atĩrĩ: “Ndĩĩnogetie tũhũ! Ndahũthĩrire hinya wakwa ũndũ-inĩ ũtarĩ wa ma, wa tũhũ. No hatarĩ nganja cira wakwa ũrĩ na Yahweh, Na mũcara wakwa ũrĩ na Kĩhoti wakwa.”
Na Yahweh, o we Ũrĩa wanyũmbire kuuma rĩrĩa ndarĩ nda thĩinĩ nĩguo nduĩke ndungata yake, Nĩ oigĩte atĩ nĩ ngaacokia Jakubu kũrĩ we, Nĩguo Isiraeli acokanĩrĩre harĩ we. Nĩ ngaagoocithio maitho-inĩ ma Yahweh, Na Kĩhoti wakwa akoretwo arĩ Hinya wakwa.
Nake akiuga ũũ: “Ti kũiganu tu gũkorũo ũrĩ ndungata yakwa Nĩguo warahũre mĩhĩrĩga ya Jakubu Na ũcokie arĩa maahonokirio a Isiraeli. No ningĩ nĩ ngũheanĩte ũtariĩ ta ũtheri kũrĩ ndũrĩrĩ, Nĩguo ũhonokio wakwa ũkinye nginya ituri-inĩ cia thĩ.”
Yahweh o we Mũkũũri wa Isiraeli, Ũrĩa Mwamũre wake, ekuuga ũũ kũrĩ ũrĩa ũnyararĩtwo, kũrĩ ũrĩa ũthũũrĩtwo nĩ rũrĩrĩ, kũrĩ ndungata ya athani: “Athamaki nĩ makoona na maarahũke, Nao anene nĩ makaainamĩrĩra Nĩ tondũ wa Yahweh, ũrĩa ũtũire e mwĩhokeku, Ũrĩa Mwamũre wa Isiraeli, ũrĩa ũgũthuurĩte.”
Ũũ nĩguo Yahweh oigĩte: “Hĩndĩ ya gwĩtĩkĩrĩka nĩ ndagũcokeirie ũhoro, Na mũthenya wa ũhonokio nĩ ndagũteithirie; Ndaikarire ngĩkũgitagĩra nĩguo ngũneane ũtariĩ ta kĩrĩkanĩro nĩ ũndũ wa andũ, Nĩguo ũthondeke bũrũri rĩngĩ, Na ũtũme megwatĩre igai rĩao rĩrĩa rĩanangĩku,
Nĩguo wĩre arĩa mohetwo atĩrĩ, ‘Umai mũthiĩ!’ Na arĩa marĩ nduma-inĩ ũmeere atĩrĩ, ‘Umĩrai!’ Nao makaarĩagĩra njĩra-inĩ, Njĩra-inĩ ciothe iria itarĩ kĩndũ nĩkuo makaarĩithagio.
Matikaahũta kana manyote, O na ũrugarĩ mũnene kana riũa rĩtikaamacina. Nĩ gũkorũo Ũrĩa ũmaiguagĩra tha nĩ akaamatongoria, Na amatware matherũkĩro-inĩ ma maĩ.
Irĩma ciakwa ciothe nĩ ngaacitua njĩra, Nacio barabara ciakwa iria nene nĩ ikaambatĩrio.
Toonei! Aya maroka kuuma kũndũ kũraya! Na rĩrĩ, aya nao maroima mwena wa rũgongo na wa ithũĩro, Nao aya makoima bũrũri wa Sinimu!”
Anĩrĩra nĩ gĩkeno, wee igũrũ, na ũkene, wee thĩ. Irĩma nĩ icanjamũke na cianĩrĩre ikenete! Nĩ gũkorũo Yahweh nĩ omĩrĩirie andũ ake, Nao andũ ake arĩa ahinyĩrĩrĩku nĩ amaiguagĩra tha.
No Zayuni yugaga atĩrĩ: “Yahweh nĩ andiganĩirie, Yahweh nĩ ariganĩirũo nĩ niĩ.”
Hihi nyina wa kana no ariganĩrũo nĩ kaana karĩa arongithia Kana age kũiguĩra tha mũrũwe ũrĩa woimire nda yake? O na atumia acio mangĩriganĩrũo, niĩ ndirĩ hĩndĩ ingĩriganĩrũo nĩwe.
Kĩyoonere! Nĩ ngũcongete hĩ-inĩ ciakwa. Nacio thingo ciaku ikoragwo mbere yakwa hingo ciothe.
Ariũ aku maracoka mahiũhĩte. Arĩa maakũnyaririre na magĩkwananga nĩ magaakweherera.
Tiira maitho maku ũrore kũndũ guothe. Othe maracokanĩrĩra hamwe. Maroka kũrĩ wee. Yahweh ekuuga ũũ, “O ta ũrĩa ndũũraga muoyo, Ũkaamehumba othe o ta mathaga, Na ũmeyohe ũmanyitĩtie o ta ũrĩa mũhiki ekaga.
O na gũtuĩka kũndũ gwaku nĩ kwaanangĩtwo na gũgatiganĩrio na bũrũri waku ũgathũkangio, Nĩ gũgaakundera kwage kũiganĩra andũ arĩa magaaikara kuo, Nao arĩa maakũmeretie magaakorũo kũraya nawe.
Ariũ arĩa maaciarirũo hĩndĩ ĩyo wakuĩrĩirũo nĩ makooiga ũũ ũkĩiguaga, ‘Handũ haha nĩ hanini ndiraiganĩra. Thondekera handũ hangĩ ha gũikara gũkũ.’
Na nĩ ũkooria atĩrĩ ngoro-inĩ yaku, ‘Ithe wa aya-rĩ, nũũ, Nĩ gũkorũo ndĩ mũndũ-wa-nja ũkuĩrĩirũo nĩ ciana na ndĩ thata, Na ndwarĩtwo ithamĩrio ndĩ mũndũ wohetwo? Nũũ warerire aya? Oneei! Ndatigirũo ndĩ wiki, Kwoguo-rĩ, aya moimĩte kũ?’”
Ũũ nĩguo Yahweh Mwathi ekuuga: “Tarorai! Nĩ ngwambararĩria ndũrĩrĩ guoko gwakwa, Nĩ ngwambararĩria ikundi cia andũ kĩmenyithia gĩakwa. Na nĩ makaarehe ariũ aku mamanyitĩte na moko mao Na makuue airĩtu aku na ciande ciao.
Athamaki nĩ magaatuĩka a gũkũrũmbũiya, Nao airĩtu ao matuĩke a gũgũtumberia. Nĩ magaakũinamĩrĩra maturumithĩtie mothiũ mao thĩ Na macũne rũkũngũ rwa magũrũ maku, Na nĩ ũkaamenya atĩ niĩ nĩ niĩ Yahweh; Arĩa maigaga kĩĩrĩgĩrĩro kĩao harĩ niĩ matigaaconorithio.”
Hihi arĩa manyitĩtwo mĩgwate no marutwo kuuma harĩ njamba ĩrĩ hinya, Kana hihi arĩa matahĩtwo nĩ mũndũ mũhinyanĩrĩria mahonokio?
No Yahweh oigĩte ũũ: “O na arĩa matahĩtwo nĩ njamba karaũ nĩ makaarutwo ho, Nao arĩa matahĩtwo nĩ mũndũ mũhinyanĩrĩria nĩ makaahonokio. Nĩ ngaaregana na arĩa mareganaga nawe, Na nĩ ngaahonokia ariũ aku mwene.
Nĩ ngaatũma arĩa mamũhinyagĩrĩria marĩe nyama cia mĩĩrĩ yao ene, Na o ta ũrĩa ndibei ĩrĩ cama ĩrĩĩaga mũndũ, makaarĩĩo nĩ thakame yao ene. Na andũ othe nĩ makaamenya atĩ niĩ nĩ niĩ Yahweh, Mũhonokia waku na Mũkũũri waku, Ũrĩa ũrĩ Hinya wa Jakubu.”