Isaiya 50
Yahweh ekuuga atĩrĩ: “Marĩ kũ marũa ma ndigano ma maitũguo, ũrĩa ndaingatire? Kana hihi ndakwendirie harĩ ũ gatagatĩ-inĩ ka arĩa ndarĩ na thiirĩ wao? Tarora wone, weendirio nĩ ũndũ wa mahĩtia maku mwene, Na maitũguo aaingatirũo nĩ ũndũ wa mehia maku mwene.
Nĩ kĩĩ gĩagĩtũmire gũkũ kwage mũndũ rĩrĩa ndokire? Nĩ kĩĩ gĩatũmire haage mũndũ ũgwĩtĩka rĩrĩa ndetanire? Hihi guoko gwakwa nĩ gũkuhĩha gũkuhĩhĩte ũndũ gũtangĩhota gũkũũra, Kana hihi ndirĩ na hinya wa kũhonokania? Tarora, niĩ nĩ ndũmaga iria rĩhũe kũgerera uuge wakwa; Nĩ ndũmaga njũũĩ ituĩke werũ. Thamaki ciakuo ikabutha nĩ ũndũ wa kwaga maĩ, Na igakua nĩ ũndũ wa kũnyota.
Igũrũ ndĩrĩhumbaga nduma, Na ngatua nguo ya ikũnia taama warĩo wa kwĩhumbĩra.”
Yahweh Mwathi nĩ aheete niĩ rũrĩmĩ rwa arĩa marutĩtwo maũndũ, Nĩgetha menyage ũrĩa batiĩ gũcokeria ũrĩa mũnogu na kiugo kĩrĩa kĩagĩrĩire. Anjũkĩragia rũcinĩ o rũcinĩ; Okĩragia gũtũ gwakwa gũthikĩrĩrie o ta arĩa marutĩtwo maũndũ.
Yahweh Mwathi nĩ ahingũrĩte gũtũ gwakwa, Na niĩ ndiarĩ mũremi. Ndiigana kwĩhũgũra na kũngĩ.
Ndaneanire mũgongo wakwa kũrĩ arĩa maahũũraga Na ngĩneana makai makwa kũrĩ arĩa maamunyire nderu. Ndiahithire ũthiũ wakwa ndũgekwo maũndũ ma gĩconoko na gũtuĩrũo mata.
Ĩndĩ Yahweh Mwathi nĩ ekũndeithia. Nĩkĩo ndirĩ hĩndĩ ingĩigua njonokete. Nĩkĩo ndũmĩte ũthiũ wakwa ũhaane o ta ihiga rĩũmũ, Na nĩ njũĩ atĩ ndigaconorithio.
Ũrĩa ũnduaga mũthingu arĩ hakuhĩ. Nũũ hihi ũngĩĩthitanga? Nĩ tũkĩrũgame hamwe. Nũũ ũrĩ na cira na niĩ? Nĩ oke kũrĩ niĩ.
Na rĩrĩ, Yahweh Mwathi nĩ ekũndeithia. Nũũ hihi ũkoiga atĩ nĩ njĩhĩtie? Toone! Othe magaathira o ta nguo. Makaarĩo nĩ memenyi.
Nũũ gatagatĩ-inĩ kanyu wĩtigĩrĩte Yahweh Na agathikĩrĩria mũgambo wa ndungata yake? Nũũ wanagerera nduma-inĩ ndumanu, gũtarĩ na ũtheri o na mũnini? Nĩ ehokage rĩĩtwa rĩa Yahweh na egiritanagie na Kĩhoti wake.
“Mwĩrorerei! lnyuĩ inyuothe mũrakia mwaki, Na mũgatũma thandĩ ciũmbũke, Gererai ũtheri-inĩ wa mwaki wanyu, Gatagatĩ-inĩ ga thandĩ icio mwakĩtie. Ũndũ ũyũ nĩguo mũkaamũkĩra kuuma guoko-inĩ gwakwa: Mũgaakoma thĩ mũrĩ na ruo rũingĩ.