Isaiya 52

Arahũka! Arahũka! Wĩhumbe hinya, wee Zayuni! Wĩhumbe nguo ciaku iria thaka, wee Yahrushalayim, itũũra rĩrĩa rĩamũre! Nĩ gũkorũo gũtirĩ hĩndĩ mũndũ ũtarĩ mũruu na ũrĩa ũtarĩ mwamũre magaacoka gũtonya thĩinĩ waku.

Wĩribaribe rũkũngũ, ũkĩra na ũikarĩre gĩtĩ, wee Yahrushalayim. Wĩyohore mĩnyororo ĩyo ĩrĩ ngingo-inĩ yaku, wee mwarĩ wa Zayuni ũnyitĩtwo mĩgwate.

Nĩ gũkorũo ũũ nĩguo Yahweh ekuuga: “Mwendirio mũtarutĩirũo kĩndũ, Na mũgaakũũrũo mũtarutĩirũo betha.”

Nĩ gũkorũo Yahweh Mwathi oigĩte ũũ: “Tene andũ akwa nĩ maaikũrũkire Misiri gũikara kuo marĩ ta ageni; Thutha ũcio Ashuri ĩkĩmahinyĩrĩria hatarĩ gĩtũmi.”

“Rĩu njagĩrĩirũo gwĩka atĩa?” ũguo nĩguo Yahweh ekuuga. “Nĩ gũkorũo andũ akwa maatahirũo o ũguo tũhũ. Nao arĩa mathanaga igũrũ rĩao no kwanĩrĩra managĩrĩra nĩ ũhootani,” ũguo nĩguo Yahweh ekuuga, “Na hĩndĩ ciothe, mũthenya wothe, rĩĩtwa rĩakwa nĩ rĩagagĩrũo gĩtĩo.

Nĩ ũndũ ũcio andũ akwa nĩ makaamenya rĩĩtwa rĩakwa; Nĩ ũndũ ũcio mũthenya ũcio nĩ makaamenya atĩ niĩ nĩ niĩ njugĩte ũguo. Ĩni, nĩ niĩ njugĩte ũguo!”

Kũu irĩma igũrũ-rĩ, magũrũ ma ũrĩa ũrehaga ũhoro mwega kaĩ nĩ magĩrĩire-ĩ, Ũrĩa ũhunjagia ũhoro wa thayũ, Ũrĩa ũrehaga ũhoro mwega wa ũndũ mwagĩrĩru makĩria, Ũrĩa ũhunjagia ũhoro wa ũhonokio, Ũrĩa wĩraga Zayuni ũũ: “Kĩhoti waku nĩ atuĩkĩte Mũthamaki!”

Tathikĩrĩria! Arangĩri aku nĩ kwanĩrĩra maranĩrĩra. Maroigĩrĩria marĩ hamwe nĩ gĩkeno, Nĩ gũkorũo nĩ makeeyonera wega, ũthiũ kwa ũthiũ rĩrĩa Yahweh agaacoka Zayuni rĩngĩ.

Kenai, anĩrĩrai mũkenete mũrĩ hamwe, inyuĩ mwanangĩko wa Yahrushalayim, Nĩ gũkorũo Yahweh nĩ omĩrĩirie andũ ake; nĩ akũũrĩte Yahrushalayim.

Yahweh nĩ aguũrĩtie guoko gwake kwamũre mbere ya maitho ma ndũrĩrĩ ciothe; Ituri ciothe cia thĩ nĩ ikoona ciĩko cia kũhonokania cia Kĩhoti witũ.

Eheherai! Eheherai, umai kuo, mũtikahutie kĩndũ gĩtarĩ kĩamũre! Umai thĩinĩ wake, ikarai mũrĩ amũre, Inyuĩ mũkuuaga indo cia Yahweh.

Nĩ gũkorũo mũtikoima kuo mũrĩ na guoya, O na mũtikabatara kũũra, Nĩ gũkorũo Yahweh nĩ agaathiĩ arĩ mbere yanyu, Na Kĩhoti wa Isiraeli nĩ agaakorũo arĩ thutha wanyu amũgitĩire.

Taineii! Ndungata yakwa nĩ ĩgeeka maũndũ na ũũgĩ. Nĩ ĩkaambarario na igũrũ, Nĩ ĩkaanenehio na ĩtũũgĩrio mũno.

O ta ũrĩa andũ maamĩrorire magegete —Tondũ mũhianĩre wayo nĩ wathũkangĩtio gũkĩra wa mũndũ ũngĩ o wothe Na mũũmbĩre wayo mwega ũgathũkio gũkĩra wa andũ—

Ũguo noguo ĩkaamakia ndũrĩrĩ. Athamaki nĩ makaahinga tũnua twao mbere yayo, Tondũ nĩ makoona maũndũ marĩa matarĩ merũo Na mecirie ũhoro wa maũndũ marĩa matarĩ maigua.