Isaiya 53

Nũũ ũgĩĩtĩkĩtie ndũmĩrĩri itũ? Na ha ũhoro wa guoko kwa Yahweh-rĩ, hihi nũũ ũguũrĩirio?

Athundũkire o ta thuuna arĩ mbere yake, o ta mũri ũrathundũka bũrũri-inĩ mũng’aru. Ndaarĩ kĩĩrorerwa, kana ũgemu o wothe atĩ tũmwĩhokage, o na mũhianĩre wake ndũtũgucagĩrĩria harĩ we.

Nĩ aanyararĩtwo na akaregwo nĩ andũ, Mũndũ wĩna ruo rũingĩ na akamenya ndwari nĩ kĩĩ. Nĩ ta ũthiũ wake wahithĩtwo tũtikae kũwona. Nĩ aanyararĩtwo, na ithuĩ tũkĩmuona ta atarĩ kĩene.

Ti itherũ we mwene nĩ aakuuire mĩrimũ itũ, Na agĩkuua ruo rwitũ. No ithuĩ twamuonaga ahaana mũndũ mũhũũre, ũgũthĩtwo na akanyamario nĩ Kĩhoti.

No aathecirũo nĩ ũndũ wa Wagarari watho witũ; Akĩhehenjwo nĩ ũndũ wa mahĩtia maitũ. Akĩherithio nĩguo ithuĩ tũkorũo na thayũ, Na nĩ ũndũ wa mĩtũnda yake ithuĩ nĩ tũhonetio.

Ithuothe nĩtũũrĩte, tũgaturura o ta ng’ondu, O mũndũ athiĩte na njĩra yake, Na Yahweh nĩ amũkuithĩtie mahĩtia maitũ ithuothe.

Nĩ aahinyĩrĩirio na akĩnyarirĩka, No ndaigana gũtumũra kanua gake. Aatwarirũo o ta kagondu gagĩthiĩ gũthĩnjwo, O ta ng'ondu ĩkirĩte ĩrĩ mbere ya arĩa maramĩenja, Na ndaigana gũtumũra kanua gake.

Nĩ arutirwo kĩoho-inĩ na ituĩro rĩrũngĩrĩru nĩ eehereirio; Na nũũ ũngĩrũmbũyania na ũhoro wa rũciaro rwake, Nĩ gũkorũo nĩ eeheririo bũrũri-inĩ wa arĩa marĩ muoyo; Tondũ wa kwagarara watho kwa andũ akwa akĩhũũrũo iboko.

Na akĩheo handũ ha gũthikwo hamwe na andũ aganu, Na hamwe na itonga hĩndĩ ya gĩkuũ gĩake, Tondũ ndarĩ ũndũ mũũru wa ũhinya eekĩte Na gũtirĩ ũndũ wa maheeni wonekire kanua-inĩ gake.

Ĩndĩ warĩ wendi wa Yahweh kũmũhehenja, na akĩmũrehere ndwari. Nĩgetha atĩ angĩkorũo nĩ ekũneana muoyo wake ũrĩ igongona rĩa mehia, nĩ akoona mbeũ, nĩ akoongerera matukũ make, Na kũgerera harĩ we wendi wa Yahweh ũgaacĩre guoko-inĩ gwake.

Kumana na mĩtangĩko ya mũtũrĩre wake, nĩ akoona utheri na aiganĩre. Kũgerera ũmenyo wake, ndungata ĩyo yakwa thingu, Nĩ ĩgaatũma andũ aingĩ matuwo athingu, Na ĩkuage mehia mao.

Tondũ wa ũguo nĩ ngaamũhe handũ gatagatĩ-inĩ ka andũ marĩ igweta, Na nĩ akaagayana indo cia gũtahwo hamwe na andũ arĩa marĩ hinya, Tondũ nĩ aarutire muoyo wake nginya agĩkua, Na agĩtaranĩrio hamwe na agarari Watho, Agĩkuua mehia ma andũ aingĩ, Na agĩthaithanĩrĩra andũ arĩa agarari Watho.