Isaiya 54

“Ina rwĩmbo, wee mũtumia ũyũ thata ũtarĩ wagĩa ciana! Canjamũka na wanĩrĩre nĩ gũkena, wee ũtarĩ waigua ruo rwa kũgĩa mwana, Nĩ gũkorũo ariũ a ũrĩa ũtiganĩirio nĩ aingĩ Gũkĩra ariũ a mũndũ-wa-nja ũrĩa wĩ na mũthuri,” ũguo nĩguo Yahweh oigĩte.

“Aramia handũ harĩa hema yaku ĩrĩ. Tambũrũkia itambaya cia gĩikaro gĩaku kĩrĩa kĩamũre na kĩrĩ riri. Ndũkareke ũndũ ũkũgirĩrĩrie, raihia tũmĩkanda twa hema yaku, Na ũrũmie mĩcumarĩ ya hema yaku.

Nĩ gũkorũo nĩ ũgaatherema mwena wa ũrĩo na wa ũmotho. Rũciaro rwaku nĩ rũkegwatĩra ndũrĩrĩ, Na nĩ rũgaatũũra matũũra-inĩ marĩa matiganĩirio.

Ndũgetigĩre, tondũ ndũgaaconorithio; Na ndũkaigue ũconokete, tondũ ndũrĩ hĩndĩ ũgaakua ngoro. Nĩ gũkorũo nĩ ũkaariganĩrũo nĩ gĩconoko kĩa ũnyinyi waku, Na ndũkaaririkana rĩngĩ kĩnyũrũri gĩa gũkorũo ũrĩ mũtumia wa ndigwa.”

“Nĩ gũkorũo Mũũmbi Waku nĩ ta arĩ we mũthuri waku, Rĩĩtwa rĩake nĩ Yahweh mũnene wa ita, Nake Ũrĩa Mwamũre wa Isiraeli nĩwe Mũkũũri waku. Etagwo Kĩhoti wa thĩ yothe.

Tondũ Yahweh agwĩtite ta warĩ mũndũ-wa-nja mũtiganĩrie na mũthuthĩku nĩ kĩeha, O ta mũndũ-wa-nja wahikĩte arĩ mwĩthĩ agacoka agateo,” ũguo nĩguo Kĩhoti waku oigĩte.

“Nĩ ngũtiganĩirie kwa ihinda inyinyi, Ĩndĩ nĩ ngaagũcokanĩrĩria ndĩ na tha nyingĩ.

Nĩ ndahithire ũthiũ wakwa kuuma harĩ wee kwa ihinda inyinyi ndĩ na marakara maingĩ mũno, Ĩndĩ nĩ ngaakũiguĩra tha ndĩ na wendi wa gũgũtuga wa tene na tene,” ũguo nĩguo Yahweh Mũkũũri waku oigĩte.

“Ũndũ ũyũ harĩ niĩ ũtariĩ ta kĩguũ kĩa hĩndĩ ya Nuhu, nĩ tondũ wa ũrĩa ndĩhĩtĩte atĩ maĩ ma hĩndĩ ya Nuhu matikaahumbĩra thĩ rĩngĩ-rĩ, Noguo ndĩhĩtĩte atĩ ndirĩ hĩndĩ ĩngĩ ngaakũrakarĩra o na kana ngũkũũme.

Nĩ gũkorũo irĩma no cieherio O nacio ithũngũri cinainio, Ĩndĩ ũtugi wakwa ndũrĩ hĩndĩ ũkeeherio harĩ we, O na kana kĩrĩkanĩro gĩakwa gĩa thayũ kĩinainio,” ũguo nĩguo Yahweh oigĩte, o we ũkũiguagĩra tha.

“Ũũ wee ũyũ mũnyarirĩku, o wee ũthukathukĩtwo nĩ kĩhuhũkanio, na ndũrĩ na wa gũkũhooreria, takĩrore wĩyonere, Nĩ ngwara mahiga maku na tũhiga twa thumarati Naguo mũthingi waku ndĩwake na mahiga ma safia.

Thingo ciaku harĩa igũrũ ngũcithondeka na mahiga ma rubi, Nacio ihingo ciaku ndĩcithondeke na mahiga ma begerathu, Na mĩhaka yaku yothe ndĩmĩthondeke na mahiga ma goro mũno.

Na ciana ciaku ciothe nĩ ikaarutwo nĩ Yahweh, Naguo thayũ wa ciana ciaku nĩ ũgaakorũo ũrĩ mũingĩ.

Nĩ ũkaahandwo ũrũmĩte wega thĩinĩ wa ũthingu. Nĩ ũgaakorũo weheretio ũkaraihanĩrĩria na ũhinyanĩrĩria, Ndũrĩ ũndũ ũgeetigĩra na ndũgakorũo na gĩtũmi gĩa kũigua guoya, ũkaaraihĩrĩria mwanangĩko, Nĩ gũkorũo ndũgaagũkuhĩrĩria.

One atĩ magacokanĩrĩra hamwe nĩguo magũtharĩkĩre, No ti niĩ ngaakorũo njathanĩte. Mũndũ o wothe ũrĩa ũgaagũtharĩkĩra nĩ akaagũa nĩ ũndũ waku.”

“Onei, niĩ mwene nĩ niĩ ndombire bundi wa cuma, Ũrĩa ũhuuhaga mwaki wa makara, Naguo wĩra wake ũgathondeka itharaita rĩa mbaara. Ningĩ niĩ mwene nĩ niĩ ndombire mũndũ mũninani nĩguo anange.

Gũtirĩ itharaita rĩa mbaara rĩthondeketwo nĩ ũndũ waku rĩkaagaacĩra, Na nĩ ũkonania atĩ rũrĩmĩ o ruothe rũrĩa rũgaagũũkĩrĩra hĩndĩ ya ciira nĩ rwaganu. Rĩu nĩrĩo igai rĩa ndungata cia Yahweh, nĩguo ũthingu wao uumĩte kũrĩ niĩ,” ũguo nĩguo Yahweh oigĩte.