Isaiya 56

Ũũ nĩguo Yahweh oigĩte: “Rũmagĩrĩrai Matua ma cira marũngĩrĩru, na mwĩkage maũndũ ma ũthingu, Tondũ ũhonokio wakwa nĩ ũgũka o na ihenya Naguo ũthingu wakwa nĩ ũkaaguũranĩrio.

Kũrathimwo nĩ mũndũ ũrĩa wĩkaga ũguo Na mũrũ wa mũndũ, ũrĩa wĩnyitagĩra ũndũ ũcio, Ũrĩa ũmenyagĩrĩra Thabatũ na akaga kũmĩthahia Na ũrĩa ũgiragĩrĩria guoko gwake gũtigeke ũndũ o wothe mũũru.

Nake mũndũ wa kũngĩ ũrĩa wĩnyitithanagia na Yahweh ndagĩrĩirũo kuuga atĩrĩ, ‘Hatarĩ nganja Yahweh nĩ anyamũranitie na andũ ake.’ O na mũndũ ũrĩa mũhakũre ndagĩrĩirũo kuuga ũũ, ‘Onee, niĩ haana o ta mũtĩ mũũmũ.’”

Nĩ gũkorũo ũũ nĩguo Yahweh ekwĩra andũ ahakũre arĩa mamenyagĩrĩra thabatũ ciakwa na magathuura maũndũ marĩa nyendete na arĩa marũmagia kĩrĩkanĩro gĩakwa:

“Nĩo ngahee kĩririkano na rĩĩtwa thĩinĩ wa nyũmba yakwa na thĩinĩ wa thingo ciakwa, Kĩndũ kĩega gũkĩra ariũ na aarĩ. Na ndĩmahe rĩĩtwa rĩa gũtũũra tene na tene, Rĩrĩa rĩtagathengio.

Nao arĩũ a andũ a kũngĩ arĩa menyitithanagia na Yahweh nĩguo mamũtungatagĩre, Nĩguo mende rĩĩtwa rĩa Yahweh Na matuĩke ndungata ciake, Arĩa othe mamenyagĩrĩra Thabatũ yake na makaga kũmĩthahia Na arĩa marũmagia kĩrĩkanĩro gĩakwa,

O nao nĩ ngaamarehe kĩrĩma-inĩ gĩakwa kĩamũre Na ndũme makenage marĩ thĩinĩ wa nyũmba yakwa ya mahoya. Magongona mao ma njino o na maruta mao nĩ magetĩkĩrĩka kĩgongona-inĩ gĩakwa. Nĩ gũkorũo nyũmba yakwa ĩtagwo nyũmba ya mahoya harĩ ikundi ciothe cia andũ.”

Mwathi Yahweh, o we ũcokanagĩrĩria andũ arĩa mahurunjũkĩte a Isiraeli, oigĩte atĩrĩ: “Nĩ ngũcokanĩrĩria harĩ we andũ angĩ tiga arĩa marĩkĩtie gũcokanĩrĩrio.”

Inyuĩ nyamũ ciothe cia gĩthaka, ũkai mũtamburange, Inyuĩ nyamũ ciothe cia mũtitũ-inĩ ũkai.

Arangĩri ake, nĩ atumumu, othe-rĩ gũtirĩ o na ũmwe wonete ũndũ ũcio. Othe mahaana ta ngui itagambaga, itangĩhota gũkũga, nĩ kũroota irarota ikomete thĩ; na ciendaga gũcũngĩrĩra.

Na ngui icio irĩ na mĩĩto mĩnene mũno ya kũrĩa; Gũtirĩ hĩndĩ ciganagia. Nĩ arĩithi matarĩ na ũtaũku. Othe mathiĩte o mũndũ njĩra yake; O ũmwe wao ecaragĩria o ũrĩa angĩĩguna we mwene:

Magakiuga, “Ũkai, rekei njoe ndibei, Na tũnyue njohi tũnyotoke. Na rũciũ rũgaakorũo rũtariĩ o ta ũmũthĩ, na rwagĩre makĩria!”