Isaiya 66

Ũũ nĩguo Yahweh ekuuga: “Igũrũ nĩrĩo gĩtĩ gĩakwa kĩa ũnene, nayo thĩ nĩyo gaturũa ka magũrũ makwa. Ĩkĩrĩ ha nyũmba ĩrĩa mũngĩnjakĩra, Naho handũ hakwa ha kũhurũka nĩ ha?”

“Guoko gwakwa mwene nĩkuo gwathondekire indo icio ciothe, Na ũguo nĩguo gwathiire ciothe igĩkorũo kuo,” ũguo nĩguo Yahweh ekuuga. “Mũndũ ũrĩa ngũcaria nĩ ũyũ, Ũrĩa mwĩnyihia na ũrĩ na roho mũthuthĩku na ũinainaga nĩ ũndũ wa kiugo gĩakwa.

Mũndũ ũrĩa ũrathĩnja ndegwa ahaana o ta ũrĩa ũũragaga mũndũ. Nake ũrĩa ũraruta igongona rĩa ng’ondu ahaana o ta mũndũ ũroina ngui ngingo. Nake ũrĩa ũraruta ihaki rĩa mũtu, ahaana ta araruta thakame ya ngũrũe! Nake ũrĩa ũraruta igongona rĩa ũbani, ahaana o ta mũndũ ũrarathima mũhianano. Nĩ tondũ gũtiri nganja nĩ methuurĩire njĩra ciao ene, O na magakenio nĩ maũndũ marĩa marĩ magigi.

Nĩ ũndũ ũcio nĩ ngũthuura njĩra cia kũmaherithia, Na maũndũ marĩa makoragwo metigĩrĩte nĩmo ngaamarehera. Tondũ rĩrĩa ndetanire, gũtirĩ mũndũ wetĩkire; Rĩrĩa ndaririe, gũtirĩ mũndũ wathikĩrĩirie. Maathiire o na mbere gwĩka maũndũ moru maitho-inĩ makwa, Na magĩthuura gwĩka maũndũ marĩa mataangenagia.

Iguai kiugo kĩa Yahweh, inyuĩ mũinainaga nĩ ũndũ wa kiugo gĩake: “Ariũ a thoguo arĩa mamũthũire na meyamũranagia na inyuĩ tondũ wa rĩĩtwa rĩakwa mooigire atĩrĩ, ‘Rekei tũkĩone Yahweh agĩtĩithio, tũkĩone gĩkeno gĩaku!’ Ĩndĩ o nĩo magaaconorithio.”

Kũrĩ na mũraramo wa mbugĩrĩrio ũroima itũũra-inĩ, mũgambo ũroima hekarũ-inĩ! Nĩ mũgambo wa Yahweh akĩrĩha thũ ciake kĩrĩa gĩciagĩrĩire!

Atanambia ruo rwa gũciara agĩteithĩka, o na atambĩrĩirie kũrũmwo nĩ ruo agĩciara kaana ga kahĩĩ.

Nũũ ũrĩ waigua ũndũ ta ũcio? Nũũ ũrĩ wona maũndũ ta macio? Hihi bũrũri no ũciarũo na mũthenya ũmwe? Kana hihi rũrĩrĩ rũciarũo o mũthenya ũmwe? No o rĩrĩa Zayuni aambĩrĩirie kũigua ruo rwa kũgĩa mwana, o hĩndĩ ĩyo norĩo aaciarire ciana ciake.

“Hihi no ndũme mwana akinyie ihinda rĩa gũciarũo na njage gũtũma aciarũo?” ũguo nĩguo Yahweh ekũũria. “Kana hihi niĩ ndũmaga mwana aciarũo na njoke ngirie aume?” Ũguo nĩguo Kĩhoti wanyu ekũũria.

Kenanĩrai na Yahrushalayim na mũcanjamũke hamwe nake, inyuĩ inyuothe mũmwendete. Kenai mũno hamwe nake, inyuĩ inyuothe mũracakaya nĩ ũndũ wake,

Nĩgetha mũkoonga nyondo ciake cia kũhoorerania nginya mũiganie, Na mũnyue mũnyotoke na mũgĩe na gĩkeno nĩ ũndũ wa riri wake mũingĩ.

Nĩ gũkorũo ũũ nĩguo Yahweh ekuuga: “Oneei! Nĩ ngũrehe thayũ harĩ wee ũhaana ta rũũĩ, Na riri wa ndũrĩrĩ ũhaana ta karũũĩ karatherera. Nĩ mũkarĩa irio na mũkuuo na ngoi, Na mũcũgacũgĩrio maru-inĩ make.

O ta ũrĩa nyina omagĩrĩria mũrũwe, Noguo ngũikara ngĩmũmagĩrĩria; Na ha ũhoro wa Yahrushalayim, nĩ ũkahorerio ũmĩrĩrio.

Nĩ mũkoona ũndũ ũcio, nacio ngoro cianyu icanjamũke, Mahĩndĩ manyu namo marirũke o ta nyeki nduru. Nakuo guoko kwa Yahweh nĩ gũkaamenyeka nĩ ndungata ciake, Nakuo kwaga kũiganĩra gwake kũmenywo nĩ thũ ciake.”

“Tarorai muone! Yahweh ookĩte na mwaki, Na ngaari ciake cia mbarathi itariĩ o ta kĩhuhũkanio kĩnene, Nĩguo onanie marakara na gũcina, Na ikanania rĩake na nĩnĩmbĩ cia mwaki.

Tondũ Yahweh agatuanĩra na mwaki na rũhiũ rwa njora; Nao arĩa maninĩtwo nĩ Yahweh magaakorũo marĩ aingĩ.

“Arĩa meyamũrĩte na magetheria nĩguo matonye mĩgũnda-inĩ, marũmĩrĩire ũrĩa ũrĩ gatagatĩ, arĩa marĩaga nyama cia ngũrũe na indo irĩ magigi na mbĩa, othe magaathira hamwe,” ũguo nĩguo Yahweh oigĩte.

“Na nĩi, nĩ ũndũ wa ciĩko ciao na methugunda ma meciria mao, nĩ ngũka gũcokanĩrĩria andũ a ndũrĩrĩ o na thiomi ciothe. Na nĩ magooka meyonere riri wakwa.”

“Na nĩ ngeekĩra kĩmenyithia gatagatĩ-inĩ kao, na nĩ ngaatũma amwe a arĩa makaahonoka mathiĩ kũrĩ ndũrĩrĩ, mathiĩ Tarishishi, Puli, na Ludu—arĩa mahũthagĩra ũta, na mathiĩ Tubali na Javani, o na hũgũrũrũ-inĩ iria irĩ kũraya, iria itarĩ ciaigua ũhoro wakwa o na kana ikona riri wakwa; na nĩ makaumbũra ũhoro wa riri wakwa gatagatĩ-inĩ ka ndũrĩrĩ.

Nĩ makaarehe ariũ a ithe wanyu othe kuuma mabũrũri mothe marĩ mũhothi kũrĩ Yahweh, makĩhũthĩra mbarathi, ngaari cia mbarathi, tũkaari twa gũkururio tũkunĩkanie, nyũmbũ, ngamĩra irĩ na ihenya, mambatio Yahrushalayim kĩrĩma-inĩ gĩakwa kĩamũre, o ta ũrĩa andũ a Isiraeli marehaga kĩheo kĩao nyũmba-inĩ ya Yahweh magĩkuuĩte na kĩndũ kĩamũre,” ũguo nĩguo Yahweh ekuuga.

“Ningĩ nĩ ngoya amwe matuĩke athĩnjĩri-Yahweh na angĩ Alawii,” ũguo nĩguo Yahweh ekuuga.

“Tondũ o ta ũrĩa igũrũ rĩerũ na thĩ njerũ iria ndĩrathondeka igũtũũra ciĩhandĩte mbere yakwa, no taguo mbeũ yaku na rĩĩtwa rĩaku igũtũũra ciĩhandĩte,” ũguo nĩguo Yahweh ekuuga.

“Na nĩ gũgakinya atĩrĩ, kuuma karũgamo ka mweri nginya karũgamo kau kangĩ ka mweri na kuuma thabatũ nginya thabatũ ĩyo ĩngĩ, Andũ othe nĩ magooka kũinamĩrĩra mbere yakwa,” ũguo nĩguo Yahweh ekuuga.

“Nao nĩ makooimagara merorere ciimba cia andũ arĩa maanemeire; Tondũ igunyũ cia andũ acio itigaakua, Na mwaki wa kũmaniina ndũkaahorio, Nao magaatuĩka kĩndũ kĩrĩ magigi harĩ andũ othe.”