Isaiya 65

“Nĩ njĩtĩkĩrĩte gũcario nĩ arĩa matarĩ moria ũhoro wakwa; Nĩ ndonirwo, no ti nĩ arĩa manjethaga. Ngiuga atĩrĩ, ‘Niĩ ũyũ haha! Niĩ ũyũ haha!’ Kũrĩ rũrĩrĩ rũtakayagĩra rĩĩtwa rĩakwa.

Ndindaga ndambũrũkĩtie moko makwa mũthenya wothe harĩ andũ ang'athia, Acio mathiaga na mĩthiĩre ĩtarĩ mĩega Makarũmĩrĩra meciria mao ene;

Acio mekagaga maũndũ ma kũnjũgita o ũthiũ-inĩ wakwa hingo ciothe, Makarutĩra magongona mĩgũnda-inĩ na magacinĩra ũbumba igũrũ rĩa magongona ma maturubarĩ.

Maikaraga thĩ mbĩrĩra-inĩ, Na ũtukũ makaraara kũndũ gwa thiri, Acio marĩaga nyama cia ngũrũe, Na thubu wa indo irĩ mũgiro ũrĩ nyũngũ-inĩ ciao.

Makoiga atĩrĩ, ‘Wĩikarie; ndũkanguhĩrĩrie, Tondũ niĩ ndĩ mwamũre harĩ we!’ Andũ aya nĩ ndogo maniũrũ-inĩ makwa, nĩ mwaki wakanaga mũthenya wothe.

Na rĩrĩ, nĩ kwandĩke mbere yakwa; Ndikirĩĩte, No nĩ ngaamarĩha, Ngaamarĩha o ithũri-inĩ ciao.

Nĩ ũndũ wa mahĩtia mao, o hamwe na mahĩtia ma maithe mao ,” ũguo nĩguo Yahweh ekuuga “Tondũ nĩ macinĩire ũbumba irĩma-inĩ, Na makĩĩnyararĩra ithũngũri-inĩ. Na ngamathukĩra ciĩko ciao cia hau kabere o gĩthũri-inĩ kiao.

Yahweh ekuuga ũũ: “O ta hĩndĩ ĩrĩa ndibei ya mũhihano yonekaga kĩmanjĩka-inĩ gĩa thabibũ Nake mũndũ akoiga atĩrĩ, ‘Ndũgagĩthũkie! tondũ harĩ na kĩrathimo thĩinĩ wakĩo!’ No taguo ngeeka nĩ ũndũ wa ndungata ciakwa; Ndigaciniina ciothe.

Nĩ ngamerithia mbegũ kuuma thĩinĩ wa Jakubu Na thĩinĩ wa Yahuda ndute ũrĩa ũkegwatĩra irĩma ciakwa irĩ igai rĩake; Na andu akwa arĩa thuurĩte nĩo magaacigaya, Na ndungata ciakwa nacio itũre kuo.

Sharoni gũgaatuĩka kĩanda gĩa kũrĩithio ng’ondu, Naguo Mũkuru wa Akori ũtuĩke kũndũ gwa gũkomagwo nĩ ndũũru cia ng’ombe, nĩ ũndũ wa andũ akwa arĩa matũire manjaragia.

Ĩndĩ mũrĩ amwe a arĩa matiganagĩria Yahweh, Arĩa mariganagĩrũo nĩ kĩrĩma gĩakwa kĩamũre, Arĩa mahaaragĩria metha nĩ ũndũ wa hoti Gadi, Na arĩa maiyũragia ikombe ndibei ndukanie nĩ ũndũ wa hoti Meni.

Nĩ ũndũ ũcio-rĩ, ngaamwathĩrĩra rũhiũ rwa njora, Na inyuĩ inyuothe mũkaainamĩrĩra thĩ nĩguo mũũragwo, Tondũ ndetanire, no mũtietĩkire, Ngĩaria, no mũtiathikĩrĩirie; Mwathiire o na mbere gwĩka maũndũ moru maitho-inĩ makwa, Na mũgĩthuura maũndũ marĩa mataangenagia.”

Nĩ ũndũ ũcio, ũũ nĩguo Mwathi Yahweh oigĩte: “Oneei, ndungata ciakwa nĩ irĩaga, no inyuĩ mũikaraga mũrĩ ahũtu! Wĩrorerei! ndungata ciakwa nĩ inyuaga, no inyuĩ mũikaraga mũrĩ anyotu! Ta kĩrorerei! Ndungata ciakwa nĩ icanjamũkaga, no inyuĩ nĩ mũgaconoka!

Toonei, ndungata ciakwa icanjamũkĩte nĩ ũndũ wa ngoro kũgĩa na gĩkeno, Ĩndĩ inyuĩ nĩ mũkarĩra nĩ ũndũ wa ruo rwa ngoro Na mũcakae nĩ ũndũ wa gũkua ngoro.

Na nĩ mũgaatiga rĩĩtwa nao arĩa thuurĩte makaarĩhũthagĩra rĩhaana ta kĩrumi, Nĩgũkorwo Mwathi Yahweh nĩ akaamũũraga, No ndungata ciake we mwene aciĩte na rĩĩtwa rĩngĩ;

Nĩgetha ũrĩa wothe ũgeecarĩria kĩrathimo thĩinĩ wa thĩ, akerathimithia na Kĩhoti wa ũhoro wa ma. Nake ũrĩa wothe ũkeehĩta mwĩhĩtwa thĩinĩ wa thĩ Akeehĩta na rĩĩtwa rĩa Kĩhoti wa ũhoro wa ma, Tondũ mĩtangĩko ya hau kabere nĩ ĩkaariganĩra; Nĩ ĩkaahithwo kuuma maitho-inĩ makwa.

Na tarora wone! Nĩ kũũmba ngũũmba igũrũ rĩerũ na thĩ njerũ; Na icio cia hau kabere itikaaririkanwo, O na kana irũmbũiyo.

Nĩ ũndũ ũcio canjamũkai na mũtũũre mũkenete nĩ ũndũ wa kĩrĩa ndĩromba. Tarorai muone! Ndĩromba Yahrushalayim ĩtuĩke ya gũkenagĩrwo Na andũ a kuo matuĩke a gũkenania.

Na nĩ ngaakenera Yahrushalayim na njanjamũke nĩ ũndũ wa andũ akwa; Gũtirĩ hĩndĩ ĩngĩ thĩinĩ wayo gũkaiguĩka mũgambo wa kĩrĩro kana mũcaayo wa mĩtangĩko.”

“Kũndũ kũu gũtigaacoka rĩngĩ gũkorũo na kaana gegũikara o matukũ manini, Kana mũthuri mũkũrũ ũkwaga kũnina matukũ make mothe. Tondũ mũndũ ũrĩa ũgaakua arĩ na mĩaka igana akoonagwo ahaana o ta kahĩĩ kanini, No ũrĩa mwĩhia o na arĩ na ũkũrũ wa mĩaka igana akoonagwo e mũndũ mũnyarare.

Na nĩ magaaka nyũmba na macitũũre, Na mahande mĩgũnda ya mĩthabibũ na marĩe maciaro mayo.

Matigaaka nyũmba itũũrũo nĩ angĩ, O na kana mahande icoke irĩo nĩ andũ angĩ. Nĩ gũkorũo matukũ ma andũ akwa magaakorũo matariĩ ta matukũ ma mũtĩ, nao andũ akwa arĩa athuure magakũraga magatigaga wĩra wa moko mao ũrĩ o ho.

Matikenogagia tũhũ, O na kana maciare ciana itangĩkage, tondũ acio nĩ mbeũ ya andũ arathime nĩ Yahweh, O hamwe na njiarũa ciao.

O na matetanĩte, nĩ ngaamacokeria; O makĩaragia, nĩ ngaamaigua.

Njũi na kagondu ikaarĩaga hamwe, Mũrũthi ũkaarĩaga nyeki o ta ndegwa, Nacio irio cia nyoka igaakorũo irĩ tĩri. Itikageranaga ngero o na kana irehe mwanangĩko o wothe kĩrĩma-inĩ gĩakwa kĩamũre,” ũguo nĩguo Yahweh oigĩte.