Isaiya 64

Na arĩ korũo nĩ ũtembũrĩte igũrũ na ũgaikũrũka gũkũ thĩ, Nacio irĩma ithingithĩre hau ũrĩ,

O ta ũrĩa mwaki ũcinaga mahuti, Na mwaki ũgatũma maĩ matherũke, itũme rĩĩtwa rĩaku rĩmenyeke harĩ thũ ciaku, Nĩguo ndũrĩrĩ cinaine irĩ mbere yaku!

Rĩrĩa wekire maũndũ ma magegania marĩa tũteerĩgĩrĩire-rĩ, Waikũrũkire, nacio irĩma igĩthingithĩra mbere-inĩ yaku.

Tondũ kuuma o tene gũtirĩ andũ marĩ maigua, kana gũtũ kũrĩ gweciiria gũkamenya ũndũ tocio, O na gũtirĩ riitho rĩrĩ rĩona Kĩhoti ũngĩ ũhana tawe, Ũrĩa ũhingagĩria maũndũ arĩa mamwetagĩrĩra

Nĩ ũrĩcemanagia na ũrĩa ũkenaga na agekaga maũndũ ma ũthingu, O ũcio ũkũririkanaga njĩra-inĩ ciaku. Onee, nĩ warakarire rĩrĩa twehirie twĩ njĩra-inĩ ciaku ihinda iraya. Hihi rĩu nĩ twagĩrĩire kũhonokio?

Na ithuothe tũtuĩkĩte o ta mũndũ wĩ thahu, Nacio ciĩko citũ ciothe cia ũthingu itariĩ o ta matangari mena gĩkoo. Ithuothe tũkaahooha o ta ithangũ, Namo mehia maitũ matũkuĩte o ta rũhuho.

Gũtirĩ mũndũ o na ũmwe ũkayagĩra rĩĩtwa rĩaku, Gũtirĩ o na ũmwe wĩnyagunyagia okĩre akwĩgwatĩre, Nĩ gũkorũo nĩ ũtũhithĩte ũthiũ waku, Na ũgatũng'ũria nĩ tondũ wa mehia maitũ.

No rĩu Yahweh wee nĩwe Ithe witũ. Ithuĩ tũrĩ rĩũmba, nawe nĩwe Mũũmbi witũ; Ithuothe tũrĩ wĩra wa guoko gwaku.

Ndũgatũkũye mũno, wee Yahweh, Na ndũkaririkane mahĩtia maitũ tene nginya tene. Twagũthaitha ũtũrore, wone atĩ ithuothe tũrĩ andũ aku.

Matũũra maku marĩa mamũre matuĩkĩte werũ. Zayuni ĩtuĩkĩte werũ, Yahrushalayim ĩgatuĩka kũndũ gũtiganĩrie gũgakira ihooru.

Nyũmba itũ ĩrĩa thaka nyamũre, Ĩrĩa maithe maitũ ma tene maakũgoocagĩra, Nĩ ĩcinĩtwo na mwaki. Nacio indo iria ciothe twendete ituĩkĩte mwanangĩko.

Wee ũkĩrorereria maũndũ macio moothe-rĩ, hihi wee Yahweh ũgũthiĩ o na mbere kwĩgirĩrĩria? Hihi ũgũthiĩ o na mbere gũkira na ũtũhinyĩrĩrie makĩria?