Isaiya 63

Ũyũ nũũ ũroka oimĩte Edomu, Oimĩte Bozira ehumbĩte nguo irĩ na marangi makengu, Ũyũ wĩkĩrĩte nguo cia gĩtĩo, Ahiũhĩte na hinya wake mũingĩ? “Nĩ niĩ, Ũrĩa waragia na ũthingu, O we Ũrĩa ũrĩ hinya mũingĩ wa kũhonokania.”

Nĩ kĩĩ gĩtũmĩte nguo ciaku itunĩhe, Na nĩ kĩĩ gĩtũmĩte nguo ciaku ihaane ta cia mũndũ ũrĩ kĩhihĩro-inĩ kĩa ndibei?

“Nginyangĩte thabibũ kĩhihĩro-inĩ kĩa ndibei ndĩ wiki. Gũtirĩ mũndũ kuuma harĩ ikundi cia andũ ũrarĩ hamwe na niĩ. Ngaamakinyanga ndĩ na marakara, Na ngaikara o ngĩmakinyangaga na mang’ũrĩ. Nguo ciakwa ikaminjũkĩrũo nĩ thakame yao, Na nguo ciakwa ciothe igĩe na marooro.

Nĩ gũkorũo mũthenya wa kũrĩhanĩria ũrĩ ngoro-inĩ yakwa, Naguo mwaka wa andũ akwa arĩa akũũre nĩ mũkinyu.

Ndaroorire, ĩndĩ ndionire mũndũ wa kũndeithia; Ngĩmaka tondũ gũtirĩ mũndũ werutĩire kũndeithia. Nĩ ũndũ ũcio guoko gwakwa gũkĩndehera ũhonokio, Namo marakara makwa makĩndiirĩrĩra.

Ngarangĩrĩria ikundi cia andũ na marakara makwa, Ngatũma marĩĩo nĩ matũkũya makwa. Na ngaharũrũkia hinya wao ndĩũbacanie thĩ.”

Nĩ ngagweta ciĩko cia Yahweh cia wendo na ũtugi wake, Ciĩko cia gũkumio cia Yahweh, Nĩ ũndũ wa maũndũ mothe marĩa Yahweh atwĩkĩire, Maũndũ mothe mega marĩa ekĩire nyũmba ya Isiraeli, Kũringana na tha ciake na wendo wake mũnene wa ũtugi.

Nĩ gũkorũo ooigire atĩrĩ: “Aya nĩ andũ akwa, ciana citangĩhenania.” Nĩ ũndũ ũcio agĩtuĩka Mũhonokia wao.

Hĩndĩ ya mĩtangĩko yao yothe nĩ aatangĩkaga. Nake mũraika wake we mwene akĩmahonokia. Akĩmakũũra nĩ ũndũ wa ũrĩa amendete na akamacaĩra, Na akĩmoya na igũrũ na akĩmakuua matukũ-inĩ mothe ma tene.

No nĩ maregenyũkire na makĩiguithia Roho wake Mwamũre ũũru. Nake akĩgarũrũka agĩtuĩka thũ yao, Na akĩmokĩrĩra.

Na akĩririkana matukũ ma tene, Matukũ ma Musa ndungata yake makĩũria atĩrĩ: “Arĩ kũ Ũrĩa wamagereirie iria-inĩ na arĩithi a rũũru rwake? Arĩ kũ Ũrĩa wamũheire roho Wake Mwamũre,

Ũrĩa warekire guoko Gwake kũrĩ riri gũthiĩ hamwe na guoko kwa ũrĩo kwa Musa, Ũrĩa wagayanirie maĩ mbere yao Nĩguo egĩĩre na rĩĩtwa rĩa gũtũũra tene na tene,

Ũrĩa watũmire matuĩkanĩrie maĩ-inĩ mariku, Nĩgetha mathiĩ matekũhĩngĩka, O ta mbarathi ĩrĩ bũrũri mwaraganu?

O ta ũrĩa mahiũ mahurũkaga maikũrũka mũkuru-inĩ mwaraganu, Roho wa Yahweh nĩ watũmire magĩe na ũhurũko.” Ũguo nĩguo wee watongoririe andũ aku, Nĩgetha wĩgĩĩre rĩĩtwa rĩrĩ na riri.

Rora ũrĩ kũu igũrũ wĩyonere Ũrĩ kũu gwaku gũtũũgĩrĩte kũrĩ na wĩyamũrĩri na riri. Kĩyo gĩaku na hinya irĩ kũ? Na ũrĩa wee wahĩahĩaga kuonania ũcayanĩri waku na tha ciaku? Nĩ igirĩrĩirio gũkinya harĩ niĩ?

Nĩ gũkorũo wee nĩwe Ithe witũ; O na gũtuĩka Iburahimu no akorũo atatũĩ, Na Isiraeli no age gũtũmenya, Wee Yahweh, nĩwe Ithe witũ, Mũkũũri witũ. Rĩĩtwa rĩaku rĩtũrĩĩte kuo kuuma o tene.

Wũũi Yahweh, ũtũmĩte tũũre njĩra-inĩ ciaku nĩkĩ? Wĩtĩkagĩria tũũmie ngoro citũ nĩkĩ, nginya tũkaga gũgwĩtigĩra? Coka nĩ ũndũ wa ndungata ciaku, O acio mĩhĩrĩga ya igai rĩaku.

Andũ aku arĩa amũre nĩ meegwatĩire kũndũ kũu ihinda inyinyi. Thũ citũ nĩ irangĩrĩirie handũ haku harĩa hamũre.

Na ithuĩ tũtuĩkĩte ta andũ matarĩ mathwo niwe, o ta andu matarĩ metanio na Rĩĩtwa Rĩaku.