Jakubu 3
Ariũ na aarĩ a Ithe witũ, ti aingĩ anyu maagĩrĩirwo nĩ gũtuĩka arutani, tondũ nĩ mũũĩ atĩ ithuĩ arĩa tũrutanaga nĩ tũgaatuĩrwo ituĩro rĩa hinya gũkĩra andũ arĩa angĩ.
Ithuothe nĩ tũhĩngĩcagwo nĩ maũndũ maingĩ. Mũndũ angĩkorwo ndarĩ na mahĩtia thĩinĩ wa maũndũ marĩa aragia-rĩ, ũcio nĩ mũkinyanĩru kũna, na nĩ ahotete kũriĩra mwĩrĩ wake wothe.
Hĩndĩ ĩrĩa twekĩra mbarathi mĩkwa tũnua nĩguo itwathĩkĩre-rĩ, nĩ tũhotaga kũgarũra nyamũ ĩyo ĩrĩ yothe.
Ningĩ ta rorai ũhoro wa marikabu ũrĩ ta kĩonereria. O na gũtuĩka nĩ nene na itwaragwo nĩ rũhuho rũrĩ na hinya-rĩ, nĩ igarũragwo na gathukani kanini, ikarorio o kũrĩa mũtwarithia wacio ekwenda gũciroria.
Ũguo no taguo rũrĩmĩ rũhaana. Nĩ keega kanini ka mwĩrĩ, no nĩ keĩkagĩrĩra mũno. Ta mwĩciriei ũrĩa mũtitũ mũnene ũgwatagio mwaki nĩ gathandĩ o kanini.
Ningĩ rũrĩmĩ nĩ mwaki, tondũ rũiyũrĩte mĩthemba yothe ya maũndũ ma waganu thĩinĩ wa ciĩga cia mwĩrĩ. Rũthũkagia mwĩrĩ wothe, rũkagwatia mwaki mũtũũrĩre wothe wa mũndũ, naruo rwene rũkoragwo rũmundĩtio mwaki nĩ Jehanamu.
Nyamũ cia mĩthemba yothe, na nyoni, na nyamũ iria itambaga thĩ, na nyamũ cia iria-inĩ rĩrĩa inene ciothe nĩ ihoreragio na cianahorerio nĩ mũndũ,
no gũtirĩ mũndũ o na ũrĩkũ ũngĩhota kũhoreria rũrĩmĩ. Nĩruo kĩndũ kĩũru gĩtangĩkindĩria na rũiyũrĩtwo nĩ thumu wa kũũragana.
Tũgoocaga Yahweh, o we Ithe witũ, na rũrĩmĩ, na tũkaruma andũ naruo, o acio mombĩtwo marĩ na mũhianĩre wa Yahweh
Kanua o kau-rĩ, no ko koimaga kĩrathimo na gakoima kĩrumi. Ariũ na aarĩ a Ithe witũ, ũguo tiguo kwagĩrĩire gũtuĩka.
Kaĩ maĩ mega na maĩ ma cumbĩ mangĩtherũka kuuma gĩthima kĩmwe?
Ariũ na aarĩ a Ithe witũ, mũkũyũ no ũhote gũciara ndamaiyũ, kana mũthabibũ ũciare ngũyũ? O nakĩo gĩthima kĩa maĩ ma cumbĩ gĩtingĩtherũka maĩ mega.
Thĩinĩ wanyu-rĩ, nũ ũrĩ na ũũgĩ na agataũkĩrwo nĩ maũndũ? Mũndũ ũcio nĩ akĩonanie maũndũ macio na ũndũ wa mũtũũrĩre wake mwega, na ciĩko ciĩkĩtwo na njĩra ya kwĩnyihia kũrĩa kuumanaga na ũũgĩ.
No mũngĩkorwo ngoro-inĩ cianyu nĩ mũtũũragia ũiru na ũhoro wa kwenda kwĩyambatĩria-rĩ, mũtikae kwĩrahĩra ũndũ ũcio kana mũtuĩke a gũkaana ũhoro wa ma.
Ũũgĩ ta ũcio tiguo ũikũrũkaga uumĩte igũrũ, no nĩ wa thĩ ĩno, na ti wa kĩĩroho, ũcio nĩ ũũgĩ wa mũcukani.
Nĩgũkorwo harĩa harĩ na ũiru na ũhoro wa kwenda kwĩyambatĩria-rĩ, hau nĩho hakoragwo na ngũĩ na ciĩko ciothe cia waganu.
No ũũgĩ ũrĩa uumaga igũrũ o mbere nĩ Mwamũre; ningĩ nĩ wendete thayũ, na nĩ ũcayanagĩra, na nĩ wĩnyihagia, na nĩ ũiyũrĩtwo nĩ tha na maciaro mega, ningĩ ndũthutũkanagia, na ndũrĩ ũhinga.
Nao ateithũrani arĩa mahandaga thayũ-rĩ, magethaga maciaro ma ũthingu.