Jakubu 4
Rĩu-rĩ mbaara na ngũĩ thĩinĩ wanyu ciumaga na kũ? Githĩ itiumaga merirĩria-inĩ manyu marĩa marũaga thĩinĩ wanyu?
Mwĩriragĩria kĩndũ no mũkaaga kũgĩa nakĩo. Ningĩ mũũraganaga na mũgacumĩkĩra, no mũtingĩhota kũgĩa na kĩrĩa mũkwenda. Mũtetanagia na mũkarũa. Mũgakĩaga kuona kĩndũ tondũ wa kwaga kũhoya Yahweh.
Hĩndĩ ĩrĩa mwahoya-rĩ, nĩ mwagaga kũheo, tondũ mũhoyaga mũrĩ na muoroto mũũru, tondũ mwendaga mũitangage kĩrĩa mwaheo na maũndũ ma gwĩkenia.
Inyuĩ atharania aya, kaĩ mũtoĩ atĩ kũgĩa ũrata na thĩ nĩ kũgĩa ũthũ na Yahweh? Nĩ ũndũ ũcio mũndũ o wothe ũthuraga kũgĩa ũrata na thĩ nĩ etuaga thũ ya Yahweh
Kana mũgwĩciria Maandĩko maaragia ũhoro ũtarĩ na gĩtũmi, atĩ roho ũrĩa Yahweh aatũmire ũtũũrage thĩinĩ witũ nĩ ũiguaga ũiru mũno?
No nĩ atũheaga wega wake makĩria. Kĩu nĩkĩo gĩtũmaga Maandĩko moige atĩrĩ: “Yahweh nĩ areganaga na arĩa etĩi no arĩa menyihagia nĩo aheaga wega wake.”
Nĩ ũndũ ũcio mwĩnyihagĩriei Yahweh. Reganagai na mũcukani, nake nĩ ekũmũũrĩra.
Kuhĩrĩriai Yahweh, nake nĩ ekũmũkuhĩrĩria. Mwĩthambei moko manyu inyuĩ ehia, na mũtherie ngoro cianyu kũna inyuĩ andũ a ngoro igĩrĩ
Iguai kĩeha, mũcakae, na mũgirĩke. Garũrai mĩtheko yanyu ĩtuĩke macakaya, nakĩo gĩkeno kĩanyu kĩgarũrũke gĩtuĩke kĩeha.
Mwĩnyihĩriei Yahweh, nake nĩ ekũmũtũũgĩria.
Ariũ na aarĩ a Ithe witũ, tigai gũcambania mũndũ na ũrĩa ũngĩ. Ũrĩa wothe waragia ũhoro wa gũcambia mũrũ kana mwarĩ wa ithe kana akamũtuĩra cira-rĩ, nĩ Watho acambagia na akaũtuĩra cira. Hĩndĩ ĩrĩa ũgũtuĩra Watho cira-rĩ, ndũkoragwo ũkĩhingia Watho, no ũkoragwo ũrĩ mũtuanĩri cira.
Kũrĩ Mũheani wa Watho, na Mũtuanĩri cira o ũmwe, o we ũrĩa ũrĩ na ũhoti wa kũhonokia na kũninana. No wee-rĩ, ũkĩrĩ ũ nĩguo ũtuĩre mũndũ ũrĩa ũngĩ cira?
Rĩu ta thikĩrĩriai, inyuĩ mugaga atĩrĩ: “Ũmũthĩ kana rũciũ nĩ tũgũthiĩ itũũra rĩna tũikare kuo mwaka ũmwe, tũrute wĩra wa wonjoria kuo, tũgĩe na mbeca.”
No rĩrĩ, inyuĩ mũtiũĩ ũrĩa gũgaatuĩka rũciũ. Muoyo wanyu ũkĩrĩ kĩ? Inyuĩ mũrĩ o kĩbii kĩrĩa kĩonekaga o kahinda kanini, gĩgacoka gĩgathira biũ.
Handũ ha ũguo-rĩ, mwagĩrĩirwo nĩ kuugaga atĩrĩ, “Yahweh angĩenda-rĩ, nĩ tũgũtũũra muoyo na twĩkage ũndũ ũyũ na ũyũ.”
No rĩu inyuĩ nĩ kwĩraha mwĩrahaga mũrĩ na nguthi. Mwĩraho ta ũcio wothe nĩ mũũru.
Nĩ ũndũ wa ũguo, mũndũ wothe ũũĩ gwĩka wega na ndekaga-rĩ, ũcio nĩ kwĩhia ehagia.