Jakubu 5

Inyuĩ andũ arĩa atongu, rĩrai na mũcakae nĩ ũndũ wa mathĩna marĩa mekũmũkora.

Ũtonga wanyu nĩ ũbuthĩte, na nguo cianyu ikarĩo nĩ memenyi

Thahabu na betha cianyu nĩ ndĩe nĩ gutu, na gutu wacio nĩ ũgaatuĩka ũira wa kũmũũkĩrĩra na nĩ ũkaarĩa nyama cia mĩĩrĩ yanyu o ta mwaki. Nĩ mwĩigĩire mũthithũ o matukũ-inĩ marĩa ma ithirĩro

Ta rorai muone! Mĩcara ĩrĩa mũregete kũrĩha aruti a wĩra arĩa maagethire mĩgũnda yanyu ĩikaraga ĩgĩkayaga, na kĩrĩro kĩa agethi acio gĩa kũhoya ũteithio nĩ gĩkinyĩire matũ ma Yahweh mũnene wa ita.

Mũtũũrĩte mũtũũrĩre wa mĩago mũkĩhingagia merirĩria manyu gũkũ thĩ. Mũnoretie ngoro cianyu nĩ ũndũ wa mũthenya wa gũthĩnjwo.

Nĩ mũtuanĩire cira; nĩ mũũragĩte mũndũ ũrĩa mũthingu. Githĩ we ndareganaga na inyuĩ?

Nĩ ũndũ ũcio ariũ a Ithe witũ-rĩ, gĩai na wetereri o nginya hĩndĩ ya gũcoka kwa Mwathi.

O na inyuĩ onaniai wetereri; ĩkĩrai ngoro cianyu hinya, tondũ gũcoka kwa Mwathi nĩ gũkuhĩrĩirie.

Ariũ a Ithe witũ, mũtigatetage nĩ ũndũ wa mũndũ ũrĩa ũngĩ, nĩgetha mũtigatuĩrũo. Atĩrĩrĩ, Mũtuanĩri Cira arũgamĩte mbere ya mĩrango.

Ariũ a Ithe witũ, rũmĩrĩrai kĩonereria kĩega gĩa kũhinyĩrĩrio na kũnyamarĩka na gĩa kuonania wetereri kĩa anabii arĩa maaragia thĩinĩ wa rĩĩtwa rĩa Yahweh.

Toonei atĩ tuugaga kũrathimwo nĩ andũ arĩa maakirĩrĩirie. Nĩ mũiguĩte ũhoro wa ũkirĩrĩria wa Ayubu na mũkona ũrĩa Yahweh eekire marigĩrĩrio-inĩ, atĩ Yahweh nĩ mũcayanĩri mũno na nĩ mũigua tha.

Makĩria ma ũguo ariũ a Ithe witũ-rĩ, tigai kwĩhĩta na igũrũ o na kana na thĩ kana na mwĩhĩtwa ũngĩ o wothe. No rekagai “Ĩĩ” yanyu ĩtuĩke ĩĩ na “Aca” yanyu, ĩtuĩke aca, nĩgetha mũtigatuĩke a gũgaacirithio.

Hihi nĩ harĩ mũndũ ũnyarirĩkĩte gatagatĩ-inĩ kanyu? Nĩ athiĩ na mbere kũhoya. Hihi nĩ harĩ mũndũ mũkenu? Nĩ aine thaburi

Hihi nĩ harĩ mũndũ mũrũaru gatagatĩ-inĩ kanyu? Nĩ ete athuri a ũngano, nao mamũhoere makĩmũhakaga maguta thĩinĩ wa rĩĩtwa rĩa Yahweh

Na ihoya rĩu rĩa wĩtĩkio nĩ rĩgũtũma mũndũ ũcio mũrũaru ahone, na Yahweh nĩ ekũmũũkĩria. Ningĩ angĩkorũo nĩ ekĩte mehia, nĩ ekuoherũo.

Nĩ ũndũ ũcio, umbũranagĩrai mehia manyu mũtekũhithĩrĩra na mũhoyanagĩre, nĩguo mũhonio. Ithaithana riumĩte ngoro thĩinĩ rĩa mũndũ mũthingu rĩĩkaga maũndũ maingĩ.

Eliya aarĩ mũndũ o ta ithuĩ, no hĩndĩ ĩrĩa aahoire mũno mbura ndĩkoire, gũtioirire thĩinĩ wa bũrũri ũcio ihinda rĩa mĩaka ĩtatũ na mĩeri ĩtandatũ.

Agĩcoka akĩhoya rĩngĩ, narĩo igũrũ rĩkiuria mbura, na bũrũri ũkĩgĩa na maciaro.

Ariũ a Ithe witũ, mũndũ o na ũrĩkũ gatagatĩ-inĩ kanyu angĩhĩtithio oime ũhoro-inĩ ũrĩa wa ma nake mũndũ ũngĩ amũgarũre amũcokie,

menyai atĩ mũndũ o wothe ũgarũraga mwĩhia akamũcokia kuuma mahĩtia-inĩ ma njĩra yake, nĩ akaamũhonokia kuuma gĩkuũ-inĩ na nĩ akaahumbĩra mehia maingĩ.