Jeremiya 12
Yahweh, wee ũkoragwo ũrĩ mũthingu rĩrĩa ndakũrehera cira wakwa, Rĩrĩa ndaria nawe ũhoro wa maũndũ megiĩ matua ma cira marũngĩrĩru. No nĩ kĩĩ gĩtũmaga njĩra ya andũ arĩa aganu ĩgaacĩre, Na nĩ kĩĩ gĩtũmaga andũ arĩa mĩgarũ akunyanĩri maikare mategũtangĩka?
Wamahandire, na nĩ magĩĩte na mĩri. Nĩ makũrĩte na makagĩa na maciaro. Ũkoragwo mĩromo-inĩ yao, no ũrĩ kũraya mũno na methugunda mao ma thĩinĩ biũ.
No niĩ nĩ ũnjũĩ wega, wee Yahweh, nĩ ũnyonaga; Nĩ ũthuthurĩtie ngoro yakwa na ũkona atĩ ĩrĩ na ũiguano hamwe nawe. Mamũranie o ta ng’ondu cia gũthĩnjwo, Na ũmamũranie nĩ ũndũ wa mũthenya ũrĩa wa kũũragwo.
Hihi nĩ ihinda rĩigana atĩa bũrũri ũgũthiĩ na mbere kũng’ara Na mĩmera ya mĩgũnda yothe ĩkoma? Tondũ wa waganu wa andũ arĩa maikaraga kuo, Nyamũ o hamwe na nyoni nĩ iniinĩtwo. Nĩ gũkorũo moigĩte atĩrĩ: “We ndarona ũndũ ũrĩa ũgeekĩka harĩ ithuĩ.”
Angĩkorũo nĩ ũkũnoga ũgĩteng’erania na andũ marathiĩ magũrũ-rĩ, Ũngĩkĩhota atĩa gũteng’erania na mbarathi? O na ũngĩkorũo na ũmĩrĩru bũrũri-inĩ ũrĩ na thayũ-rĩ, Hihi ũgeka atĩa rĩrĩa ũgaakorũo ihinga-inĩ ndumanu iria irĩ Jorodani?
Nĩ gũkorũo o na ariũ a nyũkwa, nyũmba ya thoguo, nĩ magũkunyanĩire. Nĩ manĩrĩire na mũgambo mũnene nĩguo magũũkĩrĩre. Ndũkamehoke, O na mangĩkwĩra maũndũ mega.
“Nĩ ndiganĩirie nyũmba yakwa; nĩ ndiganĩirie igai rĩakwa. Nĩ neanĩte mwendwa wakwa ũrĩa nyendete mũno moko-inĩ ma thũ ciake.
Ũcio igai rĩakwa atuĩkĩte o ta mũrũthi ũrĩ mũtitũ-inĩ harĩ niĩ. Nĩ araramĩte akanjũkĩrĩra. Nĩ ũndũ ũcio, rĩu nĩ ndĩmũthũũrĩte.
Ũcio igai rĩakwa ahaana nyoni ndĩa nyama ya marangi maingĩ; Nyoni iria ingĩ ndĩa nyama nĩ imũthiũrũrũkĩirie na ikamũtharĩkĩra. Ũkai, cokanĩrĩrai hamwe, inyuĩ nyamũ ciothe cia gĩthaka, Ũkai mũrĩe.
Arĩithi aingĩ nĩ mathũkangĩtie mũgũnda wakwa wa mĩthabibũ; Nĩ marangĩrĩirie gĩcigo gĩakwa thĩinĩ wa bũrũri. Matũmĩte gĩcigo gĩakwa gĩa kwendeka thĩinĩ wa bũrũri gĩtuĩke werũ mũtiganĩrie.
Nĩ gĩtuĩkĩte kũndũ kwanangĩku. Nĩ kĩng’arĩte; Nĩ kũndũ gũtiganĩrie maitho-inĩ makwa. Bũrũri wothe nĩ ũtuĩkĩte kũndũ gũtiganĩrie, No gũtirĩ mũndũ ũrũmbũyagia ũndũ ũcio ngoro-inĩ.
Nĩ gũũkĩte aniinani tũcĩra-inĩ tuothe tũrĩa tũrangĩtwo mũno twa werũ-inĩ, Nĩ gũkorũo rũhiũ rwa njora rwa Yahweh rũraananga kuuma mwena ũmwe wa bũrũri nginya ũrĩa ũngĩ. Gũtirĩ mũndũ ũrĩ na thayũ.
Mahandĩte ngano, no magethete mĩigua. Nĩ menogetie, no gũtirĩ ũguni monete. Nĩ magaaconoka nĩ ũndũ wa maciaro mao Tondũ wa marakara mahiũ ma Yahweh.”
Ũũ nĩguo Yahweh oigĩte: “Ha ũhoro wa andũ othe aganu arĩa mandigicĩirie, o acio marahutia igai rĩrĩa ndatũmire andũ akwa Isiraeli magae, nĩ ngaamamunya kuuma bũrũri-inĩ wao, na nĩ ngaamunya nyũmba ya Yahuda kuuma harĩ o.
No thutha wa kũmamunya, nĩ ngaacoka ndĩmaiguĩre tha na ndĩmacokie o mũndũ harĩ igai rĩake na bũrũri-inĩ wake.”
“Na mangĩkeruta njĩra cia andũ akwa na merute kwĩhĩtaga na rĩĩtwa rĩakwa, ‘O ta ũrĩa Yahweh atũũraga muoyo!’ o ta ũrĩa maarutire andũ akwa kwĩhĩtaga na Baali, hĩndĩ ĩyo nĩ makaahandwo gatagatĩ-inĩ ka andũ akwa
No mangĩkarega gwathĩka, niĩ nĩ ngaamunya rũrĩrĩ rũu, ndĩrũmunye na ndĩrwanange,” ũguo nĩguo Yahweh ekuuga.