Jeremiya 13

Yahweh aanjĩrire atĩrĩ: “Thiĩ ũkegũrĩre mũcibi wa gatani wĩyohe njohero, no ndũkaũtobokie maĩ-inĩ.”

Nĩ ũndũ ũcio ngĩgũra mũcibi kũringana na kiugo kĩa Yahweh na ngĩwĩyoha njohero

Na kiugo kĩa Yahweh gĩkĩnginyĩra riita rĩa kerĩ ngĩrũo atĩrĩ:

“Oya mũcibi ũcio ũragũrire, o ũcio wĩyohete njohero, na ũkĩre ũthiĩ Rũũĩ-inĩ rwa Farati, ũkaũhithe kuo mwatũka-inĩ wa ndũmba ya ihiga.”

Nĩ ũndũ ũcio ngĩthiĩ na ngĩũhitha hakuhĩ na Rũũĩ rwa Farati, o ta ũrĩa Yahweh aanjathĩte.

No matukũ maingĩ thutha ũcio, Yahweh akĩnjĩra atĩrĩ: “Ũkĩra, ũthiĩ Rũũĩ-inĩ rwa Farati, woe mũcibi ũrĩa ndagwathĩte ũhithe kuo.”

Nĩ ũndũ ũcio ngĩthiĩ Rũũĩ-inĩ rwa Farati na ngĩthikũria mũcibi ũcio ngĩũruta harĩa ndaũhithĩte, na ngĩona atĩ mũcibi ũcio nĩ wathũkangĩte; watuĩkĩte wa tũhũ biũ.

Hĩndĩ ĩyo kiugo kĩa Yahweh gĩkĩnginyĩra ngĩrũo atĩrĩ:

“Ũũ nĩguo Yahweh ekuuga, ‘Ũguo noguo ngaaniina mwĩtĩo wa Yahuda na niine mwĩtĩo mũnene wa Yahrushalayim

Andũ acio aganu arĩa maregaga gwathĩkĩra ciugo ciakwa, o acio marũmagĩrĩra ngoro ciao nĩ ũndũ wa ũremi, na makarũmĩrĩra ihoti ingĩ, magacitungatĩra na magacinamĩrĩra, makaahaana o ta mũcibi ũcio ũtuĩkĩte wa tũhũ biũ.’

‘Nĩ gũkorũo o ta ũrĩa mũcibi wĩnyitagĩrĩra njohero-inĩ ya mũndũ, no taguo ndatũmĩte andũ othe a nyũmba ya Isiraeli na andũ othe a nyũmba ya Yahuda menyitĩrĩre harĩ niĩ,’ ũguo nĩguo Yahweh ekuuga, ‘nĩgetha matuĩke andũ kũrĩ, me na rĩĩtwa, a kũheo rũgooco, na kĩndũ gĩthaka harĩ niĩ. No matiathĩkire.’

“Ningĩ no mũhaka ũmahe ndũmĩrĩri ĩno, ‘Ũũ nĩguo Yahweh, o we Kĩhoti wa Isiraeli ekuuga: “Ndigithũ yothe nene nĩ yagĩrĩire kũiyũrio ndibei.”’ Nao nĩ megũgũcokeria makũũrie atĩrĩ, ‘Githĩ tũtiũĩ atĩ ndigithũ yothe nene nĩ yagĩrĩire kũiyũrio ndibei?’

Nawe ũmeere atĩrĩ, ‘Ũũ nĩguo Yahweh ekuuga: “Nĩ ngũtũma aikari othe a bũrũri ũyũ maiyũrũo nĩ ũrĩĩu, o na athamaki arĩa maikaragĩra gĩtĩ kĩa ũnene kĩa Daudi, athĩnjĩri-Yahweh na anabii, na aikari othe a Yahrushalayim

Na nĩ ngaamagũthithania mũndũ na ũrĩa ũngĩ, maithe o hamwe na ariũ ao,” ũguo nĩguo Yahweh ekuuga. “Ndikaamacaĩra kana njigue kĩeha nĩ ũndũ wao o na kana ndĩmaiguĩre tha o na hanini; gũtirĩ ũndũ ũkaagiria ndĩmaniine.”’

Thikĩrĩriai na mũtege matũ. Mũtigakorũo na mwĩtĩo, nĩ gũkorũo Yahweh nĩ arĩtie.

Goocai Yahweh Kĩhoti wanyu Atanarehe nduma Na magũrũ manyu matanahĩngwo irĩma-inĩ gũkĩgĩa mairia. Nĩ mũkeerĩgĩrĩra kuona ũtheri, No akaarehe kĩĩruru kĩnene; Agaatũma ũtheri ũcio ũtuĩke nduma ndumanu.

Na mũngĩrega gũthikĩrĩria, Niĩ nĩ ngaarĩrĩra hitho-inĩ nĩ ũndũ wa mwĩtĩo wanyu. Nĩ ngaita maithori maingĩ, na maitho makwa nĩ makaanyũrũrũkia maithori, Tondũ rũũru rwa Yahweh nĩ rũtahĩtwo.

Ĩra mũthamaki na nyina wa mũthamaki atĩrĩ, ‘Ikarai thĩ handũ hatarĩ hatũũgĩru, Nĩ gũkorũo thũmbĩ icio cianyu thaka nĩ ikaagũa kuuma mĩtwe-inĩ yanyu.’

Matũũra ma mwena wa mũhuro nĩ mahinge, na gũtirĩ na mũndũ wa kũmahingũra. Yahuda yothe nĩ ĩtwarĩtwo ithamĩrio, ĩgatwarũo ithamĩrio-inĩ biũ.

Tiira maitho maku wone arĩa maroka kuuma mwena wa rũgongo. Rwĩ ha rũũru rũrĩa waheirũo, ng’ondu icio ciaku thaka?

Hihi ũkoiga atĩa rĩrĩa iherithia rĩaku rĩgooka Kuuma harĩ arata aku a hakuhĩ arĩa wagĩire ũrata nao kuuma kĩambĩrĩria? Githĩ ndũkaanyitwo nĩ ruo, ta rwa mũtumia akĩgĩa mwana?

Na rĩrĩa ũkoiga atĩrĩ ngoro-inĩ yaku, ‘Nĩ kĩĩ gĩtũmĩte maũndũ maya mangore?’ Nĩ tondũ mehia maku maingĩ nĩmo matũmĩte ũrutwo nguo na ndiira ciaku ikaigua ruo rũnene.

Hihi Mũkushi no ahote gũcenjia ngothi yake, kana ngarĩ ĩcenjie marooro mayo? Angĩkorũo no kũhoteke, o na inyuĩ no mũhote gwĩka wega, O inyuĩ mũmenyeretio gwĩka maũndũ moru.

Nĩ ũndũ ũcio nĩ ngaamahurunja ta mahuti marahurutwo nĩ rũhuho rwa werũ-inĩ.

Rĩu nĩrĩo igai rĩaku, igai rĩrĩa ngũthimĩire,” ũguo nĩguo Yahweh ekuuga, “Tondũ nĩ ũriganĩirũo nĩ niĩ na wĩhokaga maheeni.

Nĩ ũndũ ũcio, nĩ ngoya nguo ciaku na igũrũ ikũhumbe ũthiũ, Na njaga yaku nĩ ĩkooneka,

Ciĩko ciaku cia ũtharia na kwania kũrĩa wanagia nĩ ũndũ wa thuti, Ũmaraya ũcio waku ũtarĩ thoni. Kũu tũrĩma-inĩ, mũgũnda-inĩ, Nĩ nyonete mĩtugo yaku ĩrĩ magigi. Kaĩ wĩ na haaro-ĩ, wee Yahrushalayim! Ũgũthiĩ na mbere gũikara ũtarĩ mwamũre nginya rĩ?”