Jeremiya 14
Gĩkĩ nĩkĩo kiugo kĩa Yahweh kĩrĩa gĩakinyĩire Jeremiya gĩkoniĩ mahinda marĩa gũtaarĩ na mbura:
Yahuda nĩ ĩracakaya, na ihingo ciayo nĩ ibuĩrĩtie. Nĩ irikĩrĩte na thĩ irĩ na kĩeha, Na kĩrĩro nĩ kĩrambata na igũrũ kiumĩte Yahrushalayim.
Nao athani a kuo matũmaga ndungata ciao igatahe maĩ. Ithiaga marima-inĩ ma maĩ no ikaga maĩ. Igacoka ndigithũ ciacio itarĩ na kĩndũ. Nĩ iconokete na igakua ngoro, Na nĩ ihumbĩrĩte mĩtwe yacio.
Tondũ thĩ nĩ njatũkangu, Nĩ gũkorũo gũtirĩ na mbura bũrũri-inĩ, Arĩmi nĩ mamakĩte na makahumbĩra mĩtwe yao.
O na thwariga ya mũgoma ĩrĩa ĩrĩ gĩthaka-inĩ nĩ ĩtiganagĩria kaana kayo gaciarũo o ũguo Tondũ gũtirĩ na nyeki.
Ndigiri cia gĩthaka irũgamaga tũrĩma-inĩ tũrĩa tũtarĩ kĩndũ. Ihũmahũmaga igĩcaria rĩera o ta ngui cia gĩthaka; Maitho ma cio moragwo nĩ hinya tondũ gũtirĩ na nyeki.
O na gũtuĩka mahĩtia maitũ nĩ marutaga ũira atĩ tũrĩ ehia, Oya ikinya nĩ ũndũ wa rĩĩtwa rĩaku, wee Yahweh. Nĩ gũkorũo ciĩko citũ cia ũregenyũki nĩ nyingĩ, Na wee nĩwe twĩhĩirie.
Wee kĩĩrĩgĩrĩro kĩa Isiraeli, o wee Mũhonokia wake hĩndĩ ya mĩtangĩko, Nĩ kĩĩ gĩtũmĩte ũkorũo ũtariĩ ta mũgeni bũrũri-inĩ, O ta mũgendi ũrĩa ũtithagia akararĩrĩra o ũtukũ ũmwe?
Nĩ kĩĩ gĩtũmĩte ũikare ta mũndũ mũmaku, O ta mũndũ ũrĩ hinya ũtangĩhota kũhonokania? Tondũ wee Yahweh ũrĩ gatagatĩ-inĩ gaitũ, Na twĩtanagio na rĩĩtwa rĩaku. Ndũkae gũtũtiganĩria.
Ũũ nĩguo Yahweh oigĩte igũrũ rĩgiĩ andũ aya: “Nĩ mendete kũũrũra; matigirĩrĩirie magũrũ mao. Nĩ ũndũ ũcio Yahweh ndakenagio nĩo. Nĩ ekũririkana mahĩtia mao na amaciirithie nĩ ũndũ wa mehia mao.”
Yahweh agĩcoka akĩnjĩra atĩrĩ: “Ndũkahoere andũ aya mone maũndũ mega.
Rĩrĩa mehinga, niĩ ndithikagĩrĩria mathaithana mao, na rĩrĩa maruta magongona magima ma njino na magongona ma mũtu, ndikenagio nĩmo, tondũ andũ acio nĩ ngaamaniina na rũhiũ rwa njora, na ng’aragu, o na mũrimũ mũũru.”
Ndaigua ũhoro ũcio ngiuga: “Hĩ, atĩrĩrĩ wee Mwathi Yahweh! Oneei Anabii mameeraga atĩrĩ, ‘Mũtikonana na rũhiũ rwa njora, na mũtigaakorũo na ng’aragu, no thayũ wa ma nĩguo niĩ Kĩhoti ngaamũhe kũndũ gũkũ.’”
Nake Yahweh akĩnjĩra atĩrĩ: “Anabii mararatha maũndũ ma maheeni na rĩĩtwa rĩakwa. Ti niĩ ndimatũmĩte kana ngamatha kana ngaria nao. Maramũrathĩra kĩoneki kĩa maheeni na ũragũri ũtarĩ kĩene na maheeni ma ngoro ciao ene
Nĩ ũndũ ũcio-rĩ, ũũ nĩguo Yahweh oigĩte igũrũ rĩgiĩ anabii acio mararatha maũndũ na rĩĩtwa rĩakwa, o na gũtuĩka ti niĩ ndĩmatũmĩte, o acio moigaga atĩ bũrũri ũyũ ndũkonana na rũhiũ rwa njora kana ũgĩe ng’aragu: ‘Anabii acio makaaninwo na rũhiũ rwa njora na ng’aragu
Nao andũ acio mararathĩrũo ũhoro magaateo barabara-inĩ cia Yahrushalayim nĩ ũndũ wa ng’aragu na rũhiũ rwa njora, gũtarĩ na mũndũ wa kũmathika, andũ acio, aka ao, ariũ ao, kana aarĩ ao, tondũ nĩ ngaamaitũrũrĩra ũũru ũrĩa ũmaagĩrĩire.’
“No mũhaka ũmeere kiugo gĩkĩ, ‘Maitho makwa maronyũrũrũka maithori ũtukũ na mũthenya, na matikahũe, Tondũ mũirĩtu gathirange wa andũ akwa nĩ ahehenjetwo biũ na akoinangwo, Na akagĩa na kĩronda kĩnene mũno.
Ingiumagara thiĩ mũgũnda-inĩ kũrora, Nyonaga arĩa moragĩtwo na rũhiũ rwa njora! Na rĩrĩa ndaingĩra itũũra-inĩ, Nyonaga mĩrimũ ĩrĩa yumanĩte na ng’aragu! Tondũ mũnabii na mũthĩnjĩri-Yahweh, eerĩ nĩ mathiũrũrũkĩte bũrũri matoĩ.’”
Hihi nĩ ũregete Yahuda biũ, na hihi nĩ ũmenete Zayuni? Nĩ kĩĩ gĩtũmĩte ũtũringe, nginya tũkaga kĩhonia? Twerĩgagĩrĩra kũgĩa na thayũ, no gũtirĩ ũndũ mwega woonekire, Tũkĩĩrĩgĩrĩra ihinda rĩa kũhonio, no nĩ guoya ũrĩ kuo!
Rĩu Yahweh, nĩ twĩtĩkĩrĩte waganu witũ, Na mahĩtia ma maithe maitũ ma tene, tondũ nĩ tũkwĩhĩirie.
Nĩ ũndũ wa rĩĩtwa rĩaku-rĩ, ndũgatũrege; Ndũkanyarare gĩtĩ gĩaku kĩa ũnene kĩrĩa kĩrĩ riri. Ririkana na ndũkage kũhingia kĩrĩkanĩro kĩrĩa warĩkanĩire na ithuĩ.
Mĩhianano ĩtarĩ kĩene ya ndũrĩrĩ-rĩ, hihi nĩ harĩ o na ũmwe ũngiuria mbura, O na igũrũ-rĩ, hihi no riurie mbura rĩo rĩene? Na githĩ towe tu ũngĩka ũguo, wee Yahweh Kĩhoti witũ? Na wee nĩwe twĩrĩgagĩrĩra, Tondũ nowe wiki wĩkĩte maũndũ macio mothe.