Jeremiya 16

Kiugo kĩa Yahweh nĩ kĩanginyĩire o rĩngĩ ngĩrũo atĩrĩ:

“Ndũkanahikanie, na ndũkanagĩe na ariũ kana aarĩ ũrĩ kũndũ gũkũ

Nĩ gũkorũo ũũ nĩguo Yahweh oigĩte igũrũ rĩgiĩ ariũ na aarĩ arĩa maciarĩirũo gũkũ na igũrũ rĩgiĩ manyina mao marĩa mamaciaraga o na maithe mao marĩa matũmaga maciarĩrũo bũrũri-inĩ ũyũ:

‘Nĩ makooragwo nĩ mĩrimũ mĩũru, no gũtirĩ mũndũ ũkaamarĩrĩra kana amathike; magaatuĩka o ta thumu igũrũ rĩa thĩ. Nĩ makaaniinwo na rũhiũ rwa njora na maniinwo nĩ ng’aragu, na ciimba ciao igaatuĩka irio cia nyoni cia rĩera-inĩ na cia nyamũ cia gũkũ thĩ.’

Nĩ gũkorũo ũũ nĩguo Yahweh ekuuga, ‘Ndũkanatonye nyũmba ĩrĩ na ndĩa ya macakaya, Na ndũkanathiĩ kũrĩra kana kũũmanĩrĩria.’ ‘Nĩ gũkorũo nĩ njehereirie andũ aya thayũ wakwa,’ ũguo nĩguo Yahweh ekuuga, ‘O na ngamehereria wendo wakwa wa ũtugi o na tha.

Andũ arĩa anene o na arĩa anini, othe magaakuĩra bũrũri-inĩ ũyũ. Matigaathikwo, Gũtirĩ mũndũ ũkaamacakaĩra, Ningĩ gũtirĩ mũndũ ũgetemenga kana eyenje agĩe kĩhara nĩ ũndũ wao.

Na gũtirĩ mũndũ ũkaahe arĩa maracakaya irio, Nĩguo amomĩrĩrie nĩ ũndũ wa andũ ao arĩa makuĩte; O na gũtirĩ mũndũ ũkaamahe gĩkombe gĩa kũmomĩrĩria Manyue nĩ ũndũ wa gũkuĩrũo nĩ maithe kana manyina mao.

Na ndũkanatonye nyũmba ĩrĩ na ndĩa atĩ ũikare thĩ hamwe nao nĩguo mũrĩe na mũnyue.’

“Nĩ gũkorũo ũũ nĩguo Yahweh mũnene wa ita, o we Kĩhoti wa Isiraeli ekuuga; Tamwĩiguĩrei! ‘Kũndũ gũkũ, o matukũ-inĩ manyu mũkĩĩyonagĩra na maitho manyu, nĩ ngaaniina mĩgambo ya gĩkeno na ndũhiũ, mũgambo wa mũhikania o na mũgambo wa mũhiki!’

“Hĩndĩ ĩrĩa ũkeera andũ aya ciugo icio ciothe, nĩ magaakũũria atĩrĩ, ‘Nĩ kĩĩ gĩtũmĩte Yahweh arie ũhoro wa mwanangĩko ũcio mũnene ũguo wa gũtũũkĩrĩra? Nĩ mahĩtia marĩkũ twĩkĩte na nĩ mehia marĩkũ twĩhĩirie Yahweh Kĩhoti witũ?’

Nawe no mũhaka ũkaamacokeria ũmeere ũũ, ‘Nĩ tondũ maithe manyu ma tene nĩ maandiganĩirie,” ũguo nĩguo Yahweh ekuuga, “na maaikaraga makĩrũmagĩrĩra ihoti ingĩ na magacitungatĩra o na magacinamĩrĩra. No niĩ nĩ maandiganĩirie, na matiarũmĩrĩire watho wakwa

Na inyuĩ mwĩkĩte maũndũ moru gũkĩra maithe manyu ma tene, na o ũmwe wanyu arũmagĩrĩra ũremi wa ngoro yake njũru handũ ha kũnjathĩkĩra

Nĩ ũndũ ũcio, nĩ ngaamũrutũrũra bũrũri ũyũ ndĩmũtware bũrũri ũrĩa inyuĩ mũtoĩ, o na maithe manyu ma tene mataamenyete, na kũu nĩ mũgaatungatagĩra ihoti ingĩ mũthenya na ũtukũ, tondũ ndikaamũiguĩra tha.”’

“‘No rĩrĩ, matukũ nĩ maroka,’ ũguo nĩguo Yahweh ekuuga, ‘rĩrĩa matagacoka kuuga ũũ: “O ta ũrĩa Yahweh atũũraga muoyo, o we warutire andũ a Isiraeli bũrũri-inĩ wa Misiri!”

No handũ ha ũguo makoigaga ũũ: “O ta ũrĩa Yahweh atũũraga muoyo, o we warutire andũ a Isiraeli kuuma bũrũri-inĩ wa mwena wa rũgongo na mabũrũri-inĩ mothe kũrĩa aamahurunjĩte!” na nĩ ngaamacokia bũrũri-inĩ wao, ũrĩa ndaheire maithe mao ma tene.’

‘Nĩ ngũtũmanĩra ategi aingĩ a thamaki,’ ũguo nĩguo Yahweh ekuuga, ‘Na nĩ makaamatega. Thutha ũcio nĩ ngaatũmanĩra ahĩti aingĩ, Na nĩ makaamahĩta irĩma-inĩ ciothe na tũrĩma-inĩ tuothe Na kuuma mĩatũka-inĩ ya ndũmba cia mahiga.

Tondũ maitho makwa makoragwo maũndũ-inĩ mothe marĩa mekaga. Maũndũ macio matihithĩtwo kuuma mbere yakwa, O na kana mahĩtia mao makahithwo kuuma maitho-inĩ makwa.

O mbere-rĩ, ngamba kũmarĩha biũ mũigana ũrĩa waganĩrĩire na mahĩtia mao o na mehia mao, Tondũ nĩ mathahĩtie bũrũri wakwa na indo itarĩ muoyo cia mĩhianano ĩyo yao ĩrĩ magigi Na nĩ maiyũrĩtie igai rĩakwa na indo ciao irĩ magigi.’”

Atĩrĩrĩ Yahweh, wee hinya wakwa na mwĩgitio wakwa, O wee handũ hakwa ha kũũrĩra mũthenya wa mĩtangĩko, Ndũrĩrĩ nĩ igooka harĩ wee kuuma ituri-inĩ cia thĩ, Na nĩ ikoiga atĩrĩ: “Maithe maitũ ma tene maagaire maheeni matheri, Makĩgaya indo itarĩ kĩene na cia tũhũ iria itarĩ ũguni.”

Hihi mũndũ no ahote gwĩthondekera ihoti? na itikĩrĩ ihoti cia ma.

“Nĩ ũndũ ũcio, nĩ ngaatũma mamenye, Ihinda-inĩ rĩu nĩrĩo ngaatũma mamenye hinya wakwa o na ũhoti wakwa, Na nĩ makaamenya atĩ niĩ njĩtagwo Yahweh.”