Jeremiya 33

Kiugo kĩa Yahweh nĩ gĩakinyĩire Jeremiya riita rĩa kerĩ ihinda-inĩ o rĩu aahingĩrĩtwo Nja ya Arangĩri, akĩrũo atĩrĩ:

“Ũũ nĩguo Yahweh Mũũmbi wa thĩ ekuuga, Yahweh ũrĩa wamĩũmbire na akĩmĩhanda na akĩmĩrũmia; Yahweh nĩrĩo rĩĩtwa rĩake,

‘Ngaĩra, na niĩ nĩ ngũgwĩtĩka na ngwĩre ndĩyendeire maũndũ manene na matangĩtuĩrĩka marĩa wee ũtarĩ wamenya.’”

“Nĩ gũkorũo ũũ nĩguo Yahweh Kĩhoti wa Isiraeli ekuuga igũrũ rĩgiĩ nyũmba cia itũũra rĩrĩ na nyũmba cia athamaki a Yahuda iria iramomorũo nĩ ũndũ wa hĩba cia kũrigicĩria o na rũhiũ rwa njora,

na igũrũ rĩgiĩ arĩa maroka kũrũa na Akalidei, makaiyũria kũndũ gũkũ ciimba cia andũ arĩa njũragĩte nĩ ũndũ wa marakara makwa na mang’ũrĩ makwa, o acio waganu wao ũtũmĩte hithe ũthiũ wakwa kuuma harĩ itũũra rĩrĩ:

‘Nĩ ngaahonia itũũra rĩrĩ na ndĩrĩhe ũgima mwega wa mwĩrĩ, na nĩ ngaamahonia na ndĩmahe thayũ mũingĩ o na ũhoro wa ma

Na nĩ ngaacokia andũ arĩa matahĩtwo a Yahuda na andũ arĩa matahĩtwo a Isiraeli, na nĩ ngaamaaka o ta ũrĩa ndekire kĩambĩrĩria-inĩ

Na nĩ ngaamatheria kuumana na mahĩtia mothe ma mehia mao marĩa manjĩhĩirie, na ndĩmohere mahĩtia mothe ma mehia mao o na mahĩtia mao mothe marĩa mahĩtĩirie

Na itũũra rĩu rĩgaatuĩka rĩĩtwa rĩa gĩkeno, rũgooco, o na ũthaka harĩ niĩ mbere ya ndũrĩrĩ ciothe cia thĩ iria ikaaigua ũhoro wa maũndũ mothe mega marĩa ngaamarehera. Na nĩ ikaamaka na cinaine tondũ wa maũndũ mothe mega na thayũ ũrĩa ngaarehera itũũra rĩu.’”

“Ũũ nĩguo Yahweh ekuuga: ‘Kũndũ gũkũ kũrĩa mugaga atĩ nĩ kwanangĩku gũtarĩ na mũndũ kana mahiũ, thĩinĩ wa matũũra ma Yahuda, na barabara-inĩ cia Yahrushalayim iria itiganĩirio, gũtarĩ na mũndũ kana mũikari o na kana mahiũ, nĩ gũkaaiguĩka rĩngĩ

mũgambo wa gĩkeno na mũgambo wa gũcanjamũka, mũgambo wa mũhikania na mũgambo wa mũhiki, mũgambo wa arĩa makoiga atĩrĩ: “Cokeriai Yahweh mũnene wa ita ngatho, tondũ Yahweh nĩ mwega; tha ciake itũũraga tene na tene!”’ “‘Nĩ makaarehe magongona ma gũcokia ngatho thĩinĩ wa nyũmba ya Yahweh, nĩ gũkorũo nĩ ngaacokia andũ arĩa matahĩtwo a bũrũri ũcio, o ta ũrĩa kwarĩ kĩambĩrĩria-inĩ,’ ũguo nĩguo Yahweh ekuuga.”

“Ũũ nĩguo Yahweh mũnene wa ita ekuuga: ‘Thĩinĩ wa kũndũ gũkũ kwanangĩku, gũtarĩ na mũndũ kana mahiũ, na matũũra-inĩ makuo mothe, nĩ gũgaakorũo na kũndũ gwa kũrĩithia rĩngĩ kũrĩa arĩithi mangĩhurũkia ndũũru ciao.’

“‘Matũũra-inĩ ma gĩcigo kĩrĩa kĩrĩ irĩma, matũũra-inĩ marĩa marĩ kũndũ kĩanda, matũũra-inĩ ma mwena wa mũhuro, bũrũri-inĩ wa Benjamini, icigo-inĩ iria ithiũrũrũkĩirie Yahrushalayim, na matũũra-inĩ ma Yahuda, ndũũru nĩ ikaahĩtũkĩra rĩngĩ rungu rwa moko ma mũndũ ũrĩa ũcitaraga,’ ũguo nĩguo Yahweh ekuuga.”

“‘Oneei atĩ, matukũ nĩ maroka,’ ũguo nĩguo Yahweh ekuuga, ‘rĩrĩa ngaahingia kĩĩranĩro kĩega kĩrĩa njĩranĩire kĩgiĩ nyũmba ya Isiraeli na nyũmba ya Yahuda

Matukũ-inĩ macio, na ihinda-inĩ rĩu nĩ ngaarahũrĩra Daudi thuuna ya ũthingu, nake nĩ ageekaga maũndũ na kĩhooto na ũthingu thĩinĩ wa bũrũri

Matukũ-inĩ macio, Yahuda nĩ ĩkaahonokio na Yahrushalayim ĩgaaikaraga ĩrĩ na ũgitĩri. Na ũũ nĩguo itũũra rĩu rĩgeetagwo: Yahweh Nĩwe Ũthingu Witũ.’”

“Nĩ gũkorũo ũũ nĩguo Yahweh ekuuga: “Gũtirĩ hĩndĩ gũkaaga mũndũ wa rũciaro rwa Daudi wa gũikarĩra gĩtĩ kĩa ũnene kĩa nyũmba ya Isiraeli,

o na gũtirĩ hĩndĩ gũkaaga mũndũ wa kũrũgama mbere yakwa kuuma harĩ athĩnjĩri-Yahweh Alawii wa kũrutaga magongona magima ma njino, gũcina magongona ma mũtu, na kũruta magongona.’”

Na kiugo kĩa Yahweh gĩgĩkinyĩra Jeremiya o rĩngĩ akĩrũo atĩrĩ:

“Ũũ nĩguo Yahweh ekuuga, ‘Angĩkorũo no mũhote gũthũkia kĩrĩkanĩro gĩakwa kĩgiĩ mũthenya na kĩrĩkanĩro gĩakwa kĩgiĩ ũtukũ, nĩguo mũthenya na ũtukũ itigokage hĩndĩ ĩrĩa yagĩrĩire,

hĩndĩ ĩyo norĩo kĩrĩkanĩro gĩakwa na ndungata yakwa Daudi kĩngĩthũkio, nĩguo age gũkorũo na mũrũwe ũrathana arĩ mũthamaki gĩtĩ-inĩ gĩake kĩa ũnene, na noguo o na kĩrĩkanĩro gĩakwa na athĩnjĩri-Yahweh Alawii, o acio ndungata ciakwa

O ta ũrĩa mbũtũ ya igũrũ ĩtangĩtarĩka na mũthanga wa iria-inĩ ũtangĩthimĩka, ũguo noguo ngaingĩhia mbeũ ya Daudi ndungata yakwa na Alawii arĩa mandungatagĩra.’”

Na kiugo kĩa Yahweh gĩgĩkinyĩra Jeremiya o rĩngĩ akĩrũo atĩrĩ:

“Kaĩ ũtaiguĩte ũrĩa andũ aya maroiga, ‘Yahweh nĩ akaarega mbarĩ iria igĩrĩ aathuurire’? Ningĩ matiheaga andũ akwa gĩtĩo, na matimonaga matariĩ ta rũrĩrĩ rĩngĩ.

“Ũũ nĩguo Yahweh ekuuga: ‘O ta ũrĩa na ma ndathondekire kĩrĩkanĩro gĩakwa kĩgiĩ mũthenya na ũtukũ, ngĩthondeka mawatho ma igũrũ na thĩ,

ũguo noguo gũtarĩ hĩndĩ ngaarega mbeũ ya Jakubu na ya Daudi ndungata yakwa, atĩ nĩguo ndikarute kuuma harĩ mbeũ yake andũ a gwathaga njiarũa cia Iburahimu, Isaaka, na Jakubu. Nĩ gũkorũo nĩ ngaacokanĩrĩria andũ ao arĩa matahĩtwo ndĩmacokie na ndĩmaiguĩre tha.’”