Jeremiya 47

Gĩkĩ nĩkĩo kiugo kĩa Yahweh kũrĩ mũnabii Jeremiya gĩkoniĩ Afilisti, Firauni atanahũũra Gaza

Yahweh oigĩte ũũ: “Tarora woone! Maĩ nĩ maroka moimĩte mwena wa rũgongo. Magaatuĩka karũũĩ kaiyũru mũno. Na nĩ makaahumbĩra bũrũri na indo ciothe iria irĩ thĩinĩ waguo, Itũũra o na andũ arĩa maikaraga thĩinĩ warĩo. Andũ nĩ magaakaya, Na andũ othe arĩa maikaraga bũrũri-inĩ nĩ makaarĩra.

Rĩrĩa gũkaiguĩka mũkubio wa mahũngũ ma mbarathi ciake cia njamba, Kũiguĩke mũrurumo wa ngaari ciake cia mbaara Na inegene rĩa magũrũ ma ngaari ciake, Maithe o na matikehũgũra marore ariũ ao, Tondũ moko mao nĩ makoorũo nĩ hinya,

Nĩ gũkorũo mũthenya ũrĩa ũroka nĩ ũkaaniina Afilisti othe; Nĩ ũkeeheria kuuma Turo na Sidoni matigari mothe ma arĩa mamateithagia. Tondũ Yahweh nĩ akaaniina Afilisti, Arĩa matigarĩte kuuma gĩcigĩrĩra-inĩ gĩa Kafitori.

Andũ a Gaza nĩ makaagĩa kĩhara. Ashikeloni nĩ nyũnũhe ĩgakirio. Wee ũtigarĩte mũkuru-inĩ wao mwaraganu, Hihi ũgũtũũra wĩtemengaga nginya rĩ?

Atĩrĩrĩ wee rũhiũ rwa njora rwa Yahweh! Hihi ũgũikara ũtakirĩte nginya rĩ? Coka njora-inĩ yaku. Hurũka na ũkire ki.

Rũngĩgĩkira atĩa na Yahweh nĩwe ũrwathĩte? Ashikeloni na gĩcũa-inĩ, Kũu nĩkuo arwathĩte rũũkĩrĩre.”