Jeremiya 8

Yahweh oigĩte atĩrĩ, “Hĩndĩ ĩyo, mahĩndĩ ma athamaki a Yahuda, mahĩndĩ ma anene a kuo, mahĩndĩ ma athĩnjĩri-Yahweh, mahĩndĩ ma anabii, na mahĩndĩ ma aikari a Yahrushalayim nĩ magathikũrio kuuma mbĩrĩra-inĩ ciao.

Makaanĩkĩrũo riũa, mweri, na mbũtũ yothe ya igũrũ, o ĩyo meendete na maatungatagĩra, makamĩrũmĩrĩra, makamĩcaria na makamĩinamĩrĩra. Matigaacokanĩrĩrio, o na kana mathikwo. Magaatuĩka o ta thumu igũrũ rĩa thĩ.”

“Namo matigari ma kĩruka kĩũ kĩũru arĩa makaahonoka magaathuura gĩkuũ handũ ha muoyo kũndũ guothe kũrĩa ngaamahurunja,” ũguo nĩguo Yahweh mũnene wa ita ekuuga.

“Nawe no nginya ũmeere atĩrĩ, ‘Yahweh oigĩte ũũ: “Hihi nĩ makaagũa na mage gũũkĩra rĩngĩ? Ũmwe wao angĩgarũrũka-rĩ, na githĩ ũcio ũngĩ o nake to agarũrũke?

Nĩ kĩĩ gĩtũmaga andũ aya a Yahrushalayim matũũre magĩte wĩhokeku harĩ niĩ? Nĩ marũmĩtie ũhoro wa maheeni; Na nĩ maregaga kũgarũrũka.

Nĩ ndategire gũtũ na ngĩikara thikĩrĩirie, no maũndũ marĩa maaragia matiarĩ mega. Gũtirĩ mũndũ weririre nĩ ũndũ wa waganu wake kana akĩũria atĩrĩ, ‘Nĩ atĩa ũguo njĩkĩte?’ O ũmwe wao aikaraga agĩcokaga njĩra-inĩ ĩrĩa ĩthiagĩrũo nĩ andũ aingĩ, o ta mbarathi ĩrateng’era yerekeire mbaara-inĩ.

O na mũhau ũrĩ kũrĩa igũrũ nĩ ũmenyaga mahinda maguo; Ndutura na thũngũrũrũ o na nyamĩndigi nĩ iririkanaga ihinda rĩrĩa ciagĩrĩire gũcoka. No andũ akwa matitaũkagĩrũo nĩ ituĩro rĩa Yahweh.”’

‘Mũngĩkiuga atĩa atĩrĩ: “Ithuĩ tũrĩ ogĩ, na tũrĩ na watho wa Yahweh”? Tondũ ũrĩa kũrĩ nĩ atĩ, karamu ga kũheenania ka andĩki-watho kahũthĩrĩtwo gũtua Watho ũcio wa maheeni.

Andũ arĩa ogĩ nĩ maconorithĩtio. Nĩ mamakĩte mũno na nĩ makaanyitwo. Rorai muone, nĩ maregete kiugo kĩa Yahweh, Nĩ ũũgĩ ũrĩkũ makĩrĩ naguo?

Nĩ ũndũ ũcio-rĩ, nĩ ngaaneana andũ-a-nja ao kũrĩ arũme angĩ, Mĩgũnda yao ndĩmĩneane ĩtuĩke ya andũ angĩ; Tondũ o ũmwe wao, kuuma ũrĩa mũnini nginya ũrĩa mũnene, areguna na uumithio ũtarĩ wa kĩhooto; Kuuma mũnabii nginya mũthĩnjĩri-Yahweh, o mũndũ areka maũndũ ma ũtunyani.

Na mageragia kũhonia nguraro ya mwarĩ wa andũ akwa o igũrũ tu, makoiga ũũ, “Kũrĩ na thayũ! Kũrĩ na thayũ!” Na hĩndĩ ĩyo gũtirĩ na thayũ.

Hihi nĩ maconokaga nĩ ũndũ wa maũndũ marĩ magigi marĩa mekĩte? Maticonokaga o na hanini! O na matiũĩ kũigua thoni nĩ kuuga atĩa! Nĩ ũndũ ũcio, makaagũa gatagatĩ-inĩ ka arĩa magũĩte. Rĩrĩa ngaamaherithia nĩ makaahĩngĩka,’ ũguo nĩguo Yahweh oigĩte.

‘Rĩrĩa ngaamacokanĩrĩria, nĩ kũmaniina ngaamaniina,’ ũguo nĩguo Yahweh ekuuga. ‘Gũtirĩ thabibũ igaakorũo itigarĩte mũthabibũ-inĩ, kana ngũyũ itigarĩte mũkũyũ-inĩ, na mathangũ nĩ makaahooha. Na kĩrĩa ndamaheire nĩ kũũrũo makoorũo nĩkĩo.’”

“Tũragĩikara thĩ haha nĩkĩ? Rekei tũcokanĩrĩre hamwe tũingĩre matũũra-inĩ marĩa marĩ na ũgitĩri tũthirĩre kuo. Tondũ Yahweh Kĩhoti witũ nĩ egũtũniina, Na atũheaga maĩ marĩ na thumu tũnyue, Nĩ gũkorũo nĩ twĩhĩirie Yahweh.

Twerĩgagĩrĩra kũgĩa na thayũ, no gũtirĩ ũndũ mwega woonekire, Tũkĩĩrĩgĩrĩra ihinda rĩa kũhonio, no nĩ guoya ũrĩ kuo!

Dani nĩ kũraiguĩka mbarathi cia thũ ikĩhuhia. Rĩrĩa kwaiguĩka mũgambo wa mbarathi ciayo cia njamba ikĩania, Bũrũri wothe nĩ ũthingithaga. Mokaga na magatambura bũrũri na kĩrĩa gĩothe kĩrĩ thĩinĩ waguo, Itũũra na aikari a rĩo.”

“Tondũ nĩ ngũtũma nyoka gatagatĩ-inĩ kanyu, Nyoka irĩ thumu na itangĩthuthĩrũo, Na hatarĩ nganja nĩ ikũmũrũma,” ũguo nĩguo Yahweh ekuuga.

Kĩeha gĩakwa gĩtingĩthira; Ngoro yakwa nĩ ndwaru.

Kuuma bũrũri wa kũraya kũrĩ na kĩrĩro gĩa kũhoya ũteithio Kĩa mwarĩ wa andũ akwa akiuga: “Na githĩ Yahweh ndarĩ thĩinĩ wa Zayuni? Kana hihi mũthamaki wakuo ndarĩ o kuo thĩinĩ?” “Nĩ kĩĩ gĩtũmĩte mandakarie na mĩhianano ĩyo yao ya gwacũhio, Na ihoti icio ciao ng’eni itarĩ kĩene?”

“Ihinda rĩa magetha nĩ ihĩtũku, hĩndĩ ya ũrugarĩ nĩ ĩthirĩte, No tũtirĩ tũrahonokio!”

Nĩ hehenjekete nĩ ũndũ wa nguraro ya mwarĩ wa andũ akwa; Ndĩraigua nguĩte ngoro. Nĩ nyitĩtwo nĩ kĩmako.

Kaĩ gũtarĩ balisamu thĩinĩ wa Gileadi? Na kaĩ gũtarĩ mũhonania kuo? Nĩ kĩĩ gĩtũmĩte mwarĩ wa andũ akwa age gũcokererũo nĩ ũgima mwega wa mwĩrĩ?