Jeremiya 7
Gĩkĩ nĩkĩo kiugo kĩrĩa gĩakinyĩire Jeremiya kuuma kũrĩ Yahweh akĩrũo atĩrĩ:
“Rũgama kĩhingo-inĩ kĩa nyũmba ya Yahweh na ũrĩ hau ũmenyithanie ndũmĩrĩri ĩno, ‘Iguai kiugo kĩa Yahweh, inyuĩ andũ othe a Yahuda arĩa mũingĩragĩra ihingo-inĩ ici nĩguo mũthathaiye Yahweh
Yahweh mũnene wa ita, o we Kĩhoti wa Isiraeli, ekuuga ũũ: “Garũrĩrai njĩra cianyu na ciĩko cianyu, na niĩ nĩ ngũmwĩtĩkĩria mũthiĩ na mbere gũtũũra kũndũ gũkũ
Mũtikehoke ciugo cia maheeni muuge atĩrĩ, ‘Ĩno nĩ hekarũ ya Yahweh, Nĩ hekarũ ya Yahweh! Nĩ hekarũ ya Yahweh!’
Tondũ mũngĩgarũrĩra njĩra cianyu na ciĩko cianyu biũ; mũngĩrũagĩrĩra kĩhooto gatagatĩ ka mũndũ na ũrĩa ũngĩ;
mũngĩaga kũhinyĩrĩria andũ a kũngĩ arĩa maikaranagia na inyuĩ, ciana cia ngoriai, na atumia a ndigwa; mũngĩaga gũita thakame ĩtarĩ na mahĩtia kũndũ gũkũ; na mũngĩaga kũrũmĩrĩra ihoti ingĩ, ũndũ ũrĩa ũngĩtũma muone ũũru;
niĩ na niĩ nĩ ngũmwĩtĩkĩria mũthiĩ na mbere gũtũũra kũndũ gũkũ, bũrũri ũrĩa ndaheire maithe manyu ma tene matũũre kuo mahinda mothe.”’”
“No inyuĩ mwĩhokaga ciugo cia maheeni, ũndũ ũrĩa ũtakaamũguna o na hanini
Hihi no mũiye, mũũragane, mũtharie, mwĩhĩte na ũhoro wa maheeni, mũrutĩre Baali magongona, na mũrũmĩrĩre ihoti iria mũtoĩ,
mũcoke mũũke mũrũgame mbere yakwa nyũmba-inĩ ĩno ĩĩtanĩtio na rĩĩtwa rĩakwa na muuge, ‘Nĩ tũkaahonokio,’ o na mwĩkĩte maũndũ macio mothe marĩ magigi
Kaĩ nyũmba ĩno ĩĩtanĩtio na rĩĩtwa rĩakwa ĩtuĩkĩte ngurunga ya atunyani maitho-inĩ manyu? Nĩ ndĩyoneire maũndũ macio niĩ mwene,” ũguo nĩguo Yahweh ekuuga.
“‘No rĩrĩ, rĩu thiĩi handũ hakwa harĩa hamũre thĩinĩ wa Shilo, kũrĩa ndatuire gĩikaro kĩa rĩĩtwa rĩakwa riita rĩa mbere, muone ũrĩa ndekire handũ hau nĩ ũndũ wa waganu wa andũ akwa Isiraeli
Ĩndĩ inyuĩ mwathiire na mbere gwĩka maũndũ macio mothe,’ ũguo nĩguo Yahweh ekuuga, ‘o na gũtuĩka nĩ ndamwarĩirie rĩngĩ na rĩngĩ, mũtiathikĩrĩirie. Ndaikaraga ngĩmwĩtaga, no mũtianjĩtĩkaga
Nĩ ũndũ ũcio, o ta ũrĩa ndekire Shilo, no taguo ngeeka nyũmba ĩrĩa ĩĩtanĩtio na rĩĩtwa rĩakwa, o ĩyo inyuĩ mwĩhokete, o hamwe na kũndũ gũkũ kũrĩa ndamũheire na ngĩhe maithe manyu ma tene
Nĩ ngaamũingata mwehere maitho-inĩ makwa, o ta ũrĩa ndaingatire ariũ a ithe wanyu othe, andũ othe a rũciaro rwa Efiraimu.’
“No wee-rĩ, ndũkahoe nĩ ũndũ wa andũ aya. Ndũkamarĩrĩre kana ũmahoere kana ũmathaithanĩrĩre harĩ niĩ, tondũ ndigũgũthikĩrĩria
Kaĩ ũtarona ũrĩa mareka matũũra-inĩ ma Yahuda na barabara-inĩ cia Yahrushalayim
Ariũ ao marongania ngũ, namo maithe magakia mwaki, nao andũ-a-nja magakanda mũtu nĩguo mathondeke keki cia kũruta irĩ magongona harĩ Mũndũ-mũka Mũthamaki wa kũrĩa Igũrũ, na nĩ maraita magongona ma ndibei nĩ ũndũ wa ihoti ingĩ nĩgetha mandakarie
‘No rĩrĩ, hihi nĩ niĩ maratuurithia?’ ũguo nĩguo Yahweh ekũũria. ‘Githĩ ti o ene, marehĩngĩca o makĩyonagĩra na maitho mao?’
Nĩ ũndũ ũcio, Mwathi Yahweh ekuuga ũũ, ‘Oneii! Marakara makwa na mang'ũrĩ makwa nĩ magaaitwo kũndũ gũkũ, maitwo igũrũ rĩa andũ na nyamũ, mĩtĩ ya mũgũnda-inĩ na maciaro ma tĩri; nĩ magaakana na matikaahorio.’
“Yahweh mũnene wa ita, o we Kĩhoti wa Isiraeli ekuuga atĩrĩ, ‘Thiĩi na mbere, ongererai magongona manyu magima ma njino harĩ magongona manyu marĩa mangĩ, na mũrĩe nyama icio inyuĩ ene
Tondũ mũthenya ũrĩa ndarutire maithe manyu ma tene bũrũri-inĩ wa Misiri, ndiaririe nao kana ngĩmatha ũhoro-inĩ wĩgiĩ magongona magima ma njino o na maruta
No nĩ ndamaheire watho ũyũ: “Athĩkĩrai mũgambo wakwa, na niĩ nĩ ngũtuĩka Kĩhoti wanyu, na inyuĩ mũtuĩke andũ akwa. No mũhaka mũgeragĩre njĩra-inĩ yothe ĩrĩa ndĩrĩmwathaga, nĩgetha maũndũ manyu mathiage wega.”’
Ĩndĩ matiathikĩrĩirie kana magĩtega gũtũ kwao; handũ ha ũguo, maathiire kũringana na njama ciao ene, makĩrũmĩrĩra ngoro yao njũru nĩ ũndũ wa ũremi, na magĩcoka na thutha handũ ha gũthiĩ na mbere,
kuuma mũthenya ũrĩa maithe manyu ma tene moimire bũrũri wa Misiri nginya ũmũthĩ ũyũ. Nĩ ũndũ ũcio ndaikaraga ngĩtũmaga ndungata ciakwa ciothe anabii kũrĩ inyuĩ, ngamatũma o mũthenya, rĩngĩ na rĩngĩ
No nĩ maaregire gũũthikĩrĩria, na matiategire gũtũ kwao. Handũ ha ũguo, nĩ kũrema maaremire, na magĩka maũndũ moru gũkĩra maithe mao ma tene!
“Ũkũmeera ciugo icio ciothe, no matigũgũthikĩrĩria; ũkũmeta, no matigũgwĩtĩka
Nawe ũmeere atĩrĩ, ‘Rũrũ nĩ rũrĩrĩ rũrĩa rũtaathĩkĩire mũgambo wa Yahweh Kĩhoti waruo na rũkĩrega gwĩtĩkĩra ũtaaro. Ũhoro wa Ma nĩ ũthirĩte, o na ndũgwetagwo gatagatĩ-inĩ kao.’
“Enja njuĩrĩ ĩyo yaku ĩtarĩ yenjwo na ũmĩte, na ũine wanĩrĩire rwĩmbo rwa macakaya igũrũ rĩa tũrĩma tũrĩa tũtarĩ kĩndũ, tondũ Yahweh nĩ aregete rũciaro rũrũ rũtũmĩte arakare na nĩ ekũrũtiganĩria
‘Nĩ gũkorũo andũ a Yahuda nĩ mekĩte maũndũ moru maitho-inĩ makwa,’ ũguo nĩguo Yahweh ekuuga. ‘Nĩ maigĩte mĩhianano yao ĩrĩ magigi thĩinĩ wa nyũmba ĩrĩa ĩĩtanĩtio na rĩĩtwa rĩakwa, nĩgetha mamĩthahie
Nĩ makĩte kũndũ gũtũũgĩru gwa Tofethi, Mũkuru-inĩ wa Mũrũ wa Hinomu, nĩgetha macinĩre ariũ na aarĩ ao na mwaki kuo, ũndũ ũrĩa niĩ itaathanĩte na ũtarĩ o na watonya ngoro-inĩ yakwa.’
“‘Nĩ ũndũ ũcio, matukũ nĩ maroka,’ ũguo nĩguo Yahweh ekuuga, ‘rĩrĩa kũndũ kũu gũtagacoka gwĩtwo Tofethi kana Mũkuru wa Mũrũ wa Hinomu no gũgeetagwo Mũkuru wa Kũũraganĩrũo. Magaathikana kũu Tofethi nginya kwage handũ ha gũthikana
Na ciimba cia andũ aya igaatuĩka irio cia nyoni cia rĩera-inĩ na cia nyamũ cia gũkũ thĩ, na gũtirĩ mũndũ ũgaacingata
Nĩ ngaaniina mũgambo wa gĩkeno na mũgambo wa gũcanjamũka, mũgambo wa mũhikania na mũgambo wa mũhiki, thĩinĩ wa matũũra ma Yahuda na barabara-inĩ cia Yahrushalayim, tondũ bũrũri ũcio nĩ ũkaanangwo ũthire biũ.’”